Kvikmyndarumsögn

 

 

 

 

 

 

 

 

 

 

 

 

 

 

 

 

 

 

 

 

 

 

 

 - Titill:  Hrútar

 - Handrit og leikstjórn:  Grímur Hákonarson

 - Helstu leikarar:  Sigurður Sigurjónsson,  Theodór Júlíusson,  Guzzi (Gunnar Jónsson),  Charlotte Böving,  Jörundur Ragnarsson...

 - Einkunn: ****

  Áður en kvikmyndin Hrútar var tekin til sýningar í íslenskum kvikmyndahúsum vann hún til verðlauna í Cannes í Frakklandi.  Það er helsta kvikmyndaráðstefna/hátíð heims.  Fyrst var myndin valin úr hópi fjögur þúsund kvikmynda og síðan verðlaunuð.  Fyrsta og eina íslenska kvikmynd til að ná þessum árangri.  Og það verðskuldað.  

 Vandamálið sem fylgir er að áhorfandi í íslensku kvikmyndahúsi býst við miklu. Þegar á reynir fer myndin rólega af stað.  Við kynnumst bræðrum,  einyrkjum,  á tvíbýli í sveit.  Þeir hafa ekki talast við í fjóra áratugi.  Þetta er alvanalegt í sveitum á Íslandi.  Ekki endilega alveg eins.  Í Skagafirði þekkti ég mæðgin sem bjuggu ein í sama húsi.  Sonurinn talaði ekki við mömmu sína í áratugi.               

  Í Hrútum fáum við ekki upplýst hvað olli þagnarbindindi bræðranna. Enda aukaatriði.  

  Frá fyrstu mínútum myndarinnar er glæsileg myndataka áberandi.  Reyndar er allt glæsilegt en rembingslaust við myndina:  Tónlist notuð á áhrifaríkan hátt (samin af Atla Örvarssyni);  íslenskt veður á stórleik.  Blessunarlega er - aldrei þessu vant - engin áhersla lögð á fallegt íslenskt landslag.  Landslagið í myndinni er sviplítið og "venjulegt".  

  Er líður á myndina taka við skondin atvik,  óvænt framvinda og af og til spennandi senur.  Allt hjúpað hlýju og samúð með persónum.  Mest hvílir á leik Sigga Sigurjóns.  Hann er frábær í sínu hlutverki.  Trúverðugur,  brjóstumkennanlegur og ekta bóndi.  Hann kann öll réttu handbrögðin.  Það leynir sér ekki að hann hefur verið í sveit og hefur bóndann í sér.  

  Fjárhópur og hundur leika vel og sannfærandi.  Einkum hundurinn. 

  Kynningarklippan (treilerinn) skemmir smá fyrir því sem gæti verið óvænt uppákoma er annar bróðurinn skýtur á rúður hins.  Samt er nóg eftir sem gerir myndina áhrifaríka.  

  Orðið sem lýsir myndinni best er "magnað".  Þetta er mögnuð mynd.  Ég mæli með henni sem magnaðri upplifun í bíósal.   

 

Athugasemdir

[Sigurður I B Guðmundsson, 4.6.2015 kl. 22:25]

Sá þessa mögnuðu mynd í dag. Frábært hvað það eru margar góðar íslenskar myndir í gangi núna.

[Jens Guð, 5.6.2015 kl. 10:12]

Sigurður I B,  síðustu þrjár íslenskar myndir sem ég hef séð eru allar dúndur góðar:  Fúsi,  Bakk og Hrútar.