Bjóst aldrei við að ná svona langt

 

 

 

 

 

 

 

 

   Nýverið yfirgaf almannatengill bandaríska forsetaframbjóðandans Donald Trump sinn sómadreng.  Ástæðan sem sú ágæta kona gefur upp er að grínið sé komið úr böndunum.  Upphaflega hafi framboðið verið létt sprell.  Ætlað að gera grín að og atast í hefðbundinni kosningabaráttu.  Guttinn hafi sett markið á að ná 2. sæti í forvali repúblikanaflokksins.

  Leikar fóru þannig að grallarinn náði næstum því strax forystu í forvalinu.  Henni hefur hann haldið af öryggi síðan.  Jafnframt fóru að renna tvær grímur á almannatengilinn,  Cegielski.  Konan taldi sig verða vara við sífellt fleiri glórulausar,  fordómafullar og mannfjandsamlegar yfirlýsingar í málflutningi frambjóðandans.  Einnig algert bull.  Sitthvað sem henni mislíkaði. 

  Að lokum kom kornið sem fyllti mælinn:  Það var yfirlýsing frá Trump vegna fjöldamorða á kristnum í Pakistan.  Hún hljómaði þannig:  "I alone can solve."  Það útleggst sem svo að hann aleinn geti leyst vandamálið.

  Konan fullyrðir að þannig virki utanríkispólitík ekki.  Ekki fyrir neinn.  Aldrei.

  Hún ítrekar að guttinn hafi alls ekki gert ráð fyrir að sigra í forvalinu. Núna aftur á móti sé stolt hans í slíku rugli að hann geti ekki séð að sér.  

  Ástæða er til að hafa í huga að konan styður ekki lengur framboð Trumps.  Hún vinnur ekki lengur fyrir hann.  Kannski er hún óþokki og gengur illt eitt til.  Því gæti ég best trúaað.

             

Trump og Hillary með stórsigra

Athugasemdir

[Ásthildur Cesil Þórðardóttir, 27.4.2016 kl. 17:18]

Þvert á móti held ég að samviska hennar hafi vaknað og ekki geta sætt sig við hvað var að gerast.

[Tobbi (IP-tala skráð) 27.4.2016 kl. 17:28]

Í Hjaltadalnum fylltu kornin mælinn, en dropinn holaði steininn.

[Jens Guð, 27.4.2016 kl. 19:20]

Ásthildur Cesil,  það er annar möguleiki - og ekki fráleitur.

[Jens Guð, 27.4.2016 kl. 19:25]

Tobbi,  takk fyrir ábendinguna.  Fyrst varð mér á að skrifa að "loks hafi komið dropinn sem holaði steininn."  Á meðan ég hélt áfram að skrifa pistilinn bankaði á dyr hjá mér grunur um að þetta passaði ekki við textann.  Ég brá við skjótt og varð á að breyta þessu í dropann sem fyllti mælinn.

[Stefán (IP-tala skráð) 28.4.2016 kl. 08:14]

Held samt að þrátt fyrir allt bullið og ruglið í Donald Trump, þá sé hann samt heiðarlegri en meðal framsóknarmaður hár í okkar fámenna landi. Samt gott út af fyrir sig að hafa allt ruslið í sama stjórnmálaflokki.

[Jens Guð, 28.4.2016 kl. 10:12]

Stefán,  miðað við nýjustu fréttir er sitthvað til í því.

[Eygló (IP-tala skráð) 28.4.2016 kl. 11:14]

Miðað við heimildarmyndina sem var á dagskrá RUV í gærkveldi The Hunting Ground og svo þessa frétt http://www.ruv.is/frett/fyrrverandi-thingforseti-daemdur-fyrir-barnanid þá er nú ýmislegt að í þessu stóra landi "tækifæranna".

Helsjúk "virðing" fyrir peningum og völdum kemur náungum eins og Trump þangað sem þeir ætla sér hvað sem það kostar.

[Jens Guð, 28.4.2016 kl. 17:39]

Eygló,  umburðalyndi gagnvart nauðgunum í bandarískum háskólum er skelfilegt.  Og óhunganlegt hvernig þetta snýst allt um peninga. Reyndar er sama umburðalyndi gagnvart nauðgunum í fangelsum þó að þar komi peningar ekki á sama hátt inn í dæmið.