Hótel Jórvík

  Á tíunda áratug síðustu aldar átti ég erindi til Þórshafnar á Langanesi.  Var með skrautskriftarnámskeið þar.  Gisti á Hótel Jórvík.  Hótelstýran var hölt öldruð kona.  Hún var hálf heyrnarlaus.  Lá því hátt rómur.  Auk mín dvöldu á hótelinu flugmaður og dúettinn Súkkat. 

  Ég kom mér fyrir í hótelinu síðdegis á föstudegi; hafði herbergisdyrnar opnar.  Ég heyrði að hótelsíminn hringdi.  Kerla svaraði.  Viðmælandinn var auðheyranlega að bjóðast til að hjálpa til.  Hótelstýran hrópaði í tólið:  "Ég slepp létt frá kvöldmatnum.  Ég er bara með nýja kalla sem komu í dag.  Hinir fóru í morgun.  Ég get þess vegna hitað upp afganginn af karríkjötinu frá því á mánudaginn og nýju kallarnir fatta ekki neitt!"

  Um kvöldið var karríkjötsréttur í matinn. 

  Hótelstýran lét okkur vita að hún hefði bjór og vín til sölu.  Við gestirnir pöntuðum eitthvað af veigum.  Enginn var barinn.  Konan sótti drykkina inn í hliðarherbergi.  Hún bar þá ekki fram í umbúðum heldur í vatnsglösum. 

  Nokkrum árum síðar var forsíðufrétt í DV um að við húsleit í Hótel Jórvík hefði fundist töluvert magn af heimabrugguðum bjór og víni ásamt bruggtólum.  Hótelstýran sagðist ekki selja áfengi.  Hún væri að geyma þetta fyrir sjómann sem hún vissi ekki hvað hét. 

 

 

Athugasemdir

[Sigurður Bjarklind (IP-tala skráð) 10.10.2019 kl. 08:33]

Kerla dugleg að bjarga sér. Bættur sé skaðinn.

[Magnús Sigurðsson, 10.10.2019 kl. 15:01]

Hótel Jórvík er með eftirminnilegri hótelum sem ég hef gist, hótelstýran og hennar aðstoðarlið mikið sómafólk.

Þar dvöldum við vinnufélagarnir vikum saman sumarið 1993, en það sumar björguðust Færeyingar við smuguveiðar í sinni kreppu og áttu það til að koma inn til Þórshafnar á riðdöllum sem skráðir voru í Belize og Jamaica eða bara einhverjum öðrum Cariba eyjum.

Og af því að hótelstýran vissi vel hvað efnahagur færeysku sjómannanna leyfði þá veittu hún þeim "drykkina í vatnsglösunum" gratís. Við fengum eftir þannig landlegur sjaldan kjöt í karrý en þeim mun oftar lúðu frá Vestmannaeyjum.

[Sigurður I B Guðmundsson, 10.10.2019 kl. 16:10]

Aldrei má "maður" aldrei neitt!!

[Jens Guð, 10.10.2019 kl. 16:54]

Sigurður Bjarklind,  hún var snillingur!  Engin matarsóun á þeim bæ.

[Jens Guð, 10.10.2019 kl. 17:02]

Magnús,  gaman að heyra.  Þessu má bæta við mína frásögn (mér fannst því ofaukið í knöppum pósti og ekki passa inn í stílinn):  Er við snæddum karríkjötið var konan spurð hvort hún ætlaði ekki að fá sér bita með okkur.  Hún svaraði því til að hana langi frekar til að bjóða upp á huggulega "dinner" stemmningu fyrir okkur.  Með það sama dró hún fram harmónikku og spilaði nokkur fjörug gömlu dansanna lög.

[Jens Guð, 10.10.2019 kl. 17:04]

Sigurður I B,  það er vandlifað í henni veröld.  Enginn skilningur á sjálfsbjargarviðleitni.