Hversu snjall/snjöll ertu? Spreyttu þig á skemmtilegri þraut

  Það hefur ekkert verið átt við myndirnar af þessu húsi,  hvorki í fótósjopp tölvuforriti eða á annan hátt.  Það voru ekki heldur notaðar neinar linsur eða filterar á myndavélina til að bylgja og brengla myndina.  Húsið er svona.  En hvaða tækni var notuð sem setur þessa lögun á húsið?  Spreytið ykkur.  Leyndarmálið verður upplýst klukkan 11 í kvöld.

Bestu hljómsveitir sögunnar

 

  Þetta fékk ég sent.  Ég veit ekki hvaðan þetta er tekið en hér er listi yfir bestu hljómsveitir sögunnar að mati lagahöfundarins og gítarleikarans Noels Gallaghers í bresku hljómsveitinni Oasis.  Hugsanlega er Noel hlutdrægur þegar nálgast 7.  sætið.  Engu að síður er listinn ekki út í hött.  Alls ekki.  Þar fyrir utan þýðir nafnið Noel jól og núna eru jólin að koma eftir 15 - 16 daga (eftir því hvar maður er staddur).

1. Beatles

2. Rolling Stones

3. Who

4. Sex Pistols

5. Kinks

6. Jam

7. Oasis

8. Smiths

9. Stone Roses

Plötuumsögn

 - Titill:  Spegill sálarinnar - Open Your Eyes

 - Flytjandi:  Herbert Guðmundsson

 - Útgefandi:  HG hljómplötur

 - Einkunn:  **** (af 5)

  Yngra fólk þekkir Hebba fyrst og fremst af laginu sívinsæla  Can´t Walk Away  frá 1985.  Farsæll tónlistarferill hans nær þó aftur til upphafs áttunda áratugarins.  Þá söng hann í vinsælum rokkhljómsveitum.  Hæst báru Eik og Pelican. 

  Spegill sálarinnar er áttunda sólóplata Hebba.  Upphafslagið,  Colours of Dreaming,  byrjar líkt og píanóballaðan  Mother  með John Lennon.  Áður en fyrsta erindi lýkur er skipt yfir í hraðari og léttari takt.  Þannig heldur lagið áfram að skiptast í mishraða kafla.  Sem minnir á fortíð Hebba í framsækna rokkinu (progressive).  Taktskiptingarnar túlka líka þær breytingar sem orðið hafa í lífi hans á árinu.  Hann hefur sagt skilið við vímuefni og tóbak og tekið kristna trú.

  Í eðlilegu framhaldi af þessu eru tvö næstu lög,  Day of Freedom  og  Magic Feeling,  fagnaðarsöngvar (gospel) með tilheyrandi kór félaga úr Gospelkór Fíladelfíu og björtum bakröddum Magnúsar og Jóhanns ásamt Hebba sjálfs.  Falleg lög með mögnuðum "sing-a-long" viðlögum.

  Hebbi býður áfram upp á öflugar ballöður með grípandi viðlagi og snyrtilega útfærðum bakröddum en hvílir Gospelkórinn í lögum númer 4 og 5.  Kórinn dúkkar aftur upp í lagi númer 6 og tveimur lögum til viðbótar. 

  Það er góð ákvörðun að nota Gospelkórinn aðeins til spari á þennan hátt.  Kórinn "stækkar" lögin sem hann er í og gefur plötunni flottan heildarsvip.  Meiri notkun á kórnum hefði hinsvegar orðið þrúgandi.

  Besta lag plötunnar,  Open Your Eyes,  er plássfrekt.  Það er flutt í tveimur hlutum sem samtals telja 12 mínútur.  Lagið er mergjað og þolir hið besta þennan mínútufjölda.  Er líður á lagið fara teygðir gítartónar að setja seyðandi blæ á og minnir þá örlítið á  Heroes  með David Bowie.

