Samanburður á veitingastöðum

 

 - Réttur:  Beikon og egg

 - Staður 1:  Fitjagrill í Njarðvík

 -  Einkunn: ***

  - Verð:  980 krónur

  - Staður 2:  Vitaborgarinn,  Ármúla 7,  Reykjavík

  - Einkunn: **

  - Verð:  850 krónur

  - Staður 3:  Flugterían,  Reykjavíkurflugvelli

  - Einkunn: *

  - Verð:  1150 krónur

  Eðli málsins samkvæmt fær málsverðurinn egg og beikon ekki hærri einkunn en 3 stjörnur af 5 mögulegum.  Þetta er ekki merkilegur matur.  Með þeirri afmörkun fær hann svo gott sem fullt hús,  3 stjörnur,  eins og hann er afgreiddur í Fitjagrilli í Njarðvík:  2 spæld egg,  vænn skammtur af beikonsneiðum,  franskar kartöflur,  2 hálfskornar vel ristaðar fransbrauðssneiðar,  smjör og hrásalat í sósu. 

  Beikonið er steikt þannig að það krullast upp og er stökkt.  Fyrir bragðið sýnist það á disknum vera meira en það er.  Ég geri mér ekki grein fyrir því hvort beikonsneiðarnar eru 10 eða 12.  Þær vefjast saman í benduflóka.  Franskar kartöflur eru ekki merkilegur matur en passa þokkalega vel með eggi og beikoni.  Það er alveg nóg að hafa þessar 2 hálfskornu brauðsneiðar með.  Það léttir á sterkju beikonsins að fá hrásalatið með.

  Í Vitaborgaranum eru beikonsneiðarnar 12 steiktar þannig að þær eru mjúkar (ekki uppkrullaðar).  Spældu eggin eru 2,  ristaðar hálfskornar og þokkalega ristaðar brauðsneiðar 4 með smjöri og 2 sneiðar af skornum tómati. 

  Í Flugteríunni eru hálfskornu brauðsneiðarnar sömuleiðis 4 og illa ristaðar.  Ekkert smjör.  Beikonsneiðarnar eru 7 og temmilega steiktar mjúkar.  Tvö spæld egg.  Þessi skammtur jaðrar við að vera okur.  Í flugteríunni á Akureyri er ekki boðið upp á egg og beikon en mér virðist sem þar sé verðlag gegnum gangandi um 30% lægra en í flugteríunni í Reykjavík.  Og margt á Akureyri áhugaverðara.  Svo sem pönnukökur,  rosalega góðar og matmiklar kjötlokur og rúgbrauð með reyktum laxi.     

Athugasemdir

[S. Lúther Gestsson, 13.11.2008 kl. 00:10]

Ég er farinn að hafa verulegar áhyggjur af matarræðinu hjá þér.

[Magnús Geir Guðmundsson, 13.11.2008 kl. 00:32]

Mikill er nú heiður minn að koma í kjölfar þessara tveggja miklu grínista hér að ofan, fer bara hjá mér!

En lyfti nú aðeins brúnum yfir þessum skemmtilega samanbuðri félagi Jens, hef aldrei á minni löngu ævi upplifað að borða franskar með egginu og svínafleskinu!Hef reyndar ekki látið hið síðasttalda inn fyrir mínar varir í mörg herrans ár, kann mun betur að meta eggið með góðu hangiáleggi eða skinku.En þá helst heima hjá mér, hef held ég aldrei keypt mér spælt egg nema einu sinni í kóngsins Köbenhavn, í útisjoppu! Kalt með brauði og þykkri skinku, eiginlega svona einhvers lags smurbrauðsdæmi, ef hægt er að kalla það slíkt. Snæddi svo sneiðina með vænum vatnssopa af himnum ofan, gerði þennan svaka skúr á meðan snætt var!

Þú verður brátt gerður að sérstökum áróðursmeistara fyrir Akureyri með þessu áframhaldi hehe, en satt segir þú annars, rosalegt verðlag er þetta!

[Jens Guð, 13.11.2008 kl. 01:29]

Örn,  jú,  ég er að grínast.  En öllu gríni fylgir dramantísk alvara.

  Sigurður Lúther,  fátt passar betur með fylleríi en egg og beikon.  Bæði á meðan á fylleríi stendur og ekki síður daginn eftir.

  Maggi,  ég get með góðri samvisku mælt með Flugteríunni á Akureyri.  Að vísu er verðlagið á bjórnum þar í hærra lagi.  Annað er hinsvegar þar á góðu verði og í háum gæðaflokki.  Kemur jafnvel vel út í samanburði við bestu flugteríur erlendis. 

[Pálmi Óskarsson (IP-tala skráð) 13.11.2008 kl. 01:51]

Maturinn á flugteríunni í Reykjavík hefur verið 30-50% dýrari en annarstaðar og fjörutí frósent dýrari en á Akureyri. Það má með sanni segja að þetta er okurbúlla, en ekki nóg með það bæði matur og kaffi eru virkilega vont. Ótrúlegt að Flugfélagið grípi ekki inn í taumana. Mér er kunnugt að Flugterían hefur verið á lista hjá neitendasamtökunum fyrir okur. Sleppum bara að versla þar.