Illa farið með börn

  Sumt fólk kemur illa fram við börn.  Stundum svo undrum sætir.  Það fengu sjö tólf ára stelpur að sannreyna er þær brugðu sér af bæ og hugðust horfa saman á kvikmynd,  Hungurgeimana, í þar til gerðum bíósal. 

  Stelpurnar voru ekki búnar að sitja lengi undir myndinni er hávært sírenuvæl frá nokkrum lögreglubílum truflaði skemmtunina.  Þetta var í Austur-Sussex í Englandi.  Laganna verðir stormuðu inn gráir fyrir járnum.  Þeir smöluðu stelpunum út á hlað og sökuðu þær um að brjóta höfundarrétt.  Þær væru að taka myndina upp á síma og iPoda.  Skoðun á tækjum stelpnanna sannaði sakleysi þeirra.  Þar var ekkert höfundarvarið efni að finna.  Þrjár stelpnanna voru ekki einu sinni með síma eða aðrar græjur til að taka neitt upp.

  Fyrir utan hímdu stelpurnar í grenjandi rigningu og skulfu úr kulda baðaðar í bláum blikkljósum.  Fjórar þeirra fengu taugaáfall hágrátandi og þurftu að kalla á foreldra til að ferja sig heim.  Lögreglan meinaði stelpunum að halda hópinn.  Þeim var haldið aðgreindum.  Ein stúlkan sagði móður sinni síðar að hún hafi verið svo hrædd að henni hafi verið ómögulegt að gráta.  Hún var bara í losti.  Þær höfðu enga reynslu af samskiptum við lögregluna. 

  Eigendur kvikmyndahússins hafna sök.  Vísa alfarið á lögregluna.  Segja að í kjölfar símtals við hana hafi hún borið alla ábyrgð á framvindunni. Endurgreiðslu á miðum er hafnað.  Nýjum miðum er hafnað.  Stelpurnar eyddu um 20 þúsund kalli í kaup á miðum,  poppkorni, gosdrykkjum og fleiru.  En þær hafa ekki ennþá séð myndina.  Hvorki í kvikmyndahúsi né á netinu.  Lögreglan hefur beðist afsökunar.

  Góðu fréttirnar eru að svona gerist ekki á Íslandi. 

 

      

Athugasemdir

[Heiðar Þór Leifsson (IP-tala skráð) 29.7.2021 kl. 00:32]

Góðu fréttirnar eru að ekki sé farið illa með börn á Íslandi.

Gott að vita.

En eru það áreiðanlegar heimildir?

[Jens Guð, 29.7.2021 kl. 06:57]

Heiðar Þór,  nei,  heimildirnar eru mjög óáreiðanlegar.

[Magnús Sigurðsson, 29.7.2021 kl. 08:31]

Þetta hefur verið svokölluð rassía, eins gott að ekki var beitt kylfum á blessuð börnin, annað eins hefur nú skeð í bíó.

[Bjarni (IP-tala skráð) 29.7.2021 kl. 08:31]

Ef þetta er versta upplifun þeirra í æsku er það vel sloppið.  Þessi aumingjagæska er komin úr böndunum.

[Jens Guð, 29.7.2021 kl. 08:42]

Magnús,  hvorki kylfu beitt né stuðbyssu.  Vel sloppið!

[Jens Guð, 29.7.2021 kl. 08:43]

Bjarni,  þú átt við að áfallastreituröskun herði og stæli svona stelpur.

[Bjarni (IP-tala skráð) 29.7.2021 kl. 09:18]

Áfallastreiturösku!? Þú þarft að hafa verið pakkaður in í bómul alla ævi ef jafn ómerkilegt atvik veldur þér áfallastreituröskun.  Ég get talið upp tugi atvika sem ég lenti í æsku sem eru margfat verri, ég hinsvegar kæri mig ekki um að ryfja þau upp

[Sigurður I B Guðmundsson, 29.7.2021 kl. 09:59]

Aðalmálið er að gleðja börn en það gerði ég t.d. hér um árið þegar ég lék Lobba (Loðmund Húma) í Stundinni Okkar í Sjónvarpinu hér í den! Hef aldrei openberað þetta fyrr en nú, en er stoltur að mínu hlutverki þar. Börn eru það dásamlegasta sem til er. 

[Jens Guð, 29.7.2021 kl. 11:02]

Bjarni (# 7),  mikið er ég "heppinn";  upplfiði aldrei áföll af neinu tagi sem barn. 

[Jens Guð, 29.7.2021 kl. 11:03]

Sigurður I B,  takk fyrir "skúbbið".  Svo sannarlega eru börn það besta sem til er.