  Í kjölfar fyrri hluta  Open Your Eyes  stekkur Hebbi í hressilegan rokkgír í næstu tveimur lögum,  Garden Above  og  God is Real.  Í síðarnefnda laginu kemur gítarsnillingurinn Þorsteinn Magnússon (Steini í Eik) við sögu og rífur kröftuglega í.  Hann spilar einnig í tveimur öðrum lögum.  Jón Elvar Hafsteinsson afgreiðir að uppistöðu til annað gítarspil.  Það gerir hann með stæl.  Þetta er töluverð gítarplata.  Annar hljóðfæraleikur er allur hinn fínasti. 

  Eitt lag er án söngs (instrumental),  His Grace.  Ljúf en ágeng ballaða. 

  Upphaflega ætlaði Hebbi að syngja stóran hluta plötunnar á íslensku.  Eftir að hafa mátað texta á íslensku við nokkur lög hvarf hann frá því.  Aðeins lokalag plötunnar,  merkt sem aukalag,  er með texta á íslensku. 

  Öfugt við flesta aðra Íslendinga sem semja söngtexta á ensku þá hljóma textar Hebba vel og eðlilega. 

  Hljómur plötunnar er hreinn og bjartur og heildarsvipurinn sterkur.  Þetta er besta plata Hebba til þessa. 

Jóna Ágústa Gísladóttir

  Þegar ég byrjaði að blogga í fyrravor vissi ég ekkert hvað blogg er.  Ég hélt að þetta væri ágætur vettvangur til að eiga orðastað við ættingja og vini.  Sem það reyndar er.  En ég sá ekki fyrir að þetta væri líka vettvangur til að lesa sér til skemmtunar bloggfærslur ókunnugs fólks. 

  Fljótlega uppgötvaði ég að gaman var að kíkja á bloggfærslur Ásthildar Cesil,  Jennýar Önnu,  Gurríar Har og margra annarra.  Jafnframt uppgötvaði ég að í bloggheimi voru gömul skólasystkini á borð við prakkarann (Jón Steinar),  Krístínu Björgu,  Ippu og gamlir kunnigjar úr rokkbransanum eins og Kiddi Rokk og Jakob Smári.

  Áður en langt um leið tók ég eftir að ein af þeim bloggsíðum sem ég heimsótti daglega var www.jonaa.blog.is.  Jóna skrifar einstaklega góðan og áhugaverðan texta um einhverfan son sinn.  Pennafærni hennar er aðdáunarverð.  Frásagnir hennar snerta mann.  Ég held að ég muni það rétt að bloggsíða hennar hafi verið sú fyrsta af örfáum sem ég hef haft frumkvæði af að óska eftir bloggvináttu.  Þannig var auðveldara að smella á það sem mig langaði að lesa á daglegum blogglestrarrúnti.

  Það kom ekki á óvart þegar upplýst var að von væri á samantekt á úrvali (best of) af bloggi Jónu Á. í bókarformi.  Bókin er komin út og er kærkomin lesning.  Meiriháttar flott bók,  vel skrifuð,  einlæg og í aðra röndina bráðskemmtileg.  Í hina röndina jákvæð og upplýsandi um einhverfu,  sem ég vissi ekki neitt um.  Það er mannbætandi að lesa þessa bók.  Þetta er bók sem fólk á að kaupa fyrir sig til að lesa og einnig til að gefa vinum og vandamönnum.  

 

Einn léttur

  Þennan fékk ég sendan fyrir nokkru.  Ég var búinn að gleyma honum þangað til ég rakst á fréttina um að hrossalæknir, Árni M.  Mathiesen, væri að slá öll met í skoðanakönnun bandaríska vefblaðsins Huffington Post um versta bankamann heims.  Næst verstu bankamenn heims komast hvergi með tærnar þar sem Árni hefur hælana.  Það er eins gott að útlendingar komist ekki að því að Árna tókst á tveimur dögum að verða versti dómsmálaráðherra heims á sínum tíma.

