Bestu trommuleikarar sögunnar

  Kanadíska tímaritið Drumeo hefur tekið saman áhugaverðan lista yfir bestu trommuleikara allra tíma.  Þeim er raðað í sæti.   Eflaust geta verið skiptar skoðanir um sætaröðina.  En tæplega um þá sem eru á listanum.

  Svona listi er ekki heilagur sannleikur.  Til að mynda einblínir hann á engilsaxneska trommuleikara.  Þetta er fyrst og fremst skemmtilegur samkvæmisleikur.  Í leiðinni vekur hann athygli á trommuleikurum sem áhugasamir eiga mögulega eftir að kynna sér.  Þessir raðast í efstu sætin:

1  Buddy Rich

  Hann er þekktur fyrir kraft, orku, ótrúlegan hraða, fullkomna tækni og ýmsar brellur.  Auk þess að vera hljómsveitarstjóri eigin hljómsveitar þá spilaði hann með bandarískum samlöndum sínum,  svo sem Louis Armstrong, Ellu Fitzgerald,  Charlie Parker, Frank Sinatra, Count Basie,  Harry James og mörgum fleiri.    

2  Neil Peart

Kanadískur trommari prog-hljómsveitarinnar Rush.  Trommusóló hans voru jafnan hápunktur á hljómleikum tríósins. 

3  John Bonham

Enskur trommuleikari Led Zeppelin.  Besti rokktrommuleikarinn.  Hann var þó undir miklum áhrifum frá djasstrommuleikurum á borð við Buddy Rich, Max Roach og Elvin Jones.  Aðalsmerki hans var tilfinningahiti,  "grúv" og hraður bassatrommusláttur með einu fótstigi.

4  Vinnie Colaiuta

Bandarískt kameljón.  Hóf feril með Frank Zappa.  Hefur síðan spilað með svo ólíkum tónlistarmönnum sem Noruh Jones,  Megadeath,  Sting,  Steely Dan,  Bill Evans,  Ray Charles,  Chick Corea,  Joni Mitchelle og mörgum fleiri. 

5  Tony Williams

Bandaríkjamaður sem vakti 17 ára gamall athygli í hljómsveit Miles Davis.  Hann spilaði af tilraunagleði og var einn af frumkvöðlum í að bræða saman tónlistarstíla.  Auk þess að halda úti eigin tríói þá spilaði hann með Sonny Rollins,  Herbie Hancock,  Ron Carter,  Stanley Clarke,  Chet Baker,  Winton Marsalis og Eric Dolphy.

6  Steve Gadd

Bandarískur djassisti.  Hefur spilað með Chick Corea,  Jaco Pastorius,  Steely Dan,  Steve Khan,  Paul Simon,  Paul McCartney,  Frank Sinatra og Weather Report.

7  Ringo Starr

Breskur Bítill.  Hann spilaði ólíkt því sem áður þekktist.  Hann hlóð einstaklega vel undir tónlistina og gerði hana þannig að sterku vörumerki.

8  Billy Cobham

Fæddur í Panama en flutti á barnsaldri til Bandaríkjanna.  Á stóran þátt í mótun nútíma trommuleiks.  Var frumkvöðull í að nota af árásargjörnum krafti tvær bassatrommur og spila bræðing (fusion). 

9  Max Roach

Bandarískur djassisti.  Spilaði meðal annars með Dizzy Gillespie.  Miles Davis,  Sonny Rollins,  Duke Ellington,  Chet Baker,  Clifford Brown og Charlie Parker.

10 Stewart Copeland

Fæddur í Bandaríkjunum en fjölskyldan flutti til Mið-Austurlanda þegar hann var aðeins nokkurra mánaða.  12 ára hóf hann trommunám í Englandi.  Hann er þekktur fyrir reggískotinn trommuleik með breska tríóinu The Police. 

Af ofantöldum trommurum eru á lífi aðeins Vinnie Colaiuta,  Steve Gadd,  Ringo Starr,  Billy Cobham og Stewart Copeland. 

Athugasemdir

[Jósef Smári Ásmundsson (IP-tala skráð) 8.3.2020 kl. 08:40]

Og hvar eru Ginger baker, Carl Palmer og Bill Bruford?

