Verðsamanburður á skötuveislum

  Í dag og á morgun snæða flestir kæsta skötu í öll mál.  Það er góður og hollur siður nú á sólstöðum og hátíð ljóssins;  þegar við fögnum hækkandi sól.  Fjöldi veitingastaða býður upp á skötuveislu,  ýmist í dag eða morgun eða báða dagana.  Ég hef tekið saman verðið hjá þeim veitingastöðum sem ég sæki á þessum tíma ársins.  Sumir þeirra hafa verið með skötuna á boðstólum í nokkra daga.  Svona er listinn:

Sægreifinn  við Reykjavíkurhöfn (Geirsgötu)  1700 kr.

Hafberg, Gnoðavogi  1890 kr.

Sjávarbarinn,  Grandagarði  2400 kr.

Catalína,  Hamraborg  2700 kr.

Múlakaffi  2950 kr.

Skútan,  Hólshrauni,  Hafnarfirði  3000 kr.

Lionsklúbbur Kópavogs  og Coctail veisluþjónusta Auðbrekku (Lundur)  3500 kr.

Turninn, Kópavogi  3500 kr.

Kringlukráin  3950 kr. 

Grand Hótel  4400 kr.

.

  Fljótt og gott á Umferðamiðstöðinni býður upp á skötu á morgun.  Síðast þegar ég vissi var ekki búið að ákveða verðið en skotið á að það yrði á bilinu 2500 - 2700 kr.  Potturinn og pannan,  Fjörukráin,  Hafið Hlíðarsmára, og Gallerí fiskur bjóða einnig upp á skötuveislu.  Ég hef ekki kíkt til þeirra í ár og veit því ekki verðið.  Þau eru heldur ekki gefin upp á heimasíðum þeirra.  Ef þið vitið verðið þar eða vitið um fleiri staði sem eru með skötuveislu væri gaman að fá þær upplýsingar í pottinn.  Mér og ykkur til gagns.

.

  Það er að sjálfsögðu misjafnt hvað veislan er fjölbreytt og vegleg eftir stöðum.  Glæsilegasta skötuveislan er hjá Sjávarbarnum.  Þar er um alvöru hlaðborð að ræða með margvíslegri útfærslu á skötunni,  auk ýmissa annarra sjávarrétta og meðlæti.

  Þar fyrir utan slær ekkert út skötuveislunni hjá Rannveigu Höskuldsdóttur síðasta laugardag.  Hafi hún bestu þökk fyrir.  Verst að myndavél var fjarri góðu gamni.  Annars hefði verið gaman að sýna ykkur frá fjörinu.

 

Athugasemdir

[Hjóla-Hrönn, 22.12.2009 kl. 11:13]

Takk fyrir þetta Jens, við (ég og vinnufélagarnir) ætlum að flýja mötuneytið á morgun, en þá verður boðið upp á skötu.  Ætluðum á Pottinn og Pönnuna, en erum snarlega hætt við það úr því ilmandi hlandfnykurinn mun líka svífa þar yfir pottum.

[Þorsteinn Árnason (IP-tala skráð) 22.12.2009 kl. 13:22]

Mér dettur í hug einn staður í viðbót: Hlégarður í Mosó.

Takk fyrir síðast hjá Rannveigu, það var bara frábært og gerði ekkert til þó myndavélina vantaði. Ss.engar "pervertalegar" myndir Ha...ha.... 

[Jens Guð, 22.12.2009 kl. 21:27]

  Hjóla-Hrönn,  skötulyktin er hressandi.  En vill setjast í föt.

[Jens Guð, 22.12.2009 kl. 21:29]

  Þorsteinn,  takk fyrir síðast.  Það er nú bara gaman að sprella í S. Lúther.  Hann er grallari.  Þar fyrir utan hef ég orðið var við að fólk sem ber kennsl á gesti í veislum Rannveigar þykir gaman að sjá myndir af veisluhöldunum.

  Ég fletti upp á heimasíðu Hlégarðs.  Þar er ekkert um skötuveislu.