Plötuumsögn

 - Titill:  Jarðsaga

 - Flytjandi:  Hörður Torfa

 - Einkunn: **** (af 5)

  Þetta er þriðja platan af fimm í ævintýrasögu mannréttindafrömuðarins Harðar Torfa um Vitann.  Þær fyrri eru  Loftssaga  og  Eldssaga.  Hver plata er sjálfstætt verk á þann hátt að þær njóta sín hið besta án samhengis við hinar.  Um Vitann er hægt að lesa á http://www.hordurtorfa.com/?view=010127.

  Hörður er afbragðsfínn lagahöfundur.  Lög hans mörg hver hefjast á þægilegri söngrænni laglínu sem opnast eða stækkar eftir því sem vindur fram.  Þetta eru yfirleitt falleg lög og áheyrileg strax við fyrstu hlustun en venjast líka vel og þola mikla spilun.  Textarnir eru ljóðrænir og vel ortir með stuðlum, höfuðstöfum og rími. 

  Útsetningar eru í höndum Vilhjálms Guðjónssonar galdrakarls.  Flest hljóðfæri leika í höndum Vilhjálms.  Þar af er hann sérlega flinkur gítarleikari.  Hér spilar Vilhjálmur á 10 hljóðfæri.  Í útsetningum hans er þetta frekar poppuð vísnasöngvaplata.  Ég kann best við fábrotnustu útsetningarnar.  Það er vegna þess að ég er lítið fyrir poppmúsík að öllu jöfnu.  Poppaðri lögin eru þó áreiðanlega útvarpsvænni,  eins og það kallast.  

  Útsetningarnar eru þokkalega fjölbreyttar.  Það bregður fyrir djamaískum reggítakti í  Draumurinn.  Gamaldags sveifla (djass swing) dúkkar upp í  Fiðrildi.  Spænsk stemmning setur svip á  Skúffur og skápar.  Það er gospel-keimur af  Vasaljós  og kántrý-fjör í  Mas í mó.  Þannig mætti áfram telja. 

  Hörður er fjölhæfur söngvari með breitt raddsvið.  Oft bregður hann fyrir sig leikrænni tjáningu.  Hann er einnig ljómandi fær kassagítarleikari.  Þó platan sé góð þá er Hörður ennþá flottari á hljómleikum.  Það standast fáir samanburð við trúbardorinn Hörð Torfa á sviði.      

Athugasemdir

[Einar Bragi Bragason., 18.11.2008 kl. 11:45]

Hef ekki heyrt þennann disk en coverið er ekki gott.....

[Þröstur Unnar, 18.11.2008 kl. 11:46]

Íbúð skráð 17 nóv.2008 á mbl.is.

Nýleg 3ja herb. íbúð í 105 Rvk til leigu. Langtímaleiga á 160 þús., hússj. & hiti innifalinn. Hellulögð verönd með skjólvegg og geymsla/þvottah. innan

Æi þetta átti að vera með síðustu færslu um leiguverð á íbúðum.

[Jóhannes (IP-tala skráð) 18.11.2008 kl. 13:32]

Lög Harðar heyrast alltof sjaldan í útvarpinu.

[Rannveig H, 18.11.2008 kl. 14:29]

Hörður er flottur,hann ætti að vera maður vikunnar ,mánaðarins eða jafnvel ársins.

[Jens Guð, 18.11.2008 kl. 22:09]

  Einar Bragi, þegar ég lærði grafíska hönnun í Myndlista- og handíðaskólanum á sínum tíma þá "stúderaði" ég plötuumslög sérstaklega.  Kynnti mér rannsóknir á sölubrögðum í umslagshönnun og sitthvað sem að umslagshönnun snéri - og markaðssetningu á plötum.  Ég hannaði síðar fjölda umslaga og tel mér trú um að hönnun þeirra og markaðsfærsla mín hafi skilað því að viðkomandi plötur margfölduðu sölutölur viðkomandi flytjenda.  Kannski var það eitthvað annað sem skilaði þessum árangri.  Ég útiloka það ekki þó skemmtilegra sé að standa í trú um hitt.

  Ég átta mig ekki á hönnun þessa umslags.  Það er hannað af Goddi,  einum fróðasta Íslendingi um allt sem snýr að grafískri hönnun og yfirkennara auglýsingadeildar Listaháskólans.

  Ég hef grun um að þetta umslag þurfi að skoða í samhengi við önnur umslög í fimm platna pakkanum um Vitann.  Það sé einhver hugmyndafræði og uppskrift í gangi sem mér yfirsést.

  Þröstur,  takk fyrir þennan fróðleik.

  Jóhannes,  ég er kannski að hlusta á "vitlausar" útvarpsstöðvar því ég heyri sjaldan í útvarpi lög með Herði.

  Rannveig,  ég tek undir það.