[sigurður bjarklind (IP-tala skráð) 8.3.2020 kl. 09:49]

Og hvar eru Gene Krupa og Gunnar Jökull?

[Sigurður I B Guðmundsson, 8.3.2020 kl. 09:59]

Og hvar er Keith Moon í The Who. 

[Jósef Smári Ásmundsson (IP-tala skráð) 8.3.2020 kl. 13:00]

Svo er það náttúrulega Dýri í prúðuleikurunum.

[Ómar Ragnarsson, 8.3.2020 kl. 13:41]

Er Art Blaky nokkurs staðar á listanum?   Á Youtube má finna lagið "A Night in Tunisia", en 1969 duttum við Haukur Heiðar inn á karlinn með The Jazz Messengers á litlum stað í Greenage Village í New York þar sem hægt var að sitja alveg upp við pallbrúnina og missa andann við það að verða vitni af því hvernig hann fór skyndilega hamförum í þessu lagi með rytmatrixum, sem maður hélt að væru ekki möguleg, til dæmis með rappi utan á trommurnar og með því að slá fastan endaslátt í laginu, nota sekúndu þðgn á eftir til þess að stilla kjuðunum samsíða upp á endann ofan á trommunni, haldandi um efri enda þeirra og töfra átta aukaslætti úr þeim með því að fikra hendurnar hratt niður eftir þeim. Hvílíkur sköpunargleði þessa stuðkarls! 

Ekkert af þessum undrum augnabliksins hef ég sáð hann gera á þeim upptökum, sem varðveittar eru. 

[Jón Steinar Ragnarsson, 8.3.2020 kl. 14:00]

Þessi gleymist alveg en á að vera efst á listanum.

https://youtu.be/ItZyaOlrb7E

[Stefán Guðmundsson (IP-tala skráð) 8.3.2020 kl. 18:22]

Ég er mikill áhugamaður um trommuleik og var svo heppinn að komast kornungur á hljómleika með meistara meistaranna, Buddy Rich. Það er búið að mæla það vísindalega að það er ekki hægt að spila hraðar á trommur en hann gerði. Það eru til þúsundir af ,, best drummers ,, listum á netinu. Buddy Rich er oftast á toppnum á blönduðum jazz/rokk listum eins og hér er nefndur, en þarna eru 50/50 topp 10 jazz og rokktrommarar. Á jazzlistum eru oftast á topp 10 næstir Buddy Rich meistarar eins og Elvin Jones, Max Roach, Art Blakey, Roy Haynes, Paul Motian, Tony Williams, Billy Cobham, Jack DeJonette og Kenny Clarke. Svo vil ég persónulega bæta ensku rokk og jazz trommurunum Ginger Baker og John Hiseman ( báðir látnir ) á svona topp lista. Ginger Baker á auðvitað heima við toppinn á svona rokklistum, ásamt Keith Moon, enda eru þeir líka oftast nefndir þar. Hinn nýlátni meistari Neil Peart nefndi Buddy Rich og Keith Moon sem sína uppáhalds trommara og Gunnar Jökull sagði Keith Moon og John Bonham sína uppáhalds trommara. 

[Stefán Örn Valdimarsson (IP-tala skráð) 8.3.2020 kl. 19:22]

Það eru margir sem koma til greina á svona lista en eru ekki nefndir á þessum lista t.d. menn sem hafa verið nefndir hér af öðrum t.d. Ginger baker, Carl Palmer og Bill Bruford, Keith Monn og örugglega margir aðrir sem ég kann ekki að nefna? Þess vegna er skrýtið að sjá Ringó Star á þessum lista sem er trommari sem er kannski slarkfær í meðal ballhljómsveit á Íslandi.

[Jens Guð, 9.3.2020 kl. 20:18]

Jósef Smári (# 1),  Ginger Baker er # 18,  Bill Bruford # 20 og Carl Palmer # 32.  

[Jens Guð, 9.3.2020 kl. 20:20]

Sigurður Bjarklind,  Gene Krupa er #17.  Gunnar Jökull virðist vera óþekktur í Kanada. 

[Jens Guð, 9.3.2020 kl. 20:21]

Sigurður I B, Keith Moon er # 19.

