Æsipennandi námskeið sem margir hafa beðið eftir!

 

  Að undanförnu hefur stöðugt vaxandi þrýstingur verið á mig um að hrinda úr vör þessu námskeiði.  Fólk hefur suðað og sárbænt.  Ég hef hugsað málið,  velt fyrir mér og skoðað hvernig best verður að því staðið.  Nú kýli ég á það og býð upp á þriggja vikna námskeið í notkun öryggisbelta í bifreiðum.  Námskeiðið heitir Öryggisbelti öryggisins vegna!

  Námskeiðið fer fram á milli klukkan 23:30 og 23:45 á hverjum fimmtudegi allar þrjár vikurnar.  Þátttakendur þurfa ekki að hafa með sér neitt annað en framsæti úr bíl, öryggisbelti og beittan vasahníf.  Allt annað (veitingar,  þ.e.a.s. brjóstsykur) er innifalið í vægu námskeiðsgjaldi,  kr. 49.999,  sem er innan við 17.000 kall á viku,  vel að merkja.  Hámarks fjöldi á hvert námskeið er 150 manns.

  Fyrstu vikuna verður farið yfir algengustu mistök sem fólk gerir þegar það festir á sig öryggisbelti.  Einnig verður kennt hvernig best er að bera sig að ef maður er að skella með andlitið á gangstétt eða malbik þegar farið er út úr bíl og fætur hafa flækst í öryggisbeltinu.  Til viðbótar er kennd einföld aðferð til að losa sig úr öryggisbelti sem maður er flæktur í inni í bílnum.  Þar kemur vasahnífurinn til góða.   

  Aðra vikuna verður sagt frá uppruna öryggisbeltisins og þróun,  samkvæmt áreiðanlegustu heimildum Wikipedia.  Þriðju vikuna verður kynnt sumartískan í öryggisbeltum og kennd stutt vögguvísa um öryggisbelti.  Í lok námskeiðs fá allir þátttakendur (nema þeir sem verða með leiðindi) staðfestingaskjal um þátttöku sína (diplóma).

  Mjög líklegt er að heilbrigðisráðuneytið niðurgreiði námskeiðið að hluta eða fullu ef þátttakendur verða duglegir að þrýsta á um það.  Gott er þá að benda á að haldgóð þekking á öryggisbeltum geti sparað heilbrigðiskerfinu gífurlega háar upphæðir til lengri tíma litið.  Hver kannast ekki við að hafa þurft að leita á slysavarðstofu eftir illskeytta viðureign við öryggisbelti?

  Þátttakendur á þessu námskeiði sitja fyrir í skráningu á spennandi framhaldsnámskeið.  Á framhaldsnámskeiðinu verður kennt á öryggisbelti í flugvélum.

  Ökumaður þessa bíls flæktist í öryggisbeltinu um leið og hann stökk út úr bílnum.  Við það fældist hann.  Áður en honum tókst að róa sig niður hafði hann gengið í skrokk á skemmtibát,  sumarbústað og fleiru.  Hann er að drepast í öðrum fætinum síðan og haltrar lítillega.

Athugasemdir

[Ari (IP-tala skráð) 30.3.2009 kl. 23:48]

Ég nota ekki öryggisbelti. En gangi þér samt vel með þetta.

Ferðu annars til Fjáreyja í sumar?

[Jóna Kolbrún Garðarsdóttir, 31.3.2009 kl. 00:42]

  Ég ætti kannski að bóka mig á námskeiðið, þar sem ég nota yfirleitt ekki öryggisbelti. 

[Jens Guð, 31.3.2009 kl. 01:00]

  Ari,  notar þú ekki einu sinni öryggisbelti við ölvunarakstur?

  Íslendingar eru námskeiðsóðir.  Þeir borga tugi þúsunda fyrir sjálfshjálparnámskeið sem ganga út á lemja blautu handklæði í gólfið (til að fá útrás fyrir reiði) kvöld eftir kvöld,  svitna í myrkvuðu tjaldi þangað til þeir sjá fyrir hugskotssjónum buffalóhjörð og nýjasta æðið er að láta taka úr sér nokkra blóðdropa sem blásið á er með ósoni og sprautað aftur í viðkomandi.  Að ógleymdum tarotlestri,  rúnalestri,  jógadansi og blómadropum þar sem blómin sjálf hafa útlistað fyrir næmu fólki sérfræðiþekkingu sinni á kvíða,  húðsjúkdómum og fyrirtíðarspennu. 

