Furðulegur matur

  Ég hef nokkrum sinnum sótt Svíþjóð heim.  Reyndar aðeins Stokkhólm.  Skemmtileg borg.  Góðar plötubúðir.  Góður matur.  Víkur þá sögu að sænsku búðinni Ikea í Garðabæ.  Henni er stýrt af röggsemi og útjónarsemi af Skagfirðingi.  Fyrir bragðið er veitingastaður Ikea í Garðabæ sá vinsælasti í heiminum.  Meðal snjallra trompa er að bjóða upp á fjölbreytta rétti mánaðarins.  Jafnan eitthvað gott, ódýrt og spennandi. 

  Í þessum mánuði er boðið upp á furðulegan sænskan rétt,  kartöflubollur,  svokallaðar kroppkakor.  Mér virtist sem þær samanstandi af hveiti og kartöflum.  Kannski smá salti. Inni í hverri bollu er smávegis af svínakjöti.  Þær eru löðrandi í bræddu smjöri og rjómaskvettu.  Títuberjasulta bjargar því sem bjarga má.  Þetta er furðulegur matur.  Allir fyrri tilboðsréttir Ikea hafa bragðast betur.  Undarlegt að Svíar sæki í þennan rétt.  Kannski er hann hollur.

  Samt.  Það er alltaf gaman að prófa framandi mat.          

 

Athugasemdir

[Sigurður Bjarklind (IP-tala skráð) 12.3.2019 kl. 08:14]

Það vantar bara 3 spælegg ofan á þetta og þá er það orðin máltíð!

[Júlíus Valsson, 12.3.2019 kl. 09:48]

Matarsmekkur Svía hefur breyst mikið á síðustu 3 áratugum eða svo með fjölgun innflytjenda. Þeir borða reynda enn kartöflusalat Falukorf (léttreyktar pylsur) og blodpudding (eins konar blóðmör) í nærri hvert mál. Jólahlaðborðið þeirra er líkast bragðlausu forréttahlaðborði. Til að fá virkilega góðan hefðbundinn mat þar í landi ættu menn að fara sem nyrst í Svíþjóð. Þar kunna menn að elda.  

[DJS (IP-tala skráð) 12.3.2019 kl. 14:38]

Heyrðir þú ekki í sveitinni þegar þú varst að alast upp að kartöflurnar drýgðu matin. Þarna er semsé komin allsherjar skýring á því.

[Sigurður I B Guðmundsson, 12.3.2019 kl. 16:51]

Er það sænski kokkurinn sem útbýr þetta???

[Þorsteinn Siglaugsson, 13.3.2019 kl. 14:09]

Kroppkakor er einhver alversti matur sem ég hef smakkað á ævinni. Gleymi því aldrei þegar ég lagði mér þetta til munns einhvers staðar í útnára í Norður-Svíþjóð fyrir löngu síðan. Vont á bragðið og svo límist þetta við góminn og tekur óratíma að losna við það.

[Jens Guð, 14.3.2019 kl. 17:57]

Sigurður Bjarklind,  það þarf ekki meira til!

[Jens Guð, 14.3.2019 kl. 17:57]

Júlíus,  takk fyrir upplýsingarnar.

[Jens Guð, 14.3.2019 kl. 17:59]

DJS,  það fór alveg framhjá mér.  En þetta er gott og hollt ráð fyrir þá sem eiga lítið af mat.

[Jens Guð, 14.3.2019 kl. 18:00]

Sigurður I B,  pottþétt!

[Jens Guð, 14.3.2019 kl. 18:02]

Þorsteinn,  gott að fá staðfestingu á því að matarsmekkur minn sé ekki bara mín matvendni.