Félagsfærni Bítlanna

  Félagsfærni er hæfileiki til að eiga samskipti við aðra.  Það er lærð hegðun.  Börn herma eftir öðrum.  Félagslynt fólk á öllum aldri speglar annað fólk.  Góðir vinir og vinkonur tileinka sér ósjálfrátt talsmáta hvers annars,  hegðun, ýmsa takta, húmor,  smekk á fatnaði, músík og allskonar.  

  Á upphafsárum Bítlanna voru þeir snyrtilega klipptir;  stutt í hliðum og hnakka en dálítill lubbi að ofan greiddur upp.  Svo fóru þeir að spila í Þýskalandi.  Þar eignaðist bassaleikarinn,  Stu Sutcliffe,  kærustu.  Hún fékk hann til að greiða hárið fram á enni.  Hinir Bítlarnir sprungu úr hlátri er þeir sáu útkomuna.  Þeir vöndust hárgreiðslunni.  Innan skamms tóku þeir,  einn af öðrum,  upp sömu greiðslu.  Nema trommarinn,  Pete Best.  Hann hefur alla tíð skort félags- og trommuhæfileika.  Öfugt við arftakann,  Ringo.

  Þegar fram liðu stundir leyfðu Bítlarnir hártoppnum að síkka meira.  Að því kom að hárið óx yfir eyru og síkkaði í hnakka.  Svo tóku þeir - tímabundið - upp á því að safna yfirvaraskeggi.  Þegar það fékk að fjúka söfnuðu þeir börtum.  Um leið síkkaði hárið niður á herðar.  

  Áður en ferli hljómsveitarinnar lauk voru allir komnir með alskegg.  Hártíska Bítlanna var aldrei samantekin ráð.  Þeir bara spegluðu hvern annan.  Á mörgum öðrum sviðum einnig.                 

 

 

 

 

Athugasemdir

[Sigurður I B Guðmundsson, 22.5.2022 kl. 10:10]

Bítlarnir alltaf flottastir.

[Jens Guð, 22.5.2022 kl. 10:21]

Sigurður I B,  þess vegna hermdum við strákarnir eftir hártísku þeirra á sínum tíma.  Sem og klæðaburði þeirra og bítlaskóm. 

[Sigurður I B Guðmundsson, 22.5.2022 kl. 12:09]

Að ógleymdum lögum þeirra. 

[Jóhann Elíasson, 22.5.2022 kl. 13:01]

Ég er ansi hræddur um að það verði ansi langt í það eða jafnvel að það verði aldrei að aðrir eins risar komi fram, bæði á tónlistarsviðin og sem áhrifavaldar.......

[Jens Guð, 22.5.2022 kl. 13:57]

Sigurður I B (# 3),  svo sannarlega munaði öllu um lög þeirra. 

[Jens Guð, 22.5.2022 kl. 13:59]

Jóhann,  líkur á að nýir Bítlar komi fram eru svo litlar að það mun ekki gerast á þessari öld.  Og eiginlega aldrei á komandi öldum. 

[Theódór Norðkvist, 22.5.2022 kl. 17:26]

Lennon er eins og djákninn frá Myrká á síðustu myndinni, líkt og í myndbandinu við Imagine. Myndin af þeim með orðurnar minnir mig á þegar þeir voru í viðtali við drottninguna og voru spurðir hvað þeir hefðu verið lengi saman sem hljómsveit.

Ringo (minnir mig) svaraði að þeir hefðu verið saman í 40 ár! Við það tilefni lýsti einhver Bítlanna augnaráði drottningarinnar eins og hún hafi ekki verið viss hvort hún ætti að hlæja að þeim eða taka þá af lífi.

Sögusagnir eru um að þeir hafi verið í maríjúana-vímu þegar þeir hittu drottninguna, en George sagði það vera rangt. John sagði að þeir hefðu farið á klósettið til að reykja, því þeir voru taugaóstyrkir - voru jú að fara að tala við drottninguna, en George sagði að þeir hefðu bara reykt sígarettur.

