Kvikmyndarumsögn

- Titill:  Precious

- Leikarar:  Mariah Carey,  Lenny Kravitz o.fl.

- Kvikmyndahús:  Háskólabíó

- Einkunn: **** (af 5)

.

  Það veit ekki á gott þegar Oprah Winfrey stendur á bak við kvikmynd.  Að minnsta kosti ef tekið er mið af drepleiðinlegum sjónvarpsþáttum hennar.  Í tilfelli myndarinnar  Precious  er aðkoma Opruh samt í fínu lagi.

  Sögusviðið er Harlem í New York.  Ég hef aldrei þorað í það fátækrahverfi,  fremur en svo margir aðrir bleiknefjar.  Harlem er heldur engin Paradís fyrir blökkumennina sem þar búa.  Eiginlega mannfjandsamlegt hverfi um flest.

  Precious er 16 ára blökkustúlka sem þekkir ekki annað líf en mótlæti ofan á mótlæti.  Hún er ólétt í annað sinn eftir barnaníðinginn föður sinn.  Mamma hennar er fáfróð,  heimsk,  bitur,  ofbeldisfull,  sjálfselsk og illgjörn.  Eins og gengur.  

  Einkunnir Precious í skóla eru fínar þó hún kunni hvorki að lesa né skrifa.  Ég hef aldrei áttað mig á því hvers vegna svona algengt er að nemendur í grunnskóla í Bandaríkjunum fara ólæsir í gegnum skólakerfið með ágætar einkunnir.  

  Precious er í góðri yfirvigt.  Hana dreymir um að vera grönn og hvít.  Eða í það minnsta eignast hvítan eiginmann.  Eða þá að verða vinsæl og dáð eins og hún er.

  Happ hennar í allri óhamingjunni er að hrökklast úr skólanum sínum yfir í annan skóla.  Þar kynnist hún kennara (og samnemendum) sem reynast henni vel.  En vandamálin eru engu að síður mörg.

  Þessi mynd er drama í bland við ýmis skondin atvik.  Það fyndnasta er þegar Precious pantar sér á skyndibitastað fötu með 10 djúpsteiktum kjúklingabitum.  Hún á ekki aur og hleypur í burt með fötuna.  Og gleypir í sig bitana á flóttanum.  

  Mariah Carey og Lenny Kravitz eru ágæt og sannfærandi í sínum hlutverkum. Aðrir leikarar eru ennþá betri.  Ekki síst þær sem leika Precious og mömmu hennar.

  Þetta er góð mynd sem vekur til umhugsunar.

.

  www.aflidak.is

  www.stigamot.is   

    

Athugasemdir

[Ómar Ingi, 7.3.2010 kl. 00:05]

Ekki síst þær sem leika Precious og mömmu hennar.

Já Monique vinnur óskarinn sem mamma hennar lofa

http://ommi.blog.is/blog/ommi/entry/1027070/

Spá um óskarinn þetta árið

[Jens Guð, 7.3.2010 kl. 01:15]

  Ómar Ingi,  ég hef ekki sömu þekkingu og þú eða jafn gott yfirlit á stöðuna.  Þess vegna þori ég ekki að spá.  En ég verð alveg sáttur ef "mamman" fær óskar.  Hún er sannfærandi og flott í sínu hlutverki.

[Siggi Lee Lewis, 7.3.2010 kl. 04:02]

Þessi leikkona er gull! Sá hana í Jay Leno springa úr spiki.

Það háir henni ekki. Hún er leikkona af guðsnáð og gott betur en það!

[sæunn (IP-tala skráð) 8.3.2010 kl. 00:57]

þessi unga stulka sem er með aðalhlutverkið er snillingur eh svo ekta dj...gaman að sjá ekki eh gelluna klædda í fitubúning. og gott að þetta er fyndin mynd lika sammála þer leist ekkert á eh dramavæl frá opruh

[Kristín Björg Þorsteinsdóttir, 8.3.2010 kl. 12:54]

Það fór rosalega í taugarnar á mér þegar Charlize Therone var gerð "ljót og feit" og hlaut óskarinn fyrir. Í þessari mynd er einmitt frábær leikkona í yfirvigt. Þessi mynd er eiginlega hrollvekja. Allavega var ég fegin að það vorum við foreldrar 14 ára unglingsins sem vorum með henni á bíó.