Merkileg tilviljun...?

 

  Í Fréttablaðinu í dag er skemmtileg frétt af metsölutónlistarmanninum Bubba Morthens.  Á 31 ári hefur hann selt 320 þúsund eintök af sínum plötum.  Þetta er afskaplega merkilegt.  Ólíklegt er að annars staðar í öllum heiminum (að meðtöldum öðrum soul-kerfum.  Tilvisun í nýjustu plötu kóngsins,  hans fyrstu soul-plötu.  Dúndur góða.) sé eða hafi nokkur poppstjarna verið með jafn stóra markaðshlutdeild.

  Um miðjan níunda áratuginn sá ég um nokkur umslög á plötum Bubba og markaðssetningu á þeim.  Þær urðu hver um sig lang söluhæsta plata síns útgáfuárs,  eins og markaðssetningin gekk út á.  Hitt þykir mér merkilegra:  Að þessar sömu plötur raða sér snyrtilega í öll efstu sætin yfir söluhæstu plöturnar á farsælum ferli Bubba:  1.  Dögun  (26.000 eintök),  2.  Frelsi til sölu  (22.000) og  3.  Kona  (20.000).  Skylt er að halda því til haga að Inga Sólveig á grunnhönnunina á  Konu,  ljósmyndina og er fyrirsætan á framhliðinni.

http://www.visir.is/bubbi-hefur-selt-fleiri-en-320-thusund-plotur/article/2011110809145

  Svona geta tilviljanir verið skemmtilegar.  Reyndar er sömu sögu að segja af markaðssetningu á bókum,  skemmtunum og ýmsu öðru sem ég tók að mér á meðan ég var í auglýsingabransanum.  En ekki orð um það meir.  Það gæti hljómað eins og mont af minni hálfu.  Til þess má ég ekki vita. 

Athugasemdir

[Ásdís Sigurðardóttir, 9.8.2011 kl. 11:57]

Maður má alveg monta sig smá

[Ásthildur Cesil Þórðardóttir, 9.8.2011 kl. 12:40]

Ertu viss um að þetta sé tilviljun Jens minn?

[halldór agnarsson (IP-tala skráð) 9.8.2011 kl. 20:41]

Sæl öll.

Þetta er bara vittleisa hjá þér þó að Bubbi sé náttúrulega einstakur. Bítlarnir hafa selt minnst 600 milljón plötur og mest 1 billjón, eftir hvaða heimildir eru notaðar. Bretar eru ekki til nema í ca 60 milljón eintökum. Sjá:

http://en.wikipedia.org/wiki/List_of_best-selling_music_artists

Bestu kveðjur

Druslari

[Valgeir (IP-tala skráð) 9.8.2011 kl. 21:09]

Ekki gleyma þeirri staðreynd að plötur hans komu alltaf (?) út rétt fyrir jól, og ömmur og afar keyptu þær sem gjafir fyrir barnabörnin. Ömmurnar og afarnir vildi ekki kaupa einhverja vitleysu!

Ég á nokkrar plötur og diska (jólagjafir) sem ég hef ekkert að gera við.

[Jens Guð, 9.8.2011 kl. 22:28]

Ásdís,  jú,  smá.  En ekki mikið.  Ég fékk nokkur símtöl í dag frá fjölmiðlum vegna þessa máls.  Og varð að gæta mín á að virka ekki of rogginn.

[Jens Guð, 9.8.2011 kl. 22:31]

  Ásthilur Cesil,  nei,  í raun er þetta ekki beinlínis tilviljun.  Þannig lagað.  En það hjálpar þegar aðstæður eru hagstæðar.  Til að mynda eru þetta góðar plötur og innbyrðis fjölbreyttar.  Það býður upp á tækifæri.

[sæunn guðmundsdóttir (IP-tala skráð) 9.8.2011 kl. 22:43]

enda langflottustu umslögin og ekki er ég hlutdræg :) en þetta væri þá afar merkileg tilviljun!!ef svo væri

[Jens Guð, 9.8.2011 kl. 22:45]

  Halldór,  þarna ertu að bera saman hljómsveit annars vegar og einstakan tónlistarmann hinsvegar.  Í bloggfærslunni er ég að tala um sólóferil Bubba.  Engu að síður:  Bítlarnir hafa selt 1,1 milljarð af sínum plötum á HEIMSMARKAÐI.  Það jafngildir rösklega 1,6% markaðshlutdeild deilt í fjölda jarðarbúa.  Í tilfelli Bubba erum við að tala um að markaðshlutdeild hans er ein plata á hvern Íslending. 

