Tónlistarjöfur fallinn frá

 

  Tónlistarstjörnur sem hófu feril á sjötta og sjöunda áratugnum eru margar komnar uppundir og á aldur meðalævilengdar.  Þeim fjölgar ört sem hverfa yfir móðuna miklu.  Kanadíska söngvaskáldið Leonard Cohen, breska kamelljónið David Bowie og nú Suðurríkjarokkarinn Leon Russell.  Sá síðastnefndi féll frá fyrr í dag.  Hann á merkilegri feril en margur gerir sér grein fyrir.  Hann var ekki áskrifandi að toppsætum vinsældlalistanna.  Samt var hann ekki ókunnugur vinsældalistum.  Ekki svo oft undir eigin nafni heldur í slagtogi með öðrum.  Hann spilaði með Bítlum (öllum nema Paul), Stóns, Dylan, The Byrds, Eric Clapton og Elton John, svo örfáir meðreiðarsveinar séu nefndir af ótal.

  Leon spilaði á mörg hljóðfæri en var þekktastur sem píanóleikari.  Hann var farsæll söngvahöfundur.  Fjöldi þekktra flytjenda hefur spreytt sig á söngvum hans.  Söngrödd hans var sérstæð.  Að sumu leyti svipuð Willie Nelson nema Leon gaf betur í.

 

  Það er ekki á allra vitorði að hann spilaði á píanó í jómfrúarlagi The Byrds,  "Mr. Tambourine Man".  Það toppaði vinsældalista víða um heim 1965.

  1969 fór Bretinn Joe Cocker mikinn á vinsældalistum með lag Russels, "Delta Lady".  Þeir Joe túruðu saman undir heitinu Mad Dogs and the English man.

  Tónlistarstíll Leons heyrir undir samheitið americana (rótartónlist); hrár og ópoppaður blús,  kántrý,  soul, djass... Þegar hann gekk lengst í kántrý-inu þá var það undir nafninu Hank Wilson.  

  1972 náði plata Russels,  "Carney",  2.sæti bandaríska vinsældalistans.  Var með svipaða stöðu á vinsældalistum annarra landa.  2010 náði platan "The Union" 3ja sæti bandaríska vinsældalistans. Sú plata er dúettplata með Eltoni John.  Hann hafði frá unglingsárum dreymt um að spila með uppáhalds píanóleikara sínum,  Leon Russell.  Fyrir sex árum lét hsnn verða af því að bera draumaóskina undir Leon.  Til óvæntrar ðánægju tók Leon vel í erindið.        

  Á morgun blogga ég um persónuleg samskipti við Leon Russell.      

         

Leon Russell látinn

Athugasemdir

[Wilhelm Emilsson, 14.11.2016 kl. 00:06]

Takk fyrir fínan pistil um Leon Russell. Ég hlakka til að heyra um samskipti þín við hann. Ég hélt alltaf að hann hefði spilað á rafmagnspíanó, en ekki bassa, í "Mr. Tambourine Man." 

Besta sagan sem ég hef heyrt um Leon Russell er svona:

Russell stumbled in late and drunk to a recording session led by legendary producer and future-convicted murderer Phil Spector. When the producer asked Russell if he'd ever heard of the word "respect," Russell jumped up on his piano and fired back, "Philip, have you ever heard the word, 'Fuck you?'"

Það gerist ekki svalara.

[Sigurður I B Guðmundsson, 14.11.2016 kl. 13:06]

Bíð spenntur eftir meiri fróðleik. 

[Jens Guð, 15.11.2016 kl. 18:08]

Wilhelm,  takk fyrir skemmtilega sögu og leiðréttingu. Ég var að horfa á spilerí Leons á bassa með Dylan og Harrison á Bangla Desh hljómleikunum.  Þessu sló saman.  

[Jens Guð, 15.11.2016 kl. 18:09]

Sigurður I B,  ég vind mér í það. 

[Wilhelm Emilsson, 16.11.2016 kl. 01:01]

Takk, Jens. Leon var líka flinkur á bassann.