Dularfullt í Ikea

24.10.2019 | 07:32

Ég átti erindi í Ikea. Eða réttara sagt gerði ég mér upp erindi þangað. Ég átti leið um Hafnarfjörð og fékk þá snilldar hugmynd í kollinn að koma við í Ikea og kíkja á veitingastaðinn á annarri hæð. Ég tek fram og undirstrika að ég hef engin tengsl við Ikea. Kann hinsvegar vel við verð og vöruúrval fyrirtækisins.

Eftir að hafa keypt veitingar settist ég sæll og glaður niður við borð. Á næsta borði var diskur með ósnertum hangiskanka, meðlæti og óopnaðri Sprite-flösku. Enginn sat við borðið.

Fyrst datt mér í hug að eigandi máltíðarinnar væri að sækja sér bréfaþurrku eða eitthvað annað. En ekkert bólaði á honum. Ekki þær 20 mínútur sem ég dvaldi á staðnum. Þetta er skrýtið. Ég velti fyrir mér möguleikum: Hvort að viðkomandi hafi verið geimvera sem var geisluð upp áður en máltíðin var snædd. Eða hvort að minnisglöp (Alzheimer) hafi komið við sögu. Þriðji möguleikinn er að útlendur ferðamaður hafi keypt matinn. Tilgangurinn hafi ekki verið að borða hann heldur taka ljósmynd af honum til að pósta á Fésbók; sýna vinum og vandamönnum hvernig séríslensk máltíð lítur út. Hlutverk gosdrykksins hafi þá verið það eitt að sýna stærðarhlutföll. Eða hvað?

Meginflokkur: Matur og drykkur | Aukaflokkar: Lífstíll, Viðskipti og fjármál, Vinir og fjölskylda | Breytt s.d. kl. 10:27 | Facebook

Athugasemdir

Geimvera með minnisglöp snæðir (ekki) hangiskanka í IKEA. Því ekki það? Ekkert óeðlilegt við það.

Sigurður Bjarklind (IP-tala skráð) 24.10.2019 kl. 08:15

Þetta hefur verið Tom Barneby. Hann fær venjulega ekkert almennilegt að borða hjá konunni, svo hann verður að lifa á skyndibitanum. Hann hefur verið nýsestur niður með með góðgætið en fengið tilkynningu í gemsanum um morð í Mosfellsbænum. Láttu mig þekkja þetta. Ég hef séð ófáa þætti með kappanum.

Jósef Smári Ásmundsson (IP-tala skráð) 24.10.2019 kl. 12:57

Ég hugsa að honum hafi orðið brátt í brók og svo þurft að flýta sér til að missa ekki af strætó!!

Sigurður I B Guðmundsson, 24.10.2019 kl. 14:04

Held að þetta hafi verið gildra til að fanga ketkrók. Ikea þarf jú á jólasveini að halda innan tíðar. Þú hefur ekki litið upp í loft og séð búrið sem fellur um leið og skankinn er snertur.

Þeir geta annars bara búið til sinn eigin jólasvein, sniðnum að vöruúrvalinu. Gluggakrók t.d. Hurðasníkir, Pottaskellir...etc

Jón Steinar Ragnarsson, 25.10.2019 kl. 09:27

Kertagámur er örugglega á leiðinni hingað með samskipum í tilefni Jólavertíðarinnar.

Jón Steinar Ragnarsson, 25.10.2019 kl. 09:30

Ég sá Stúf á bensínstöð Costco í fyrradag. Hann var að aðstoða við dælurnar.

Jósef Smári Ásmundsson (IP-tala skráð) 25.10.2019 kl. 12:22

Held að þetta sé uppstúfur frændi hans á disknum þarna.

Jón Steinar Ragnarsson, 25.10.2019 kl. 20:16