Hér er myndband af meintu lögregluofbeldinu

  Lögreglumaðurinn hefur verið ákærður fyrir að beita óþarflega miklu harðræði við að hemja 15 ára stelpu.  Hann kannast ekki við að vera sekur um neitt slíkt.  Hann krefst þess jafnframt að myndbandið sé ekki notað sem sönnunargagn í þessu máli.  Það sýni kolranga mynd af atburðarásinni.  Raunveruleikinn sé sá að lögreglumennirnir hafi verið í stórhættu vegna framkomu stelpunnar.  Hún hafi stofnað lífi þeirra og limum í stórfellda hættu með því að sparka að þeim skó.  Skórinn straukst meira að segja utan í fótlegg á honum. 

  Lögreglumaðurinn segir að sér hafi verið nauðugur einn kostur að bregðast til sjálfssvarnar áður en stelpunni tækist að limlesta þá báða til frambúðar.  Hann hafi notað sjálfsvarnaraðferð sem ætíð hefur gefist vel:  Kýla í brjóstkassa ofbeldismanneskjunnar,  slengja höfði hennar af alefli utan í vegg,  fylgja því eftir með nokkrum kröftugum hnefahöggum í höfuðið,  skella viðkomandi í gólfið,  dúndra nokkrum kröftugum hnefahöggum til viðbótar í höfuðið,  handjárna ofbeldismanneskjuna og kippa á fætur með því að rífa hana upp á hárinu.  

  Með lögreglumanninum var annar í læri.  Sem ábyrgðarmaður lærlingsins varð lögreglumaðurinn að gera allt sem í hans valdi stóð til að vernda líf og heilsu lærlingsins.  Þar fyrir utan hafi stelpan sýnt af sér framkomu sem benti til að hún bæri ekki tilhlýðilega virðingu fyrir lögreglunni.  Auk þess beitti stelpan grófu andlegu ofbeldi.  Hún sagði hann vera feitan.  Það var sérlega níðingslegt.  Lögreglumaðurinn hefur átt í baráttu við aukakíló. 

  Upphaflega bókaði lögreglumaðurinn stelpuna fyrir bílþjófnað og hrottafengna líkamsárás á sig og lærlinginn.  Þetta með bílþjófnaðinn hefur ekki verið afgreitt (þó atburðurinn hafi átt sér stað í nóvember í fyrra).  Stelpan fullyrðir að hún hafi verið á bíl móður sinnar með fullu leyfi.  Einhverra hluta vegna hefur lögreglumaðurinn dregið til baka kæruna vegna líkamsárásarinnar.  Það vekur furðu vegna þess að vörn hans gengur út á að um nauðuga sjálfsvörn hafi verið að ræða.

  Lögreglumaðurinn hefur áður verið kærður fyrir ónauðsynlegt ofbeldi.  Meðal annars fyrir að skjóta vangefinn mann til bana.  Hingað til hefur honum dugað að bera fyrir sig sjálfsvörn.  Líklegt er talið að það gagnist honum einnig í þessu máli.  Enda hljóðar kæran ekki upp á 1. gráðu ofbeldi.  Ekki heldur upp á 2.  gráðu ofbeldi.  Né heldur upp á 3ju gráðu ofbeldi.  Kæran hljóðar aðeins upp á 4ðu gráðu ofbeldi, sem stendur eiginlega fyrir að harðræði hafi verið á mörkunum.  

Lögreglumenn réðust á 15 ára stúlku

Athugasemdir

[Sverrir Einarsson, 1.3.2009 kl. 16:37]

Auðvitað sýnir myndbandið ekki hvað gerðist. Þeir voru jú bara tveir einir með 15 ára stelpu inni í klefa og hún var n.b. nýbúin að spara af sér skónum í áttina að öðrum þeirra. Auðvitað hefði hún getað stórskaðað þá varanlega til frambúðar.

Hversu heimskir og miklar veimiltítur er ráðnar þarna í lögguna.

Er til annar betri brandari á vefnum í dag?

[Halla Rut , 1.3.2009 kl. 16:38]

Ég hef svo oft spurt mig: Af hverju vill einhver verða lögga?

Jens, hvað ætli það sé í löngunum mans er ræður því að hann vill verða lögga?

[palli (IP-tala skráð) 1.3.2009 kl. 17:38]

lemja fólk og komast upp með það

[Sigurgeir Þór (IP-tala skráð) 1.3.2009 kl. 19:12]

Kannski full gróft hjá löggunum, en stelpan er greinilega að storka þeim.