  Dag einn var frægasti bankamaðurinn í bílferð í stóru flottu limmósínunni sinni þegar að hann sá 2 menn við veginn bítandi gras. Hann bað bílstjórann að stoppa og steig áhyggjufullur út úr stóru flottu limmósínunni, gekk til annars mannsins og spurði af hverju þeir væru að bíta gras?
  Maðurinn svaraði að það væri vegna þess að þeir ættu ekki pening til ad kaupa mat og því þyrftu þeir að gera sér gras að góðu.
  Bankamaðurinn varð hissa og bauð manninum að koma með sér heim í stóra glæsihúsið.  Hann skuli gefa fátæka manninum nóg að borða.
  Fátæki maðurinn svaraði að hann gæti ekki komið því hann ætti konu og 2 börn og benti í átt til trés skammt frá þar sem konan og börnin voru á beit.
  Bankamaðurinn sagði að auðvitað kæmu konan og börnin með. Bankamaðurinn snéri sér svo að hinum manninum og bauð honum einnig med því nóg pláss var í stóru flottu limmósínunni.
  Maðurinn þakkaði fyrir sig en sagðist því miður ekki geta komið því hann ætti konu og 6 börn Bankamaðurinn bauð þeim að koma með líka.
  Þegar allur hópurinn var kominn upp í stóru flottu limmósínuna og þau lögð af stað í glæsihúsið gat annar mannanna ekki á sér setið og grátklökkur þakkaði hann bankamanninum fyrir góðmennskuna:  "Kæri bankamaður,  þú ert mjög góður maður.  Í kvöldbænum mínum skal ég biðja guð um að blessa þig á hverjum degi."
  Bankamaðurinn svaraði:  "Þetta er alveg sjálfsagt og allir myndu gera það sama í mínum sporum. Ykkur á eftir að líka vel heima hjá mér því garðurinn minn er stór og grasið alveg 20 cm hátt, fallega grænt og safaríkt."

----------------------------------------------------------------------------------------

  "Sjáið þið ekki veisluna,  drengir?" spurði Árni M.  Mathiesen hæðnislega í ræðupúlti á alþingi þegar þingmenn vöktu athygli á að viðvörunarbjöllur um yfirvofandi kreppu væru farnar að hringja óþægilega hátt. 

Árni versti bankamaðurinn?

Missið ekki af frábærum útvarpsþætti á morgun (laugardag)

  Einn alskemmtilegasti þáttur í íslensku útvarpi er síðdegisþáttur Markúsar Þórhallssonar og Halldórs Einarssonar á Útvarpi Sögu á laugardögum,   Í vikulokin.  Þátturinn hefst klukkan 13:00.  Klukkan 14:00 dregur til tíðinda.  Þá verður fjallað um þjóðsagnapersónuna frábæru og náttúrubarnið Önnu á Hesteyri.  Það eru yfirgnæfandi líkur á að gamli maðurinn sem hér bloggar mæti til leiks og taki þátt í umfjöllun um þessa stórkostlegu frænku.  Pabbi Önnu og afi minn voru bræður.  Anna er ævintýri og umfjöllun um hana getur ekki orðið annað en ævintýralega skemmtileg.

  Fyrir þá sem eru utan útsendingarsvæðis Útvarps Sögu er um að gera að hlusta á netinu www.utvarpsaga.is

Einstaklega glæsilegt tilboð aðeins fyrir lesendur þessa bloggs!

  Hvernig sem á því stendur þá er lesendum þessa bloggs boðið að eignast bókina  Meðan hjartað slær  á glæsilegu tilboðsverði.  Almennt verð er um 5000 krónur (eða 4980,-).  Blogggestum mínum býðst bókin hinsvegar á aðeins 3200 krónur og sendingarkostnaður er innifalinn.  Undirtitill bókarinnar er  Lífsreynslusaga Vilhjálms Þórs Vilhjálmssonar hárskera.  Vilhjálmur er betur þekktur sem Villi Þór rakari.  Skrásetjari bókarinnar er blaðamaðurinn Sigurður Þór Salvarsson.