[Jens Guð, 9.3.2020 kl. 20:22]

Jósef Smári,  Dýri er fjarri góðu gamni. 

[Jens Guð, 9.3.2020 kl. 20:24]

Ómar,  Art Blakey er # 34.  Takk fyrir skemmtilega sögu af honum.

[Jens Guð, 9.3.2020 kl. 20:25]

Jón Steinar,  hann er ekki aðeins í vitlausum hljómsveitum heldur líka á vitlausum listum. 

[Jens Guð, 9.3.2020 kl. 20:44]

Stefán Guðmundsson,  Elvis Jones er # 15,  Jack Dejohnette er # 28 og Roy Haynes # 36.  Kenny Clarke, Paul Motian og John Hiseman eru ekki á listanum.  Í svörum hér fyrir ofan er staða annarra sem þú nefnir.   

[Jens Guð, 9.3.2020 kl. 20:46]

Stefán Örn,  í svörum mínum hér fyrir ofan kemur fram hvar þeir sem þú nefnir eru á listanum.

[Brynjarr (IP-tala skráð) 10.3.2020 kl. 01:35]

Sem ungur maður heyrpi ég upptöku af þessu lagi með Dave Brubeck quarted á tónleikum í Carnacie Hall ( 1963) þar sem Joe Morello tekur trommulólo í laginu "Casialian drums"   https://www.youtube.com/watch?v=EbR8G6YNuUM

Ég hef ekki heyrt neitt flottara síðan.  Þó eru nargir sem eru hraöari, en mín skoðun er sú aö þeir eru ekki ebdilega betri þó þeir geti barið hratt og fast.  Þarna situr Joe viö lítiö trommusett og býr til fullt af hljóðum.  Hann fer hægt, hratt, hátt og lágt.

Annars skemmtilegar pælingar.  Er Joe Morillo ekki á listanum ?

[Jens Guð, 10.3.2020 kl. 09:02]

Brynjar,  ójú.  Hann er # 33. 

[Siggi Lee Lewis, 11.3.2020 kl. 16:01]

Þarna vantar alveg Sandy Nelson í topp 3!

[Stefán Guðmundsson (IP-tala skráð) 11.3.2020 kl. 20:01]

Bestutrommaralisti Rolling Stone til samanburðar: Nr 1 John Bonham - Nr 2 Keith Moon - Nr 3 Ginger Baker - Nr 4 Neil Peart - Nr 10 Stewart Copland - Nr 12 Charlie Watts - Nr 14 Ringo Starr - Nr 15 Buddy Rich - Nr 16 Bill Bruford - Nr 19 Tony Williams. 

[Jens Guð, 11.3.2020 kl. 20:23]

Siggi Lee,  hann er ekki á topp 100 listanum.  Það er að segja ekki hjá Drumeo.

[Jens Guð, 11.3.2020 kl. 20:25]

Stefán (# 20),  þessir eru allir ofarlega á lista Drumeo.  Þetta er spurning um einhver sæti til eða frá. 

[Dýri Guðmundsson (IP-tala skráð) 13.3.2020 kl. 11:07]

Að mínu viti er Orri Páll í Sigur Rós sá einn sá besti. Ég veit að mér er málið skylt. En engu síður er ég sanfærður um það.  

[Jens Guð, 13.3.2020 kl. 19:27]

Dýri,  Orri Páll er flottur trommmari.  Enda skilst mér að hann eigi ættir að rekja til Vatnsdals í Húnavatnssýslu. 

[Stefán Guðmundsson (IP-tala skráð) 14.3.2020 kl. 16:52]

Held að Orri Páll sé hvorki betri né verri trommari fyrir tengingar sínar við Vatnsdal eða Seltjarnarnes, en fínn trommari engu að síður, en er hann án hljómsveitar í dag og er hljómsveitin Sigurrós hætt störfum ? Snilldar trommarinn Þorvaldur Þór Þorvaldsson er líka Seltirningur og meistaratrommarinn Einar Valur Scheving á sterkar tengingar við Nesið - Trommaranesið ?

[Jens Guð, 15.3.2020 kl. 14:56]

Stefán,  ég veit ekki betur en að Sigur Rós sé enn í fullu fjöri.