  Ég veit ekki hvað Bítlarnir hafa selt mörg eintök í sínu heimalandi,  Englandi.  Eða Bretlandi.  Kannski eru það 60 milljónir eintaka.  Það kæmi ekki á óvart.  Bítlarnir - sem hljómsveit - eru risaveldi á heimsmælikvarða og einnig í Englandi.  Liðsmenn Bítlanna,  sólóferill þeirra er ekki jafn glæsilegur og sólóferill Bubba.  En samt mjög glæsilegur.

  Í sölutölum yfir plötusölu Bubba eru ekki taldar með plötur með hljómsveitum hans,  svo sem Utangarðsmönnum,  Egóí,  Das Kapítal o.s.frv.  

  Í  

[Jens Guð, 9.8.2011 kl. 22:51]

  Halldór,  ég var heldur fljótur á mér.  Mér láðist að fletta upp á hlekknum sem þú vísar í.  Þar kemur fram að Bítlarnir hafi selt 7,4 milljónir eintaka í Bretlandi.  Sem er langt í frá sama markaðsstaða og Bubba á Íslandi.  Á móti kemur - til að gæta fullrar sanngirni - að Bítlarnir sendu frá sér plötur (LP) í 6 ár en ferill Bubba spannar 31 ár.

[Jens Guð, 9.8.2011 kl. 23:02]

  Valgeir,  þetta er ekki alveg rétt hjá þér.  Bubbi hefur löngum haft þann sið að senda frá sér sólóplötu í júní.  En líka síðar á árinu.  Langflestar íslenskar plötur koma út fyrri part vetrar.  Það hefur ekki háð sölu á plötum Bubba að koma út að sumri eða hvenær sem er.  Né heldur að keppa um sölu í jólaplötuflóðinu þegar slagurinn er vissulega harðastur.  Út af fyrir sig er erfiðara að vinna slaginn í jólaplötuflóðinu vegna mikils framboðs á plötum á þeim árstíma. 

  Þegar ég var í þessum bransa þótti mér auðveldara að markaðssetja plötur utan jólaplötuflóðsins og nota síðan velgengni plötunnar til að gera einnig út á jólagjafadæmið.  

[Jens Guð, 9.8.2011 kl. 23:29]

  Sæunn,  það er ágætt að lauma eftirfarandi að:  Útlit plötuumslags er eitt.  Vissulega er gaman að umslag líti vel út.  Að fólk kunni vel við umslagið.  En það skiptir í sjálfu sér mun minna máli en að umslag komi tiltekinni stemmningu til skila.  Stemmningu sem er hluti af markvissri framsetningu sem gerir út á ómeðvituð viðbrögð kaupenda/hlustenda plötunnar. 

  Það er alltaf gaman að lesa umsögn um plötuumslag og hugleiðingar um það hvort að þetta eða hitt á umslagi sé vel gert.  Hvort að texti "flútti" í réttu hlutfalli út frá fagurfræðilegri uppsetningu eða annað í þeim dúr,  ljósmynd sé "rétt" skorin og svo framvegis.  Þeir hlutir eru skemmtilegar vangaveltur.  Og vel að merkja oftast með réttmætri niðurstöðu.  Svo ég miði við þær umsagnir sem mín umslög hafa fengið.  Ég tek fram að ég er algjörlega sáttur við það sem um þau hefur verið skrifað.  Geri engar athugasemdir og kvitta glaður undir það allt.  Þá er ég helst að vísa til ljómandi góðra og skemmtilegra vangavelta vinar míns,  Bárðar Arnar,  á www.bubbi.is.   

  Til að markaðssetning á plötu nái tilætluðum árangri þarf hinsvegar að hanna heildarpakka sem gerir út á stemmningu tíðarandans og falli inn í markaðssetninguna á viðkomandi plötu.  Umslagið er aðeins hluti af heildar dæminu.  Og út af fyrir sig ekki stærsti hlutinn af dæminu heldur mikilvægur hlekkur í markaðssetningunni.

[Jens Guð, 9.8.2011 kl. 23:33]

  Mikið assgoti sem lagið  Evrópa er fallin  er flott.  Smellið á myndbandið efst (sem er reyndar ekki myndband heldur hljóðrás). 

[Óli minn, 9.8.2011 kl. 23:48]

Það er nú ekki ónýtt í sjálfu sér að það eina sem nefnt er til samanburðar við Bubba eru Bítlarnir.

[Jens Guð, 10.8.2011 kl. 00:08]

  Óli minn,  það segir töluverða sögu þegar grípa þarf til Bítlanna þegar markaðshlutdeild Bubba er til umræðu. 

[Ágúst Hróbjartur (IP-tala skráð) 11.8.2011 kl. 02:00]

þetta er enginn tilvilljun meistari .*)