[jon fannar (IP-tala skráð) 1.3.2009 kl. 19:21]

sigurgeir þór djöfull ertu ruglaður

[Ómar Ingi, 1.3.2009 kl. 19:43]

Spurning er miklu frekar, af hverju vill einhver vernda fólk eins og þig HALLA ?

[vala (IP-tala skráð) 1.3.2009 kl. 20:08]

vá eruði að grínast, þessi maður ætti að vera fangelsaður sjálfur, þetta er bara ung stelpa og hann meðhöndlar hana einsog hún hafi ætlað að stinga hann. einum of !

[doddý, 1.3.2009 kl. 21:00]

svona immitt gerum við á spítalanum þegar sjúklingarnir eru með kjaft. bara berja þá nógu gróflega og best er að hafa aðstoð. það er aldrei of varlega farið þegar svona ruddalýður er annarsvegar, það getur slasað mann og það alvarlega!

spennandi að sjá og heyra hvað hinn nýji frelsari ameríku segir við svona vinnubrögðum.

[Sunna (IP-tala skráð) 1.3.2009 kl. 21:19]

Þetta er alveg ótrúlegt.. Stelpan er ekki að ógna þeim þegar hann ræðst á hana! Ég trúi ekki mínum eigin augum!

[Árni (IP-tala skráð) 1.3.2009 kl. 21:49]

Vantar fleiri svona löggur á Íslandi, þá hringir maður bara í lögguna ef krakkarnir eru með kjaft..  :)

[ELÍAS RÚNAR (IP-tala skráð) 1.3.2009 kl. 23:15]

Árni vandamálið á Íslandi er alltof mikið af svona löggum.

[Hannes, 1.3.2009 kl. 23:17]

Þetta er einum of mikið af því góða. Ofbeldi getur verið nauðsýnlegt en þegar hún var kominn í gólfið þá var hún skaðlaus og ekki þörf á að berja hana frekar.

Ég er ekki hissa á að fólk vilji ekki vera í löggunni í dag.

[Jens Guð, 1.3.2009 kl. 23:21]

  Sverrir,  ég er eiginlega meira hissa á ákæruvaldinu en lögreglumanninum að skilgreina þetta sem einungis 4ðu gráðu ofbeldi.  Við því liggur hámark eins árs fangelsi og líklega aðeins skilorðsbundið.  Reyndar er talið ólíklegt að maðurinn verði sekur fundinn.

  Halla Rut,  margir hafa velt fyrir sér þessari spurningu og leitað svara.  Launin eru lág,  vinnuskilyrði vond,  starfið er hættulegt og illa þokkað.  Niðurstaðan hefur verið sú að það er ekki ein tiltekin manngerð sem sækir í starf lögreglumanns. 

  Sumir hafa blæti fyrir einkennisbúning.  Margir krakkar eiga þá ósk að verða lögga,  slökkviliðsmaður,  flugmaður eða annað fyrirbæri í einkennisbúningi.  Í sumum fjölskyldum gengur lögreglustarfið í erfðir.  Einhverjir lögreglumenn hafa sterka réttlætiskennd og löngun til að vernda aðra.  Einhverjir hafa þörf fyrir að sýna vald,  hefna eineltis frá æskuárum,  fá útrás fyrir ofbeldishneigð og sækja í hasar. 

  Sumir segja að það sé hárfín lína á milli þess að verða lögga eða bófi.  Margir þekktir glæpamenn eiga bróðir,  faðir eða annan náinn ættingja í starfi lögreglumanns.  Ótal dæmi eru um lögreglumenn sem gerast glæpamenn.

  Þó að lögreglumenn séu ekki einsleitur hópur þá er þekkt að samheldni er meiri en í flestum öðrum störfum.  Lögreglumenn "kóa" með hver öðrum og geta gengið langt til að verja glæpi vinnufélaga sinna.            

[Jens Guð, 1.3.2009 kl. 23:29]

  Palli,  ef ákæruvaldið hefði ekki komist yfir myndbandið er klárt að stelpan sæti uppi með ákæru fyrir að hafa beitt lögreglumennina ofbeldi.

  Sigurgeir Þór,  ertu að meina að það sé réttlætanlegt af lögreglumönnum að ráðast á 15 ára stelpu sem storkar þeim;  höggin hafi hinsvegar orðið aðeins of mörg?

[Jens Guð, 1.3.2009 kl. 23:37]

  Jón Fannar,  það er til fullt af fólki sem þykir réttlætanlegt að lögreglumenn lemji 15 ára krakka sem storkar þeim. 