  Lífsreynslusaga Vilhjálms Þórs Vilhjálmssonar er einstök saga manns, sem þrátt fyrir fleiri áföll á  lífsleiðinni en gengur og gerist býr yfir fádæma lífsgleði og baráttuþreki.   Stór hluti þjóðarinnar fylgdist með baráttu dóttur hans, Ástu Lovísu,  við ólæknandi krabbamein en hún vakti landsathygli fyrir baráttu sína við sjúkdóminn, en veikindum sínum lýsti hún á bloggsíðu sinni og í viðtölum í sjónvarpi.  Tímaritið Ísafold útnefndi hana Íslending ársins 2006. Hún lést síðan 30 maí 2007.

  Þetta er ekki eina áfallið sem dunið hefur á Villa Þór.  Í þessari bók deilir hann með okkur ævi sinni sorgum og sigrum og kennir okkur að horfa ávallt fram á veginn.

 

UPPLÝSINGAR VARÐANDI PÖNTUN BÓKARINNAR:

Mjög áríðandi er að fólk taki fram heiti bókarinnar og tilboðsverð hennar þegar pantað er því margar pantanir berast á netfangið varðandi ýmsar bækur og tilboðsverðið sem hér er í boði er einstakt og það  lang lægsta sem nokkurstaðar er í boði.

Ef það fylgir ekki með þá verða e.t.v. mistök t.d. varðandi verð bókarinnar.  Pantanir berist með tölvupósti sent á netfang [e-mail] með eftirfarandi upplýsingum:

1.       Nafn

2.      Heimilisfang

3.      Kennitala

4.      Pöntun (þ.e.a.s. bókarheiti og tilboðsverð)

.

GREIÐSLU FYRIRKOMULAG:Einfaldast fyrir báða aðila er að nýta sér kreditkortaþjónustu og þá þarf kortanúmer (16 tölustafir) og gildistími að fylgja pöntuninni.Þeir sem vilja geta einnig fengið sendan gíróseðil.Að auki er hægt að panta í síma 695-4983 eftir kl 18.00.

Rúnar Júlíusson - Örfá minningarorð

  Hr.  Rokk er fallinn frá,  mesti eðaltöffari íslensku rokksögunnar en jafnframt mesta ljúfmennið.  Ferill hans var einkar farsæll.  Ungur maður sló hann í gegn sem söngvari og bassaleikari vinsælustu hljómsveitar landsins,  Hljóma,  á fyrri hluta sjöunda áratugarins.  Í lok áratugarins tók hann þátt í stofnun fyrstu íslensku "súpergrúppunnar",  Trúbrots.  Að nokkrum árum liðnum voru Hljómar endurreistir.  Þá gafst Guðmundi Rúnari Júlíussyni loks næði til að semja lög.  Fyrsta lagið hans,  Tasko Tustada,  er besta lagið á plötunni  Hljómar ´74.  Þetta lag er sömuleiðis eitt af bestu lögum íslenskrar dægurlagamúsíkur.

  Á síðari hluta áttunda áratugarins og næstu ár þar á eftir var Rúnar mest í léttpoppi.  Hann var orðinn plötuútgefandi og vann með Hemma Gunn,  Gylfa Ægissyni og gerði út hljómsveitina Geimstein,  samnefnda plötufyrirtækinu.  Áður gerði hann nokkrar plötur með poppsveitinni Ðe Lonlí Blú Bojs og sendi frá sér sólóplötu.

  Á níunda áratugnum gerðu ungir pönkarar og nýrokkarar rækilega uppstokkun á íslenska poppmarkaðnum.  Með Bubba Morthens í fararbroddi gengu nýir tímar í garð.  Eldri popparar áttu erfitt uppdráttar árum saman og það andaði köldu í þeirra garð.  Þetta snerti Hr.  Rokk lítið og hann stofnaði með Bubba rokksveitina GCD.  Sú hljómsveit naut mikilla vinsælda.  Einnig söng Rúnar inn á plötu með nýrokksveitinni Unun. 

  Rúnar starfaði mikið með yngri tónlistarmönnum,  sonum sínum,  hljómsveitinni Fálkum og í fyrra söng hann inn á lag með ungum rappara.

