Höfrungar til vandræða

 

 

 

 

 

 

 

 Á dögunum rákust færeyskir smábátaeigendur á höfrungavöðu.  Þeir giskuðu á að um væri að ræða 200 kvikindi.  Það er ágætis magn af ljúffengu kjöti.  Þeir ákváðu að smala kjötinu inn í Skálafjörð.  Hann er lengstur færeyskra fjarða,  14,5 km.  Allt gekk vel.  Nema að höfrungunum fjölgaði á leiðinni.  Að auki varð misbrestur á að að láta rétta menn í landi vita af tíðindunum.  Fyrir bragðið mættu fáir til leiks.  Þess vegna lenti það á örfáum að slátra 1400 dýrum.  Það tók tvo klukkutíma.  Einungis lærðum og útskrifuðum mænustungufræðingum er heimilt að lóga hvölum í Færeyjum.  

  Útlendir Sea Shepherd liðar í Færeyjum notuðu dróna til að senda aðfarirnar út í beinni á netsíðum erlendra fjölmiðla.  Meðal annars BBC. 

  Dýradráp er ekki fögur og aðlaðandi sýn fyrir nútímafólk sem heldur að kjöt og fiskur verði til í matvöruverslunum.  Ég vann í sláturhúsi á Sauðárkróki til margra ára sem unglingur.  Þar rann ekki minna blóð en þegar dýrum er slátrað í Færeyjum (sjá myndina fyrir neðan úr sláturhúsi).

  Ef sláturhús væru glerhús er næsta víst að sömu viðbrögð yrðu við slátrun á svínum, kindum, kjúklingum,  hestum og beljum og eru nú við höfrungadrápinu í Færeyjum. 

  Samt.  Höfrungadrápið var klúður.  Alltof mörg dýr.  Alltof fáir slátrarar.  Þetta var of.  Á venjulegu ári slátra Færeyingum um 600 marsvínum (grind).  Fram til þessa eru skepnurnar reknar 2 - 3 km.  Í þessu tilfelli voru höfrungarnir reknir 50 km.

  Stuðningur færeysks almennings við hvalveiðar hefur hrunið.  Þingmenn tala um endurskoðun á lögum um þær.  Sjávarútvegsfyrirtæki hafa opinberlega mótmælt þeim.  Líka færeyska álfadrottningin Eivör.  Hún er að venju hörð á sínu og hvikar hvergi í ritdeilum um málið.   

  Dráp á höfrungum þykir verra en grindhvaladráp.  Höfrungarnir þykja meira krútt.  Samt hef ég heyrt að höfrungur hafi nauðgað liðsmanni bandaríska drengjabandsins Backstreet Boys.  

 

 

 

 

Athugasemdir

[Sigurður I B Guðmundsson, 18.9.2021 kl. 22:09]

Auðvita er þetta ekki fallegt að sjá. En sinn er siður í landi hverju. 

[Björn. (IP-tala skráð) 19.9.2021 kl. 08:07]

Góður og þarfur pistill Jens,sem sýnir hina hliðina hjá þessum sjómönnum að færa björg í bú.Ég er ansi hræddur um að stórufsa aðgerð gæti farið fyrir brjóstið á mörgum landkrabbanum.

[Sigurður (IP-tala skráð) 19.9.2021 kl. 08:23]

Burtséð frá öllu öðru þá væri ég til í vænan bita af þessu góðmeti. Þetta er varla ljótara en að margveiða sama laxinn.

[Jens Guð, 19.9.2021 kl. 09:07]

Sigurður I B,  dráp er sjaldan fallegt. 

[Jens Guð, 19.9.2021 kl. 09:07]

Björn,  takk fyrir það.

[Jens Guð, 19.9.2021 kl. 09:08]

Sigurður (# 3),  sama segi ég.   

[Jóhann Elíasson, 19.9.2021 kl. 09:14]

Já almenningur virðist ekki alveg gera sér grein fyrir því hvaðan kjötið og fiskurinn sem við borðum kemur.  Best er nú sagan af því að það var mikill "náttúruverndar ayatolli" sem sagði það hátt og snjallt "ÞAÐ ER EKKERT DÝR DREPIÐ FYRIR MIG - ÉG KAUP ALLT MITT KJÖT Í MELABÚÐINNI".  Er það virkilega svo að fólk sé svona "stropað" eða er þetta bara einangrað tilfelli????????????

[Jens Guð, 19.9.2021 kl. 10:22]

Jóhann,  takk fyrir skemmtilegas sögu!

