Hörmulegir bílar

 

 

 

 

 

 

 

 

  Það er ekki öllum lagið að hanna bíl svo vel fari.  Að mörgu þarf að hyggja.  Hætta er á að eitthvað gleymist.  Enginn getur séð fyrir öllu.  Þannig var það 2003 með franska bílinn Citroën C3 PLURIEL.  Hann var svo sportlegur að hægt var að taka toppinn af í heilu lagi.  Hinsvegar var ekkert geymslurými í bílnum fyrir toppinn.  Þess vegna þurfti að geyma toppinn inni í stofu.  Verra var að rigning og snjór gera ekki alltaf boð á undan sér.  Fáir treystu sér til að fara í langt ferðalag á topplausum sportbílnum.  

 

 

 

 

 

 

 

 

  1998 kom á markað Fiat MULTIPLA.  Öll áhersla var lögð á að bíllinn væri sem rúmbestur að innan.  Það tókst að því marki að sitjandi inni í honum leið fólki eins og það væri í mun stærri bíl.  Gallinn var sá að þetta kom illilega niður á útlitinu.  Bíllinn var hörmulega kauðalegur, klesstur og ljótur.  Eins og alltof stóru húsi væri hnoðað ofan á smábíl.  Sem var raunin.  

 

 

 

 

 

 

 

 

 

 1991 birtist Subaru SVX með undarlegar hliðarrúður.  Það var líkt og gluggarnir væru tvöfaldir;  að minni aukagluggum hefði verið bætt utan á þær.  Ekki aðeins á hurðarrúðunni heldur einnig á aftari hliðarrúðunni.  Áhorfendur þurftu ekki að vera ölvaðir til að finnast þeir vera að sjá tvöfalt.  

 

 

 

 

 

 

 

 

  Í Júgóslavíu var fyrir fall járntjaldsins framleiddur bíllinn Yugo GV.  Útlitið var allt í lagi.  Öfugt við flest annað.  Eitthvað bilaði í hvert sinn sem hann var settur í gang.  Vélin var kraftlítil og bilanagjörn.  Tímareimin slitnaði langt fyrir aldur fram.  Rafmagnsþræðir bráðnuðu ásamt fleiru.  Lykt af brunnu plasti eða öðru einkenndu bílinn,  sem og allskonar hlutir sem losnuðu:  Hurðahúnar, ljós, takkar og stangir.

 

 

 

 

 

 

 

 

 

  Á Norður-Írlandi var á níunda áratugnum framleiddur nýtískulegur Delorean DMC-12.  Mestu munaði að dyrnar opnuðust upp.  Það var framúrstefnulegt.  En kostaði vandræði í þröngum bílastæðum og inni í bílskúr.  Og bara út um allt.  Aðeins hávaxnir og handsterkir gátu lokað dyrunum.  Ofan á bættist að vélin var alltof veik fyrir þennan þunga stálhlunk.  Bíllinn var ekki hraðbrautarfær vegna kraftleysis.  Til að bæta gráu ofan á svart var hann verðlagður alltof hátt.            

Athugasemdir

[Hrólfur Þ Hraundal, 9.9.2016 kl. 11:59]

Það hefði þurft að fylgja kerra með Citroen C3 fyrir toppinn og ásetningar aðstoðarmanninn, en við Fiatin var ekkert hægt að gera annað en hætta að horfa, en best væri sennilega að vera bara nógu fullur til að ferðast í Subaru með mislukkuðum frönskum hliðargluggum, það er svipað með Jugo VG og Citroen C3 að það hefði þurft að fylgja með kerra með varahlutum lími og reiðhjóli, en það besta við Delorean er að hann var verðlagður of hátt þannig að þeir urðu ekki of margir.  

[Ásgrímur Hartmannsson, 9.9.2016 kl. 14:38]

DeLoeran var miklu verri en þetta: undirvagninn var úr trefjalasti og allt kramið var *rangt.*  En lúkkar vrkilega á stæði, betur en flest annað.

Á móti hafa sumir bílar verið frábærlega hannaðir:

Ford Crown Victoria, til dæmis.  Sennilega bestu bílar sem kaninn hefur látið frá sér frá upphafi.  Byggðir á grind, eins og LandCruiser og sterkir eftir því.  Voða fátt í þeim sem getur bilað, allt þraut-reynt.  Vel hægt að koma 6 manns í sæti og öllu farangrinum í skottið.

Fast á eftir fylgja Toyota Comfort og Mercedes Benz W123, þeir eru minni, svo þú kemur ekki með góðu móti nema 5 manns inn, 4 ef það á að vera þægilegt.  Benzinn er ekki sami hluturinn upp og nipur allan skalann, en Toyotan er það.  Toyotan hefur bara eina vél, benzinn einhvern ótölulegan fjölda: 200 bensín, 300 dísel, 280 bensín, með eða án blöndunsgs... ekki tæmandi listi.

Ford Cortina var mikil snilld.  Myndu ekki verða samþykktir nú til dags, vegna þess að þeir voru smíðaðir úr svo þunnu efni.

Ef menn vilja svo fara yfir í framhjóladrifið: Honda Accord.  Þú hefur ekki valið rangt ef þú hafur fengið þér slíkan bíl.  Verst þeir fást ekki lengur á evrópumarkaðnum.  Fólk kann ekki gott að meta.

Mér sýnist reyndar farið að örla á því aðeins að ungt fólk er fátækt fólk sem hefur ekkert efni á bíl.  Allir bílar sem seljast eitthvað eru miðaðir að fólki með bakveiki: Toyota Rav4, KIA Sorento, Hyundai Santa Fe... osfrv.

Allt farartæki sem minna mig á útbelgda mörkeppi.  En brilljant ef maður er með bakverk.

[Jens Guð, 12.9.2016 kl. 12:23]

Hrólfur,  þetta er góð greining hjá þér.

[Jens Guð, 12.9.2016 kl. 12:23]

Ásgrímur,  takk fyrir fróðleiksmolana.