  Ómar,  í öllum löndum heims starfar lögregla.  Held ég.  Fólk virðist því vilja hafa löggu,  sér til verndar.  Svo kvikna spurningar þegar horft er á myndband eins og þetta í færslunni:  Eru lögreglumennirnir að vernda 15 ára stelpuna með þessari aðferð? 

[Stefán (IP-tala skráð) 2.3.2009 kl. 09:41]

Dabbi og Geir harðneita að biðja íslensku þjóðina og umheiminn afsökunar á langvarandi frjálshyggjuofbeldi, sem þó á eftir að vara lengi. Það versta er að sumum þykir það svo gott að þeir ætla að kjósa kvalara sína aftur.  

[Þór (IP-tala skráð) 2.3.2009 kl. 13:33]

Stefán:  Þrælslundin er sumum svo í blóð borin að klárinn leitar þangað sem hann er kvaldastur.

[Stefán (IP-tala skráð) 2.3.2009 kl. 13:53]

Satt segir þú Þór og samt eru klárar klárlega klárari en margir kjósendur Sjálfstæðisflokksins.

[Siggi Lee Lewis, 2.3.2009 kl. 19:25]

Eins gott að löggimann er ekki íslenskur í aðra ættina. Þá hefði stúlkan fengið piparúða yfir sig alla ofan á allt!

[Jens Guð, 2.3.2009 kl. 22:03]

  Vala,  ég sé þetta sem stæðilegir fullorðnir menn séu að misþyrma barni.  Þetta myndband fór á netið í gær og hefur farið um eins og stormsveipur.  Fólki er mismoðið.  Ekki bara út af því sem sést á myndbandinu heldur einnig því hvað ákæruvaldið virðist ætla að afgreiða þetta mildilega.  Í Bandaríkjunum er bent á að lögreglumennirnir séu hvítir en stelpan svört.  Sumir vilja meina að það skýri framkomu lögregluþjónanna við krakkann og skýri ennþá betur hvað ákæruvaldið metur þetta vera lítið ofbeldi. 

  Doddý,  ég er viss um að Hussein,  nýkrýndur konungur Bandaríkjanna,  er ekki hrifinn af svona.  Hann er einmitt rétt í þessu að banna pyntingar á föngum.  Sérstaklega tiltekur hann að vatnspyntingar Bandaríkjahers verði réttilega skilgreindar pyntingar.  Brúskur, Rumsfield og því liði til sárrar gremju.  Vatnspyntingar voru í sérstöku uppáhaldi hjá þeim kumpánum. 

[Jens Guð, 2.3.2009 kl. 22:13]

  Sunna,  það er dálítið bíræfið af lögreglumanninum að telja þá félaga hafa verið í lífshættu vegna þess að stelpan sparkaði skó að þeim.  Það sést greinilega á myndbandinu að skónum er ekki sparkað af krafti.  Stelpan segist hafa verið að mótmæla óréttmætri handtöku sinni á táknrænan hátt.  Með þessari aðferð sem nú virðist vera algeng:  Að senda skó til að þeim sem verið er að mótmæla.  Það hafi alls ekki verið tilgangur að meiða og ennþá síður að slasa neinn.

     Árni,  það er spurning hvað langt á að ganga í að nota lögguna sem Grýlu á krakka.

[Jens Guð, 2.3.2009 kl. 22:17]

  Elías Rúnar,  þegar upp er stað held ég að það sé betra að svona lögreglumenn séu betur settir í annarri vinnu.

  Hannes,  þú ert á öndverðri skoðun við Ghandí sem hélt því fram að það væri alltaf hægt að ná betri árangri með ofbeldislausri aðferð.

[Jens Guð, 2.3.2009 kl. 22:20]

  Stefán og Þór,  það er sitthvað til í þessu hjá ykkur.

  Siggi Lee,  já,  myndbandið bendir til þess að lögregluþjónninn sé ekki af íslenskum ættum.  Ekkert gas og enginn piparúði.

[Hannes, 2.3.2009 kl. 22:24]

Jens vandamálið er að margt fólk skilur ekki neitt annað en ofbeldi og hörku og ef þú svara ekki líku líkt þá verður valtað yfir þig. Þetta hef ég lært erfiðu leiðina.

[Jens Guð, 2.3.2009 kl. 22:55]

  Hannes,  ég treysti mér varla í heimspekilega umræðu um ofbeldi.  Það sem einn skilgreinir ofbeldi undir einhverjum kringumstæðum getur annar skilgreint sem eitthvað annað.  Á mínum æsku- og unglingsárum og rúmlega það slógumst við strákarnir oft og iðulega.  Jafnvel daglega árum saman.  Strákar slást og hafa oft allir gaman af í aðra röndina.  Sú stemmning nær eitthvað fram á fullorðinsár.  Mér þótti rosalega gaman að slagsmálum.  En ekki öllum sem ég slóst við.  Að minnsta kosti ekki uppfyrir tiltekin mörk.  Þetta er líka spurning um það hvenær áflog eru orðin ofbeldi fremur en slagsmál.

