Bráðskemmtilegt "Laugardagskvöld með Matta".

  Ég var að hlusta á skemmtilegan útvarpsþátt,  "Laugardagskvöld með Matta",  á Rás 2.  Gestur þáttarins var Logi Einarsson,  formaður Samfylkingarinnar og Skriðjökull.  Hann kynnti fyrir hlustendum uppáhaldslögi sín.  Þar rataði hver gullmolinn á fætur öðrum.  Gaman var á að hlýða.  Líka vegna þess að fróðleiksmolar flutu með. 

  Snemma í þættinum upplýsti Logi undanbragðalaust að hans uppáhald sé bítillinn Paul McCartney.  "Minn maður," sagði hann.  Ekki vissi hann af hverju.  Hinsvegar þykir honum vænt um að dóttir hans hefur erft aðdáun á Paul.  Svo spilaði Logi uppáhaldslag sitt með Paul.  Það var "Come Together",  opnulag plötunnar "Abbey Road".

  Er lagi lauk gerði Matti athugasemd.  Hann sagði:  "Þetta er Lennon-legt lag en Paul á það, eða hvað?"   Logi svaraði:  "Ég veit það ekki.  Ég hef aldrei kafað það djúpt í þetta."

  Hið rétta er að lagið er samið og sungið af John.  Höfundareinkenni Johns eru sterk.  Bæði í söng og blúsaðri laglinu.

  Í frekara spjalli um "Abbey Road" upplýsti Logi að John og Paul hafi átt óvenju fá lög á plötunni.  Hún væri eiginlega plata George Harrisons.  Hann eigi þessi fínu lög eins og "Here Comes the Sun" og "Strawberry Fields". 

  Hið rétta er að Lennon-McCartney eiga 14 af 17 lögum plötunnar.  Ringo á 1 og George 2.  Vissulega eru lög George virkilega góð og að mati mínu og Lennons bestu lög plötunnar.  Logi nefndi réttilega "Here Comes the Sun" en hitt lag George á plötunni er "Something".  Ekki "Strawberry Fields".  Það er Lennon-lag sem kom einungis út á smáskífu en löngu síðar á geisladiski með "Sgt. Peppers...".  

  Tekið skal fram að með þessum pósti er ég ekki að reyna að gera lítið úr stjórnmálamanninum Loga Einarssyni.  Stjórnmálamenn þurfa ekki að vera með sögu Bítlanna á hreinu.  Sú hljómsveit starfaði stutt.  Plötuupptökur hennar spönnuðu aðeins 6 ár,  1963-1969.  Þeim mun merkilegra og skemmtilegra er að fólk sé að hlusta á Bítlana 2019.  Hvað varð um allar hinar hljómsveitirnar sem tröllriðu markaðnum á sama tíma og Bítlarnir: Love,  Iron Butterfly,  Crazy World of Arthur Brown,  Soft Machine,  Them,  Strawbs...?

      

Athugasemdir

[Stefán Guðmundsson (IP-tala skráð) 15.10.2019 kl. 09:33]

Chuck Berry á hlut í bæði lagi og texta lagsins Come Together og það var viðurkennt af John Lennon, sem losaði sig undan málaferlum fyrir lagastuld með því að syngja inn á plötur þrjú lög í eigu Morris Levis, þar á meðal þetta Chuck Berry lag You Can t Catch Me. George Harrison fór jú mjög illa út úr málaferlum fyrir lagastuld sem kunnugt er. Lagið He s So Fine eftir  Ronnie Mack sem varð að laginu My Sweet Lord. 

[Jóhann Elíasson, 15.10.2019 kl. 12:27]

Logi Einarsson, virðist vera álíka vel að sér um sögu the Beatles eins og í öðru, þess vegna er hann eilíflega að BULLA eitthvað út í loftið og virðist komast nokkuð upp með það eins og sést á því að það virðast bara örfáir sjá hversu ótrúverðugur maðurinn er.....

[Jens Guð, 15.10.2019 kl. 17:55]

Stefán,  John var að heiðra Chuck Berry með því að vitna í lagabút hans og texta.  Chuck var upp með sér.  Hinsvegar sá plötuútgefandi hans í hendi sér að hægt væri að gera sér mat úr þessu.  Chuck var á móti því en fékk ekki við neitt ráðið.  Ég held að John hafi ekki haft neitt á móti því að syngja inn á plötu þessi 3 lög sem Morris Levy átti útgáfurétt á.  

[Jens Guð, 15.10.2019 kl. 17:56]

Jóhann,  ég þekki lítið til Loga en þeim mun meira um Bítlana.

