Sparið fjórðung!

  Það eru ekki allir ríkir.  Þrátt fyrir að erfitt sé að finna laust bílastæði vegna allra 10 og 12 milljón króna jeppanna og fólk togist á um hvert eintak af nýjustu árgerð af símum sem kosta 140 þúsund kall (minn sími kostaði innan við 5 þúsund kall).  Það eru miðnæturbiðraðir út um alla Kringlu þegar ný árgerð af tölvuleik fyrir krakka er sett í sölu.  Biðraðirnar og hamagangurinn eru ennþá meiri þegar ný búð með útlendum vörum er opnuð.  Ekki síst ef útrásarvillingar og bankaræningjar tengjast þeim.  Sólarlandaferðum,  borgarferðum,  skíðaferðum,  golfferðum,  íþróttaleikjaferðum og ferðum á allskonar viðburði í útlöndum fjölgar dag frá degi.  Íslensku flugfélögin eru orðin 3 til að anna eftirspurn og eru stöðugt að bæta við nýjum áfangastöðum.  Dýrustu veitingastaðirnir á höfuðborgarsvæðinu eru þétt setnir.  Einkum þar sem máltíðin kostar yfir 10 þúsund kall.  Fólk er byrjað að hamstra pantanir á jólahlaðborðin.  Og það er september. 

  Það sitja ekki allir í slitastjórn né hafa fengið skuldir upp á hundruð milljóna króna afskrifaðar.  Sumir hafa fengið skuldir upp á milljarða afskrifaðar.  Aðrir hafa náð samkomulagi við bræður sína um kaup og sölu og milligöngu um kaup og sölu á fjárhags- og starfsmannakerfi til hins opinbera. 

  En það er til fólk sem þarf að spara.  Og jafnvel þó að það þurfi ekki að spara þá er óþarfa bruðl óþarfi.  Það eiga allir að hjálpast að við að gefa sparnaðarráð.  Ég læt ekki mitt eftir liggja. 

  Gleraugu kosta marga peninga.  Samhent hjón eða pör eða vinir geta sparað fjórðung með því að nota sameiginleg gleraugu.  Það er hægt að gera með því að nota aðeins 3 sjóngler í stað fjögurra.

  Það er smá kúnst að nota svona gleraugu til að byrja með.  Aðallega út af því að annar aðilinn þarf að ganga aftur á bak.  En þetta venst glettilega fljótt og fólk verður samstígara og nánara er á líður. 

 

Svaraði Jóhönnu um kerfið 2004

Athugasemdir

[Ásdís Sigurðardóttir, 29.9.2012 kl. 10:00]

Ég á alltaf jafn erfitt með að skilja hversu margir eru í þessum biðröðum, fjármagni er svo sannarlega misskipt í þessu landi. Eitt læt ég eftir mér og það er að eiga mín privat gleraugu, en verð að viðurkenna að ég endurnýja sjaldan, get verið þakklát fyrir hve sjónin breytist hægt.

[Guðmundur Ásgeirsson, 29.9.2012 kl. 18:14]

Auga fyrir auga?

[Jens Guð, 29.9.2012 kl. 22:47]

  Ásdís,  ég átta mig ekki heldur á þessum biðröðum og troðningi.  Það er eins og margir landa okkar haldi að þeir muni missa af einhverju ef þeir koma sér ekki fyrir í biðröð.

  Troðningurinn birtist meðal annars þegar um flug er að ræða.  Innritun hefst kannski 2 eða 3 tímum fyrir brottför.  Áður en innritun hefst er komin röð.  Allir standa þreyttir upp á endann og andvarpa yfir því hvað röðin gengur hægt.  Röðin er löng fyrstu 30 - 40 mínúturnar eða svo.

  Þá kem ég röltandi í rólegheitum og þarf ekki að bíða í röð heldur fæ strax innritun.

  Um leið og byrjað er að hleypa um borð myndast önnur röð.  Sama fólkið stendur upp á endann og andvarpar yfir því hvað röðin gengur hægt.  Allir komast þó um borð á 20 - 30 mínútum.

  Þá kem ég röltandi í rólegheitum og þarf ekki að bíða í röð heldur geng beint til númeraðs sætis míns í flugvélinni.

  Troðningurinn er svo spaugilega óþarfur.  Allir eru með þegar keyptan miða.  Það er ekkert sem hastar innritun.  Númer flugsætis er skráð á miðann þannig að enginn þarf að troðast í vélina til að tryggja sér sæti.  

  Reyndar er hinn mesti dónaskapur af þeim sem eru í fremstu sætum að troðast fyrstir inn í flugvélina.  Þannig stífla þeir rennslið á meðan þeir basla við að koma handfarangrinum fyrir, ná sér í kodda og teppi, taka af sér yfirhafnir o.s.frv.

  Það eru farþegarnir í öftustu sætum sem fyrstir eiga að fara um borð.  Eða bíða þangað til allir eru sestir.

[Jens Guð, 29.9.2012 kl. 22:47]

  Guðmundur,  auga fyrir auga og betur sjá augu en eyru.

[Ásdís Sigurðardóttir, 30.9.2012 kl. 19:01]

Þú orðar þetta vel Guðmundur, til hvers að rjúka alltaf upp í röð, ég bíð bara róleg og þarf ekkert að dæsa. :):)

[Ásdís Sigurðardóttir, 30.9.2012 kl. 19:04]

GUÐMUNDUR HVAÐ :):):) meina náttl. Jens. En veistu hvað kona Jesu segir þegar hún verður rosa hissa og hrópar upp yfir sig???? þú veist að margir segja OMG (o my god) hún segir náttl. OMFIL (o my father in law)