Mikilvægt að vita

  Randaflugur eru einhver krúttlegustu skordýr sem maður rekst á.  Eða öllu heldur eru það randaflugurnar sem rekast á mann.  Búkurinn á þeim er eins og þykkur loðinn hnoðri.  Vængirnir virðast vera alltof litlir til að bera stóran búkinn.  En það vita randaflugur ekki og fljúga á þrjóskunni einni.

  Fyrir tveimur dögum flaug stór og pattaraleg randafluga inn um glugga hjá mér.  Henni þótti gaman að skoða margt.  Hún hafði aldrei séð tölvu áður.  Sitthvað fleira þótti henni nýlunda og spennandi. 

  Ég reyndi að kenna henni á tölvu.  En skilningsleysi randaflugunnar var þess eðlis að mér er til efa að hún muni nokkurn tíma ná tökum á tölvum.  Að minnsta kosti mun hún aldrei skara fram úr á því sviði. 

  Aðra og miklu merkilegri uppgötvun gerði ég.  Eins og þið vitið þá þykir hundum og köttum gott að vera klappað frá hnakka og aftur á bak.  Þetta þykir randaflugunni aftur á móti ekki gott.  Jafnvel frekar óþægilegt.  En þegar henni er klappað í hina áttina,  frá baki og fram á höfuð,  þá kemur annað hljóð í strokkinn.  Þá jaðrar við að flugan mali eða eiginlega eins og kumri.  Þetta er mikilvægt að vita.

Athugasemdir

[Ragnheiður Arna Magnúsdóttir (IP-tala skráð) 7.9.2010 kl. 10:13]

Ég komst að því fyrir allmörgum árum að Randaflugur geta stungið - mjög fast!

Flaug ein inn um gluggann þegar ég var í bíl, datt niður í sætið og þegar ég ætlaði að stíga út úr bílnum þá fékk ég góða stungu í hægri rasskinnina.

Hef alltaf passað mig á þessum hlussum eftir þetta....

[Jens Guð, 7.9.2010 kl. 15:01]

  Ragnheiður,  ég hef heyrt þetta:  Að randaflugan eigi til að stinga.  Gott ef hún drepst ekki í kjölfarið.

[Ragnheiður Arna Magnúsdóttir (IP-tala skráð) 7.9.2010 kl. 15:07]

Jamm hún drepst...

[Guðsteinn Haukur Barkarson, 8.9.2010 kl. 12:22]

Ég hef reyndar ekkert um randarflugur að segja, Guð blessi þær, en ég vildi bara benda þér á þetta samkvæmt samtali okkar um daginn. Þetta var ég að tala um.

[AceR, 8.9.2010 kl. 12:26]

Það er óvenjulegt að randafluga/býflugan stingi svona án þess að vera ógnað. Henni hefur kannski ekki líkað akstursmátinn hjá þér, Ragnheiður. ;)

Geitungarnir hinsvegar geta tekið upp á því í lok ágúst og í september að stinga mann fyrir að voga sér að labba framhjá þeim, meðal annars. Og þeir geta stungið oftar en einusinni og drepast ekki við stunguna.

Skaðræðis kvikindi þessir geitungar og líkar mér illa við þá.

Býflugunum hef ég ekkert á móti enda eru þær okkur nauðsynleg í að frjófga hitt og þetta í grænmetisdeildinni m.a

Vona nú að þú hleypir þessari aftur út Jens, þótt þú njótir félagsskaparins :)

kveðja