[Jens Guð, 22.5.2022 kl. 18:51]

  Theódór,  keðjureykingar voru eitt af mörgu sem Bítlarnir áttu sameiginlegt.  Fólk sem hitti þá á blaðamannafundum hefur rifjað upp hvað þeir strompreyktu eins og enginn væri morgundagurinn.  John, Paul og Ringo voru að auki alkar sem drukku árum saman.  George hinsvegar svældi hass heilu dagana,  rétt eins og Paul.  Enn eitt merkilegt:  Allir urðu þeir grænmetisætur.  Samt af sitthverri ástæðunni:  Ringo vegna magaveiki,  Paul vegna Lindu,  George vegna hare kristna jóga og John vegna Yoko. 

[Bjarni (IP-tala skráð) 22.5.2022 kl. 18:52]

Hvað er hægt að segja um bítlana?  Hljómsveit sem var hætt áður en ég hætti á bleyju en er ennþá til umræðu hálfri öld síðar. Ekki fan en WTF

[Jens Guð, 22.5.2022 kl. 19:25]

Bjarni,  það er ótrúlega margt hægt að segja um Bítlana;  hljómsveit sem starfaði aðeins í 6 ár á plötumarkaði fyrir hálfri öld.  Á þeim tíma var plötusala aðeins brot af því sem síðan varð.  Samt eru Bítlarnir enn í dag söluhæsta tónlistarfyrirbæri allra tíma.  Enn í dag eru Bítlalög krákuð (cover songs) oftar en nokkur önnur lög.  Söngvarakeppnir á borð við "ædol",  X-factor og hvað þær heita allar án þess að Bítlalög séu sungin.  Bítlalög eru spiluð af tónlistarfólki þvert á músíkstíla.  Til að mynda hef ég um þessar mundir dálæti á bandarísku goth-metal hljómsveitinni Type O Negative sem hér afgreiðir 3 Bítlalög í hrærigraut: 

https://youtu.be/xOAFUbZgSrs

[Bjarni4 (IP-tala skráð) 22.5.2022 kl. 20:00]

Sem "die hard" bítlafan ættir þú að horfa á "yesterday" frá 2019,  sjálfsagt séð þessa mynd áður en ef ekki þá eitthvað fyrir þig

Writer : richadd curtis

Director : danny boyle

[Theódór Norðkvist, 22.5.2022 kl. 21:53]

Það var rétt hjá þér að Type O Negative afgreiddi þessi þrjú lög. Afgreiddu þau svo hressilega að þau bíða þess ekki bætur. Sem Die Hard bítlaaðdáandi er ég hissa að þú aðhyllist svona útgáfur af lögum Bítlanna.

Bara grín, hver hefur sinn tónlistarsmekk. Ég er íhaldssamur á krákur (covers) og vil helst ekki heyra neina aðra kráka góð lög, því mér finnst alltaf upprunalega útgáfan best. Jafnvel þó eftirlíkingarnar séu oft mjög vel gerðar, tæknilega séð.

Þessar tvíburasystur hafa hrifið mig tónlistarlega séð (og á fleiri sviðum.) Hér taka þær Good Day Sunshine, en þær eru með mýgrút af bítlalögum á YouTube síðunni sinni. Held þær séu frá Austurríki.

https://www.youtube.com/watch?v=dhxQKyX2qpk

[Jens Guð, 23.5.2022 kl. 06:36]

Bjarni (# 11),  ég hef ekki séð myndina "Yesterday" en vissi af henni.  Ég er ekki með neina sjónvarpsáskrift.  Bíð bara þolinmóður eftir að hún dúkki upp í RÚV.  Þær gera það fyrir rest flestar myndir sem ég bíð eftir að sjá. 

[Jens Guð, 23.5.2022 kl. 06:56]

Theódór (# 12),  takk fyrir ábendinguna um tvíburasysturnar.  Mér þykir gaman að heyra Bítlalög í útsetningum gjörólíkum frumútgáfunni.  Oft gerir maður sér þá enn betri grein fyrir því hvað lagasmíðarnar eru rosalega góðar.  Sjaldan skáka krákurnar orginalnum.