  Fyrir mörgum árum voru Jón Baldvin og Jón Múli Árnason í sjónvarpsþætti að ræða um Stalín.  Jón Baldvin vitnaði í að Stalín hafi látið slátra fjölda manns í svokölluðu hreinsunum.  Jón Múli svaraði því til að Stalín hafi talað við þetta lið á því eina tungumáli sem það skildi. 

  Ja.  Veit ekki.  Ég hallast frekar að kenningu Ghandís. 

[doddý, 3.3.2009 kl. 17:25]

 - og hvað myndi lennon segja núna?

en áhugaverð pæling áflog/ofbeldi/slagsmál. kv d

[SKK (IP-tala skráð) 3.3.2009 kl. 18:41]

Dýr slást.  Ég hef séð myndir af því í sjónvarpinu.

[Bragi (IP-tala skráð) 4.3.2009 kl. 01:30]

Minnir mig dáldið á þegar ég sá lögguna rífa slelpu nipur á hárinu í mótmælum.

við létum lögguna samt ekki komast upp með meira.

[Jens Guð, 5.3.2009 kl. 01:48]

  Doddý,  John Lennon var mjög ofbeldisfullur.  Paul McCartney sagði að tilvera hans sem unglings í Liverpool hafi ekki farið framhjá neinum.  Lennon var þessi "bully" sem stöðugt reif kjaft og stofnaði til slagsmála.  Það er almenn skoðun í dag að fráfall fyrsta bassaleikara Bítlanna,  Stu Sutcliffe,  megi rekja til slagsmála sem Lennon efndi til.  Þar voru þeir tveir lamdir í köku.  Lennon hélt áfram að slást við Þjóðverja í Hamborg.  Síðast varð heimsfrægt þegar hann slóst á bar í Bandaríkjunum skömmu áður en hann stimplaði sig úr sviðsljósi um miðjan áttunda áratug.

  Lennon lamdi líka fyrri eiginkonu sína,  Cyntheu.  Yoko fullyrðir á hinn bóginn að hann hafi ekki beitt sig líkamlegu ofbeldi en "næsta bæ" þar við.  Yoko hefur sömuleiðis staðfest að hann "sprakk" í ofsabræði í samskiptum við son þeirra,  Sean Lennon.  Og ótal oft í samskiptum við þá sem spiluðu með honum inn á plötur.  Þess á milli boðaði John Lennon frið og "all you need is love".   

[doddý, 5.3.2009 kl. 22:17]

immit það sem ég hef heyrt. minntist ekki á hann bara óvart. ég man eftir einhverjum viðtalsbút sem sýndi john í hvíta serknum þar sem hann var spurður til hvaða bragða hann tæki ef manneskja ógnaði honum á götu, i would run svaraði snillingurinn  kv d 

[Jens Guð, 6.3.2009 kl. 01:08]

  Doddý,  ég vil taka fram að ég er aðdáandi Bítlanna og Johns Lennons.  Hann var stórkostlegur tónlistarmaður og bráðgáfaður.  Ég hef lesið ótal bækur um Bítlana og John Lennon.  Ég á allar plötur Bítlanna og fyrstu sólóplötur Lennons.  Fyrsta sólóplata hans,  Plastic Ono Band,  er ein besta plata rokksögunnar.  Það hljómar líkt Lennon að segjast hlaupa frá ofbeldi og átökum.  Raunveruleikinn var þó annar.  Það var hann sem ítrekað efndi til slagsmála.  Hann var mjög árásagjarn í orðum og athöfnum.  Engu að síður var hann boðberi friðar og ástúðar.  "Give Peace a Chance" og það allt.  Frábær náungi og ég er aðdáandi hans sem stórkostlegs tónlistarmanns og hugsjónarmanns fyrir ást og frið.

[doddý, 7.3.2009 kl. 12:04]

gjörsimmlega sammála þér um ágæti hans sem tónlistarmanns. ég er samt ekki eins góður fan og þú því ég á bara 6 eða 7 bítl. ég hef lent í ófáum samræðum þar sem fólk hefur eignað paul að ljúga þessu upp á kappann. .. (að öðru) hvenær var ono band gefið út? kv d