  Rúnar gerði engan mannamun.  Hann umgekkst alla á sama hátt.  Alþýðlegur,  jákvæður,  elskulegur og pínulítið eins og kærulaus.  Hann er einn örfárra í rokkbransanum sem ég hef aldrei heyrt neinn viðhafa um eitt einasta neikvætt orð.  Þvert á móti eru samferðamenn ákafir í að hlaða á hann lofi.  Það voru forréttindi og mannbætandi að kynnast þessum úrvalsdreng.  Við deildum sameiginlegum áhuga á reggae-músík áður en reggae varð "in".  Við vorum báðir miklir aðdáendur Jimmy Cliff.  Og reyndar líka rokkara á borð við Hendrix og Led Zeppelin.

  Þegar tekin eru lengri blaðaviðtöl við tónlistarmenn er venjan sú að þeir fái að lesa viðtalið yfir fyrir birtingu.  Rúnar sá enga ástæðu til að yfirfara viðtöl við sig fyrir birtingu.  "Ef ég hef sagt eitthvað klaufalegt þá verður það bara að standa.  Maður fer ekkert að falsa það eftir á,"  var viðkvæðið hjá honum.

  Ég votta aðstandendum Rúnars samúð mína.

Æsispennandi prjónabók

  Aldeilis flestum að óvörum nema höfundunum sjálfum var að koma út splunkuný íslensk prjónabók,  Prjóniprjón.  Þetta er hörkuspennandi bók sem inniheldur 35 óvæntar,  litríkar,  snjallar og skemmtilegar uppskriftir sem henta byrjendum jafnt sem lengra komnum.  Hér er komin jólagjöf handa strákum og körlum á öllum aldri.  Áreiðanlega munu konur á ýmsum aldrei taka bókinni fagnandi líka.

  Prjóniprjón er eftir Halldóru Skarphéðinsdóttur og Ragnheiði Eiríksdóttur (ekki þá sem kennd er við hljómsveitina Unun).  Prjón/n er í hvers manns kjöltu þessa dagana.  Enda fátt meira róandi en handleika prjóna.  Sömuleiðis eiga margir notalega samveru yfir prjóni.  Þar fyrir utan er bráðhollt og örvandi fyrir hugsun og sköpunargleði að finna nýjar leiðir og lausnir í prjónaskap..

Útgáfugleði Prjóniprjóns verður í Nálinni, Laugavegi 8, föstudaginn 5. desember kl. 17.30-19. Allir eru velkomnir.  Partýið heldur síðan áfram á Café NoCo, Odengatan 47 í Stokkhólmi, daginn eftir,  laugardaginn 6.  desember kl. 10-13.

Um höfundana:

.
Halldóra býr ásamt fjölskyldu sinni í Sveppaskógi norður af Stokkhólmi í húsi fullu af garni og prjónar af lífi og sál á milli þess sem hún sinnir vísindastörfum við háskólann í Stokkhólmi. Kjörorð: "Meira prjón - meiri gleði".

.

Ragnheiður er hjúkrunarfræðingur og starfar sem nýsköpunar- og þróunarstjóri hjá BHM. Hún hefur ýmislegt fleira í pokahorninu og vill beita svipaðri hugmyndafræði á áhugamálin sín þrjú; prjón, kynlíf og eldamennsku.  
Kjörorð: "Prjón, frelsi og hamingja".  

.

Bókin er gefin út af höfundunum sjálfum og fæst í hannyrðaversluninni Nálinni, Laugavegi 8.  Einnig er hægt að panta bókina í póstkröfu á [e-mail].  

Spaugilegar þýðingavillur

  Fyrir ólympíuleikana í Kína brugðu Kínverjar á það ráð að merkja á ensku ýmsar verslanir,  matsölustaði og og aðrar þjónustur.  Ástæðan var hugsanlega sú að fáir utan Kína geta lesið kínversku þannig að nokkurt vit sé í.  Kínverjar almennt kunna ekki ensku en í Kína eru til ágæt forrit sem þýða úr kínversku yfir á ensku.  Vegna vankunnáttu Kínverja í ensku urðu þeir að treysta á þýðingarforritið.  Hér að ofan sést ein útkoman.  Þar stendur á ensku að þýðingin hafi ekki tekist.  Vel og vandlega merkt en blessaðir Kínverjarnir halda að þarna standi á ensku upplýsingar um þjónustu.

