Jólatiktúrar afa - Annar hluti

  Aðferðir afa við að bjarga ótímabærum jólagjöfum báru ekki alltaf besta kost.  Eitt sinn fékk hann ílangan jólapakka.  Hann bankaði í kassann,  hristi og kreisti.  Hann taldi sig heyra undarleg hljóð úr pakkanum.  Því fastar sem hann bankaði í kassann þeim mun undarlegri voru hljóðin.  Á aðfangadag var afi að springa úr forvitni.  Er hann opnaði pakkann komu í ljós þrjár stórar og glæsilegar jólakúlur.  Þær voru mölbrotnar eftir barsmíðar afa. Afi kenndi Póstinum um.  

  Er ég var 10 - 11 ára fól afi mér það hlutverk að lesa upp úr jólakortum hans.  Sjón hans var ekki nógu góð.  Ég snéri út úr textanum.  Það var sama hvað ég "las" undarlegan texta;  afi trúði öllu.     

  Af einu korti þóttist ég lesa:  "Við óskum þér með hálfum huga farsæls komandi árs."

  Afa var hvergi brugðið.  Hann útskýrði:  "Þarna er Fríðu rétt lýst.  Hún er svo mislynd.  Skelfilega mislynd."

  Úr öðru korti las ég":  "Farsælt komandi ár en þökkum ekki fyrir liðið."  Afi útskýrði:  "Þetta er Jón sonur þeirra sem skrifar þetta.  Honum er strítt í skólanum.  Þess vegna lætur hann svona."  

Athugasemdir

[Sigurður I B Guðmundsson, 17.12.2023 kl. 12:11]

Afi minn þóttist oft ekki heyra hvað var sagt við hann t.d. Það er kominn matur. Þá sagði hann: Næ því ekki. Þó svo að viðkomandi hækkaði róminn kom hjá honum: Næ því ekki. En ef hvíslað var: Má ekki gefa þér einn koníak fyrir mat? Þá náði hann því!!

[Jens Guð, 17.12.2023 kl. 13:32]

Sigurður I B,  takk fyrir skemmtilega sögu!

[Bjarni (IP-tala skráð) 17.12.2023 kl. 20:08]

Jólalagið sem var aldrei jólalag, heldur rifrildi hjóna sem áttu ekki samleið.

Fyllbyttan Shane Macgowan á meira sér til ágætis en þetta eina lag.

[Jens Guð, 18.12.2023 kl. 09:44]

Bjarni, Shane var snilld!  Hann samdi þetta sem jólalag,  skv wiki.

[Jóhann Elíasson, 18.12.2023 kl. 13:40]

Sigurður I.B, afi þinn hefur verið með svokallaða "HENTIHEYRN".................. 

[Sigurður I B Guðmundsson, 18.12.2023 kl. 16:54]

Góður!

[Stefán (IP-tala skráð) 18.12.2023 kl. 17:59]

Það hafa allir átt afa ( sumir reyndar bara látna ) og margir minnast látinna afa með söknuði. Sjálfur er ég svo heppinn að vera orðinn afi. Í dag 18 Desember fagnar sjálfur faðir og fyrirmynd Jack Sparrow 80 ára afmæli. Man reyndar ekki hvort Jack Sparrow átti afkomendur, en fyrirmyndin á allavega fimm afkomendur ( fyrir utan Jack Sparrow ) og fimm afabörn. Þegar hann hefur ekki verið að sinna börnum, barnabörnum eða flækjast um með sjóræningjum, þá hefur hann verið að dunda sér við að semja mörg bestu og frægustu lög rokksins, líklega oftast undir einhverskonar áhrifum - Hann lengi lifi ! 

[Jens Guð, 18.12.2023 kl. 20:52]

Jóhann,  þetta er frábært orð:  Hentiheyrn!

[Jens Guð, 18.12.2023 kl. 20:55]

Stefán,  ég hef ekki séð myndirnar með honum en áttræður Keith er sprækur sem lækur!

[Stefán (IP-tala skráð) 18.12.2023 kl. 23:31]

Það er mikill sprengikraftur í gítarleik og tónlist Keith og typiskt að Reykjanesið sprakk á afmælisdaginn. 

[Jens Guð, 19.12.2023 kl. 08:30]

Stefán (#10),  mikið rétt!