[Stefán (IP-tala skráð) 19.9.2021 kl. 12:23]

Ég styð færeyinga í svona málum sem og öllum öðrum málum, enda er það þjóð sem við íslendingar ættum að hafa sem fyrirmynd á mörgum sviðum. Það að smala smáhvölum inn í firði og slátra er bara eins og þegar við smölum fé í réttir og svo í sláturhús. Öldruðum er hér á landi smalað inn á undirmönnuð öldrunarheimili og gefinn matur sem ekki væri borinn á borð í Alþingishúsinu eða í Ráðhúsi Reykjavíkur. Ég veit að færeyingar koma mun betur fram við aldraða og öryrkja en íslensk stjórnvöld gera. færeyingar sækja sér mat í hafið á heiðarlegan hátt og seilast ekki í vasa almennings til að færa í vasa auðhringja sem hafa fengið fiskimiðin gefins.  

[Ingibjörg Ingadóttir (IP-tala skráð) 19.9.2021 kl. 13:21]

Það eru fráleitar aðfarir að veiða lax/silung og sleppa, það er dýraníð. Menn eiga því aðeins að veiða að ætlunin sé að borða dýrið, nú eða selja það öðrum til matar.

[Jens Guð, 19.9.2021 kl. 14:32]

Stefán,  ég tek undir hvert orð.

[Jens Guð, 19.9.2021 kl. 14:34]

Ingibjörg,  ég kvitta algjörlega undir þetta.

[Ingibjörg Ingadóttir (IP-tala skráð) 19.9.2021 kl. 16:19]

Jens, þú veist kannski að sveitsrfélögin á Austurlandi eiga veiðikvótann á hreindýrin. Á 20.öld, meðan sveitarfélögin voru miklu fleiri og minni, fór lítill hópur úr hverju þeirra á veiðar. Þessir menn höfðu ekki allir neina löngun til að stunda dýraveiðar, en hins vegar langaði þá í peningana sem fengust fyrir kjötið. Ónotaður veiðikvóti er eins og ósóttur happdrættisvinningur. - Ég sagði þeim þá að hægt væri að fá meiri pening með því að selja veiðileyfi, en þeir hristu bara höfuðin. Nú hefur aldeilis sannast að ég hafði rétt fyrir mér.

[Jens Guð, 19.9.2021 kl. 21:17]

Ingibjörg (# 13),  bestu þakkir fyrir fróðleikinn

[FORNLEIFUR, 20.9.2021 kl. 04:30]

Höfrungar á grillið og krabbameinstíðni Færeyinga eykst til muna eftir þennan "happa"feng. Gefðu svo hlekk í höfrunganauðgunina, rúsínuna í pylsuendanum, sem er það eina sem er bitastætt í pistli þínum. Allir vita nú þegar að Færeyingar eru dýraníðingar per exellance. Ef Breivik hefði verið Færeyingur hefði hann borið því við að veiðieðlið hefði komið upp í sér. 

[Jens Guð, 20.9.2021 kl. 18:37]

Fornleifur,  ég hef ekki hlekkinn á Backstreet Boys.  Það var einhver kona - sem ég veit ekki frekari deili á - sem hélt þessu fram við mann sem ég kannast lítillega við.  Sá sagði ættingja mínum tíðindin.  Þetta er slúður byggt á svo ótraustum grunni að alveg eins gæti verið að Backstreet gaurinn hafi nauðgað höfrungi eða einhverjum öðrum. 

[Stefan (IP-tala skráð) 21.9.2021 kl. 13:18]

Er ekki hægt að gera mat ur rostungi ?

[FORNLEIFUR, 21.9.2021 kl. 16:13]

 Stefán, ertu Hornfirðingur? Jens G. ég held að höfrungurinn sé saklaus. Ég trúi öllu upp á Backstreet Boys.

[Stefán (IP-tala skráð) 21.9.2021 kl. 19:20]

Nei FORNLEIFUR, ég er ekki Hornfirðingur, en ég hef komið nokkrum sinnum í þann fallega bæ. Veit bara ekki hvort rostungar eru einhversstaðar nýttir til matar ? Svo má minna á bítlalagið góða I m the Walrus, sem John Lennon setti saman úr þremur ókláruðum lagabútum. Margir telja John vera í rostungsbúningnum á mynd plötuumslags Magical Mystery Tour, en það mun samt vera Paul. Eitthvað sem skiptir auðvitað engu máli, en hver vill svo sem ekki vera rostungur á Hornafirði og láta dekra við sig ?

[Jens Guð, 21.9.2021 kl. 23:15]

Stefán (# 17),  ég er viss um að rostungakjöt er gott - ef það er rétt eldað.

[Jens Guð, 21.9.2021 kl. 23:16]

Fornleifur (# 18),  sammála.

[Jens Guð, 21.9.2021 kl. 23:17]

Stefán (# 19),  eitt besta Bítlalagið. 

[Jóhann Elíasson, 30.9.2021 kl. 15:57]

Þátturinn á Útvarpi Sögu, sem var með þér í dag var alveg meiriháttar góður og allir þættir þar sem þú hefur verið þar, eru góðir og sérstaklega fræðandi.  Nú bíð ég bara eftir næsta þætti.......

[Jens Guð, 30.9.2021 kl. 20:26]

Jóhann,  takk fyrir það.