Margur verður af aurum api

18.1.2016 | 18:45

Margur verður af aurum api

Það er ekki öllum gefið að eiga fulla vasa fjár. Né heldur er öllum gefið að umgangast auðæfi af skynsemi. Fjöldi vinningshafa stærstu lottóvinninga heims sitja eftir með sárt enni. Þeir fengu óstjórnlegt kaupæði. Keyptu endalaust af dýrum hlutum á borð við sportbíla, glæsivillur, einkaþotur, báta o.s.frv. Helltu sér út í samkvæmislíf sem breyttist í eitt allsherjar partý. Áfengi, kókaín og aðrir vímugjafar réðu fljótlega för. Þangað til einn góðan veðurdag að allir peningar voru búnir.

Í partýinu splundraðist fjölskyldan með tilheyrandi hjónaskilnuðum og málaferlum. Eftir sitja ógreiddir reikningar, illindi og allskonar leiðindi. Við taka þunglyndi, sjálfsásakanir, blankheit og heilsuleysi.

Oft fara unglingar, börn vinningshafa, verst út úr þessu. Þau ganga inn í partýið og læra aldrei að sjá um sig sjálf eða taka ábyrgð á einu né neinu. Í verstu tilfellum verða þau eiturlyfjafíklar og aumingjar. Þetta vita sumar vellauðugar poppstjörnur. Þær hafa ótal hliðstæð dæmi fyrir framan sig. Munurinn er helst sá að poppstjarnan fær lengri aðlögunartíma. Ríkidæmi hennar byggist upp hægt og bítandi.

Margar poppstjörnur gæta þess að afkvæmin alist upp við "eðlilegar almúgaaðstæður". Paul McCartney lét sín börn ganga í almenna skóla (ekki einkaskóla ríka fólksins) og skar vasapening þeirra við nögl. Gítarleikari Pink Floyd, David Gilmour, sér sjálfur um heimilishaldið. Hann matreiðir og þrífur. Lengst af lagði hann áherslu á að fjölskyldan mataðist saman í eldhúsinu.

Þetta var ekki alltaf þannig hjá David Gilmour. Fyrst eftir að hann auðgaðist þá safnaði hann glæsibílum og lét þjónusutfólk sjá um heimilið. Einn daginn uppgötvaði hann að hann þekkti í raun börn sín ósköp lítið. Honum brá. Seldi sportbílana, losaði sig við allt starfsfólk og gaf uppistöðu af auðæfum sínum til samtaka er taka á málefnum heimilislausra. Þá loks upplifði hann hamingju og naut þess að sinna börnum sínum.

Söngvarinn Sting hefur gert sín börn arflaus. Þetta gerir hann með velferð þeirra í huga. Þau eiga alfarið að bera ábyrgð á sér sjálf. Það er kannski fulllangt gengið. Nema þau séu þegar búin að koma sér þokkalega vel fyrir og spjara sig vel.

Rod Stewart gengur ekki eins langt. Í erfiskrá hans er börnunum tryggð upphæð sem kemur undir þeim fótunum. En ekki neitt sem gerir þau að ríkum dekurbörnum.