  Undanfarin 10 ár eða svo hef ég árlega farið til Fjáreyja tvisvar og þrisvar á ári.  Nú er færeyska krónan ansi óhagstæð - þó ég eigi slatta af henni inni á færeyskri bankabók.  Í ár verður ekki Atlantic Music Event né færeyskar "Músíktilraunir" (Prix Föroyar).  Ég er ennþá að gæla við G!Festival í lok júlí.  Hingað til hef ég alltaf farið til Fjáreyja sem boðsgestur einhvers músíkfyrirbæris.  Ég hef aldrei sóst eftir því að fyrra bragði.  Þetta hefur alltaf komið upp í hendur mér með stuttum fyrirvara og óvænt.  Ef ég fer ekki til Fjáreyja í ár verður það undantekning á venju.  Ég reikna samt með - fremur en hitt - að mér verði boðið á G!Festival.  Annars verð ég næstum því móðgaður.  Þó ég móðgist annars aldrei út í Fjáreyinga.

[Jens Guð, 31.3.2009 kl. 01:02]

  Jóna mín kæra,  þú verður boðsgestur.

[Hannes, 31.3.2009 kl. 01:08]

Jens þetta er góð hugmynd hjá þér. Veistu hvar ég get fengið svona kellingarbelti eins og er á myndinni það væri nefnilega ágætt fyrir pyntingarvélarnar? Held að ég noti peninginn í annað en svona námskeið enda hef ég litla trú á þeim og nota bara belti af því að lögin segja það.

[Hilmar Gunnlaugsson, 31.3.2009 kl. 01:13]

Það verður ekki lágt tímakaupið hjá þér Jens.

[Jens Guð, 31.3.2009 kl. 01:44]

  Hannes,  ég mun að sjálfsögðu kenna þessa einföldu aðferð til að þagga niður í ferðafélögum.  Þetta er ekki pyntingaraðferð heldur aðferð til að bílstjórinn geti einbeitt sér að akstri. 

[Hannes, 31.3.2009 kl. 01:47]

Jens ég var ekki að tala um að þetta væri pyntingarvél heldur að þetta væri góð leið til að fá pyntingarvélar (konur) til að halda kjafti.

[Jens Guð, 31.3.2009 kl. 01:53]

  Hilmar,  þeir sem sitja nú í skilanefnd varðandi bankahrunið fá 15.000 kall á tímann.  Það er mér kappsmál að trompa þá.  Hannes Hólmsteinn hefur sjálfur sagt að fégræðgi sé driffjöður hagsældar fyrir alla.  Molar af hagsældarborði hinna ofurríku muni hrökkva niður til almennigs.  Og allir græða. 

  Alveg á sama hátt og kenning Tryggva Þórs,  gamla pönkarans,  um að með flötum afskriftum á 20% skulda muni enginn tapa en allir græða.  Ég vil trompa þá hagfræði með afskriftum á 30% skulda og þá muni allir græða miklu meira.  Eða 50% til að allir græði miklu miklu meira.

[Jens Guð, 31.3.2009 kl. 01:59]

  Hannes,  vitnum bara í Biblíuna,  orð guðs,  um að konur skuli þegja á fundum.  Þá erum við lausir við röflið í Jóhönnu Sigurðardóttir (álfsins) og Þorgerðar Katrínar (sem aðeins fékk 86% í sjálfkjöri varaformanns án mótframboðs).  Jesú Kristur Oddson kaus hana ekki.

[Stefán (IP-tala skráð) 31.3.2009 kl. 09:08]

Endilega bloggaðu um það sem formaður þinn, Guðjón Arnar er að segja um að Sjálfstæðisflokkurinn sé að múta mönnum frá Frjálslynda Flokknum yfir í Sjálfstæðisflokkinn, samanber t.d.  Gunnar Örlygsson og Jón Magnússon. Ef Frjálslyndi Flokkurinn vill halda lífi, þá verða talsmenn hans að stilla Sjálfstæðisflokknum upp sem sínum höfuðandstæðingi. 

[Ásthildur Cesil Þórðardóttir, 31.3.2009 kl. 10:31]

Hahahaha

[Jenný Anna Baldursdóttir, 31.3.2009 kl. 11:28]

Jens þú ert svo skemmtilega bilaður.

