Gullgrafarar

20.11.2022 | 01:52

&nbsp;

Fólk sem á rosalega marga peninga á við vandamál að etja. Fátækt fólk er laust við það vandamál. Þetta snýst um hvort makinn sé ástfanginn af viðkomandi eða peningahrúgunni. Líkurnar á að síðarnefnda dæmið eigi við eykst með hverju árinu sem munar á aldri parsins.

Þegar bítillinn Paul McCartney tók saman við Heather Mills var hann 26 árum eldri. Hún var á aldur við börn hans. Þau mótmæltu. Töldu hana vera gullgrafara. Hún myndi láta hann barna sig og skilja við hann. Þar með væri hún komin með áskrift að ríflegu meðlagi og vænni sneið af fjármunum hans. Þetta gekk eftir. Hún fékk 50 milljón dollara í vasann (x 144 kr.).

John Lennon og Yoko Ono er flóknara dæmi. Hún var ekki á eftir peningum er hún tók upp á því að sitja um hann. Hún var allt að því eltihrellir (stalker). Hún kemur út auðmannafjölskyldu. Hún var og er framúrstefnu myndlistamaður. Góð í því. En var ekki fræg utan þess fámenna hóps sem aðhylltist avant-garde. John Lennon var farseðill hennar til heimsfrægðar.

Yoko er ekki öll þar sem hún er séð. Þegar henni tókst að ná John frá þáverandi eiginkonu hans og barnsmóður hélt hún því fram að hún þekkti lítið sem ekkert til Bítlanna. Hún væri bara í klassískri músík. Eina manneskjan í New York sem vissi ekkert um Bítlana. Hún var ekki fyrr tekin saman við John en hún fór að dæla frá sér þokkalegum popplögum.

Dæmi um undirferli Yokoar: Hálfblindur John keyrði út í móa. Yoko slasaðist. Hún var rúmföst og gat sig lítið hreyft. Bítlarnir voru að hljóðrita Abbey Road plötuna. John plantaði rúmi handa Yoko í hljóðverið. Þannig gat hann annast hana. Svo gerðist það að John, Paul og Ringo brugðu sér frá. George Harrison var að dunda á annarri hæð hljóðversins. Þar voru skjáir sem sýndu úr öryggismyndavélum í byggingunni. Yoko fattaði það ekki. George sá hana tipla léttfætta þvert yfir hljóðversgólfið og stela frá honum súkkulaðikexi.

Anna Nicoli Smith var bandarísk nektarfyrirsæta. Mjög fögur. 26 ára giftist hún 89 ára gömlum auðmanni. Hann dó. Hún fór í mál við son hans. Krafðist helming arfs. Þá dó hún. Einnig sonur hennar sem var eiturlyfjafíkill.

Rachel Hunt var 21 árs sýningardama er hún giftist hálf fimmtugum breskum söngvara, Rod Stewart. Hann hélt að hann hefði tryggt sig gegn gullgrafara. Það reyndist ekki virka. Rachel náði af honum 35 milljónum dollara.

Svo getur alveg verið að venjulegt blásnautt fólk verði í alvöru ástfangið af vellauðugri manneskju. Peningar skipti þar engu máli.

Meginflokkur: Fjármál | Aukaflokkar: Lífstíll, Menning og listir, Tónlist | Breytt s.d. kl. 02:04 | Facebook

Athugasemdir

John var harðgiftur Cynthiu Powell þegar hann kynntist Yoko árið 1966. Yoko var tvígift og var sjö árum eldri en John. Seinni maður hennar var kvikmyndaframleiðandi, Anthony Cox, en skilnaður þeirra gekk í gegn árið 1969, þremur árum eftir að samband John og Yoko hófst. Svo má minna á það þegar Yoko henti John út af heimili þeirra í Dakota byggingunni í New York árið 1973. Reyndar fer tvennum sögum af því hvað gerðist þarna þegar John flutti til Los Angeles með ritara þeirra hjóna, hinni kínversk ættuðu May Pang. Hin sagan er að John hafi stungið sjálfviljugur af frá Yoko með May, sem var og er sautján árum yngri en Yoko. Þar með hófst hin fræga ,, Lost Weekend ,, sem varði í eitt og hálft ár, eða þar til John og Yoko tóku saman aftur. Yoko og May höfðu ekki hist í þrjátíu ár þegar þær hittust aftur í Reykjavík árið 2003. May giftist síðar upptökustjóranum Tony Visconti sem er frægastur fyrir áratuga samstarf sitt með David Bowie, sem var einn þeirra sem sukkaði með John á Lost Weekend í LA, ásamt t.d. Ringo, Keith Moon, Elton John og Harry Nilsson. Þess má geta að Tony Visconti var áður giftur welsku söngkonuni Mary Hopkin, sem var fyrsti listamaðurinn sem gerði samning við Apple fyrirtæki Bítlanna og er frægust fyrir lagið Those Were the Days, sem Sir Paul tók upp. Lagið fór í efsta sæti vinsældalista í Englandi og næsta smáskífulag Mary, Goodbay náði öðru sæti, en það lag er eftir Paul. Svona var heimurinn þegar allt snerist um Bítlana.

Stefán (IP-tala skráð) 20.11.2022 kl. 10:53

Stefán, takk fyrir fróðleikinn.

Jens Guð, 20.11.2022 kl. 11:35

Heather Mills, nútímaofdekurdrós og gullgrafari, Yoko Ono, flókin listakona, Nicole Smith er tákngervingur fyrir gullgrafara, það væri hægt að skrifa félagsfræðilega bók um efni þessa pistils, samfélagstengingarnar eru svo flóknar og ástæðurnar fyrir ást - eða ekki ást í þessum tilfellum. Áhugavert er að í nútímanum höfum við kvenkyns áhrifavalda sem hafa allt til alls, og skortir ekkert nema þroskann. Þá höfum við karlkyns gullgrafara, gamla og fátæka sem sækjast eftir þeim, eða unga. Þannig að ástin skín í gegnum andstæður og kringumstæðum, en er stundum bara sambúðarsáttmáli og annað býr undir. Eins og þegar leita þurfti feðra og biðja um hönd dætranna, sem oft voru miklu yngri. Það var samkvæmt Biblíuhefð. Þessi pistill vekur margar pælingar. Aðallærdómurinn er að við eigum að reyna að samgleðjast fólki sem nær saman, það er kærleiksríkara viðhorf. Það má samt auðvitað efast um einlægar ástæður.

Ingólfur Sigurðsson, 20.11.2022 kl. 13:10