[Stefán Guðmundsson (IP-tala skráð) 15.10.2019 kl. 19:48]

John Lennon tók líka sitthvað frá Beethoven og ekki er vitað til þess að sá hafi kvartað yfir því, enda voru þeir ekki svo ólíkir persónuleikar. Skapillir ófriðarseggir en meistarar í tónlistarsköpun. Varðandi hljómsveitirnar sem þú nefnir þarna í lokin. Plata Love ,, Forever Changes ,, frá 1967 lifir sem eitt mesta meistaraverk Vesturstrandarrokksins. Merkasta plata Iron Butterfly ,, In-A-Gadda-Da-Vida hefur ekki elst eins vel að mínu mati, en ensk/ameríska hljómsveitin Captain Beyon var stofnuð upp úr Iron Butterfly og fyrsta plata þeirra frá 1972 finnst mér alveg bráð skemmtileg. Enski söngvarinn Arthur Brown átti þetta fræga lag ,, Fire ,, en ekki mikið meira. Enska underground/jazzrock hljómsveitin Soft Machine átti nú ekki svo miklum vinsældum að fagna, nema helst hjá gagnrýnendum og tónlistarnördum eins og mér. Upptökustjóri fyrstu smáskífu þeirra frá 1967 var Chas Chandler bassaleikari Animals og umbi Hendrix og Slade. Blessuð sé minning hans. Írska hljómsveitin Them skilaði af sér stórsnillingnum Van Morrison sem enn nýtur vinsælda og virðingar. Enska folkrock/prog hljómsveitin Strawbs var klárlega vinsælli en Soft Machine þegar best lét og líklega er hljómsveitin að einhverju leiti enn starfandi, þó flestum gleymd. Hljómborðsleikari þeirra, Rick Wakemann varð stórstjarna með hljómsveitinni Yes, sem Gunnari Jökli bauðst að leika með.   

[Jens Guð, 15.10.2019 kl. 21:33]

Stefán,  takk fyrir fróðleiksmolana.  Lennon-lagið "Because" var samið upp úr Túnglskinssónötu Beethovens spilaðri afturábak.  Sennilega var Chad Chandler umbi Soft Machine.  Að minnsta kosti sendi hann Hendrix og Soft Machine í hljómleikaferð um Bandaríkin - þar sem Hendrix varð þvílík ofurstjarna.  Til gamans:  Þegar Robert Wyatt,  trommuleikati, söngvari og þúsundþjalasmiður Soft Machine,  hljóðritaði sólósmáskífuna "Slow Walkin' Talk" þá spilaði Hendrix á bassa.  Að því loknu sagði Hendrix eitthvað á þessa leið:  Ég skal kenna þér nokkur einföld gítartrix til að hressa upp á lagið.  Í ævisögu sinni segist Robert hafa í hroka afþakkað það.  Honum fannst hann sjálfur vera ekki síðri gítarleikari en Hendrix.  Mörgum áratugum síðar söng Robert Wyatt inn á plötuna Medúllu með Björk.

            https://www.youtube.com/watch?v=agO_R0h1V84

[Richard Þorlákur Úlfarsson, 16.10.2019 kl. 06:25]

Og ég sem hélt að allir væru sammála um að Medley-ið bæri best.

 

Það sem mörgum þykir skrítið er hversu ofboðslega vinsælt lagið frábæra "Oh! Darling" varð á Íslandi.

Þetta var aðal lagið í langan tíma bæði í Óskalögum Sjómanna og Óskalögum Sjúklinga.   

[Stefán Guðmundsson (IP-tala skráð) 16.10.2019 kl. 09:25]

Richard, Íílendingar eru miklir söngmenn og mönnum finnst sjálfsagt gaman að reyna við lagið Oh!Darling, þó að enginn geti toppað Paul þar í öskursöngnum - Alveg frábær blues.

[Jens Guð, 16.10.2019 kl. 18:05]

Richard,  á mínum  unglingsárum í upphafi 7unnar var Oh Darling aðal vangadanslagið.  Af mörgu skemmtilegu við Bítlana er að hvert lag með þeim á sinn aðdáendahóp.  Jafnframt greinir mönnum á um hver sé besta Bítlaplatan:  Rubber Soul,  Revolver,  Sgt. Peppers, Hvíta albúmið eða Abbey Road.  Til viðbótar á hver Bítill út af fyrir sig sinn aðdáendahóp.  

[Jens Guð, 16.10.2019 kl. 18:09]

Stefán (#8),  https://www.youtube.com/watch?v=cUeJdVV8yys

[Stefán Guðmundsson (IP-tala skráð) 16.10.2019 kl. 21:08]

En aftur að upprunanum: Ég hef hlustað á Laugardagskvöldin með Matta frá upphafi. Sumir gestir hans hafa einfaldlega ekki tónlistarsmekk sem ég get hlustað á, en aðrir eru bráðskemmtilegir eins og Logi Einars, sem gæti hafa ruglast aðeins í bítlafræðum vegna þess að hann er upptekinn við að gera Samfylkinguna að stærsta stjórnmálaflokki landsins miðað við nýja skoðanakönnun.

[Jens Guð, 17.10.2019 kl. 18:09]

Stefán,  ég þarf að tékka á þessum þætti.  Vissi ekki af honum fyrr en ég álpaðist inn á hann um helgina.  

[Stefán Guðmundsson (IP-tala skráð) 18.10.2019 kl. 09:31]

Þessi skemmtilegi þáttur Matta er búinn að vera í einhver ár og verður vonandi í einhver ár i viðbót.