[Sverrir Einarsson, 31.3.2009 kl. 11:34]

Fyrst Jóna er boðsgestur þá fer ég fram á að vera heiðursgestur.

Iss lítið tímakaup uppúr þessu að hafa þegar búið er að draga frá allan útlagðan og Óútlagðan kostnað. Síðan getur þú auðvitað hækkað "gúddvillið" og þar með eigið fé apparatsins og fengið trúlega einhverja milljarða lánaða til að kaupa hlutabréf  fyrirtækinu sem er orðið voða verðmætt sbr. Sterling. færð svo einhvern til að kaupa þetta á XXX.... milljarða og ert þar með kominn með eilífðar legupláss á Tortilla eða Kolbeinsey. Verst verður þá fyrir kaupandann að fjölga námskeiðum því allir áhugasamir mættu á fyrstu þrjú námskeiðin (sem þú getur bent á að hafi verið full bókuð).

þar með ertu kominn í milljarða skuldaeigendahópinn, mínus vask. búsettur á Tortilla eða Kolbeinsey.

[Jens Guð, 31.3.2009 kl. 14:52]

  Stefán,  ég á eftir að lesa þessi ummæli Guðjóns Arnars.  En sjálfsagt að vekja athygli á þeim og taka um leið undir með öðrum flokkum sem hafa útilokað stjórnarsamstarf með Sjálfstæðisflokknum eftir kosningar.

[Jens Guð, 31.3.2009 kl. 14:53]

  Ásthildur,  takk fyrir innlitið.

[Jens Guð, 31.3.2009 kl. 14:55]

  Jenný,  það undarlega við þetta er að ég fór snemma að sofa í gærkvöldi.  Held ég.  Svo bara vaknaði ég rétt áðan og sá þá þessa færslu um námskeiðið.  Ég hafði ekki hugmynd um þetta.

[Jens Guð, 31.3.2009 kl. 14:56]

  Sverrir,  þetta hljómar svaka vel hjá þér.  Þú verður heiðursgestur!

[Gunnsi (IP-tala skráð) 31.3.2009 kl. 17:10]

Ég hef aldrei skilið þær mannvitsbrekkur sem taka beltið og halda því föstu við spennuna án þess þó að spenna beltið. Hver er hugmyndafræðin þar að baki? Ég hef margoft séð fólk gera þetta og aldrei geta menn svarað fyrir gjörninginn. Maður fær í mesta lagi svör á borð við: "Nú sér löggan ekki að ég er ekki með spennt beltið!"

Mér sýnist þetta töluvert meira vesen en að festa bara helvítis beltið.

[Þór (IP-tala skráð) 31.3.2009 kl. 17:37]

Það þarf líka námskeið um buxnabelti.  Fólk er alltaf að klúðra því.

[Jens Guð, 31.3.2009 kl. 21:38]

  Gunnsi,  þetta er góður punktur.  Ég hef aldrei orðið var við svona hegðun en þetta fólk heldur greinilega að öryggisbeltin séu fyrst og fremst eitthvað fyrir lögguna að fylgjast með en ekki öryggisbúnaður fyrir sjálfa sig.  Þetta er eiginlega sprenghlægilegt uppátæki og hlýtur að vera truflandi að vera með aðra hönd á beltinu. 

[Jens Guð, 31.3.2009 kl. 21:40]

  Þór,  ég kannast við svona fólk.  Það er alltaf að missa buxurnar niður um sig.  Þetta kallast að vera lausgirtur.

[Árni Gunnarsson, 31.3.2009 kl. 22:03]

Ég bíð spenntur eftir þriðja tilboðinu Stefán. Ég er viss um að það kemur en annars er ég nú bara nokkuð sáttur við þetta seinna. Ótrúlegt frá hvaða flokki það kom!

Er þetta námskeið ekki fyrir byrjendur Jens?

[Jens Guð, 31.3.2009 kl. 23:15]

  Árni,  þú mættir ekki á kjördæmafélagsfundinn í kvöld.  Fjarvera þín olli vonbrigðum. 

  Námskeiðið er opið fyrir alla:  Byrjendur jafnt sem lengra komna.

[Siggi Lee Lewis, 1.4.2009 kl. 17:49]

Er boðið upp á majones á þessu námskeiði?

[Hannes, 1.4.2009 kl. 19:56]

Jens af hverju kemurðu ekki með námskeið um hvernig ég get fittað tengdamömmusæti í bíllinn?