  Hér hafa hinsvegar Japanir klúðrað einhverju.  Drykkurinn virðist heita Gæludýrasviti og mynd af hundi bendir til þess að þetta sé hundasviti.  Hundar svitna hinsvegar ekki.  Það fylgir sögunni að á japönsku heiti drykkurinn Sætindi Pat(riks).

Ný bráðskemmtileg bók um töframann

  Þegar ég var unglingur var Baldur Brjánsson töframaður skær stjarna.  Hann var afar fær töframaður og útfærði mörg töfrabrögðin á gamansaman hátt.  Sýningar hans voru stórfengleg skemmtun.  Nú hefur Gunnar Kr.  Sigurjónsson,  hljómborðsleikari hljómsveitarinnar Prímó,  skráð ævintýralegt lífshlaup Baldurs og gefið út í bókinni Töfrum líkast - Saga Baldurs Brjánssonar töframanns.

  Baldur er ennþá virtasti töframaður Íslands.  Hann hefur stundum verið kallaður leyndardómsfyllsti maður landsins;  bæði vegna þess leyndarhjúps sem hvílir yfir áhrifamiklum töfrabrögðum hans og einnig vegna þess að hann hefur lítið verið fyrir að opna sig í fjölmiðlum.  Í bókinni lætur hann á hinn bóginn allt vaða. 

  Ævintýrin eru mörg:  Skítafýlusprengur eru sprengdar í Borgarbíói á Akureyri. Rakvélablöð eru borðuð með bestu lyst. Úrum, veskjum og brjóstahaldara er nappað af blásaklausu fólki. Löggubíl er ekið undir áhrifum. Í sjónvarpssal er gerður uppskurður með berum höndum – með þeim afleiðingum að morðhótun berst Baldri í kjölfarið. Og hvað skyldi hafa orðið um hvítu dúfuna?

  Fyrir nokkrum dögum skrifaði ég umsögn um bókina  Tabú - Ævisögu Harðar Torfa.  Smári Valgeirsson varð mikill örlagavaldur í lífi Harðar er hann birti blaðaviðtal við Hörð þar sem Hörður upplýsti alþjóð um að hann væri hommi.

  Svo sérkennilega vill til að Smári var ekki síðri áhrifavaldur í lífi Baldurs.

Baldur Brjánsson fæddist að Skáldalæk í Svarfaðardal. Hann er sonur Brjáns Guðjónssonar frá Svarfaðardal og Ragnheiðar Hlífar Júlíusdóttur frá Dalvík. 

Æðislega flott og frumleg listaverk

  Þessar ljósmyndir sýna raunveruleg listaverk.  Það hefur ekkert verið átt við myndirnar í fótósjoppi.  Listaverkið á myndinni hér fyrir ofan er búið til úr raunverulegu heimilisrusli,  aðallega dósum undan gosdrykkjum og bjór.  En einnig ýmsu öðru.  Það er skuggamyndin sem ruslahrúgan myndar í bakgrunni sem gerir listaverkið áhugavert.

  Í fljótu bragði  virðist kraninn svífa í lausu lofti og dæla endalaust frá sér vatni,  eins og skrúfað sé frá krana.  Leyndarmál hönnunarinnar er það að vatnið sem bunar úr krananum hylur járnrör sem heldur krananum uppi og sér krananum jafnframt fyrir nægu vatni. 

  Þetta er auglýsing sem er útfærð í svona glæsilegri þrívídd.

Jólabækurnar í ár

  Jólabækurnar eru farnar að streyma í hús sem aldrei fyrr.  Einhverra hluta vegna eru allar nýju bækurnar sem ég les þessa dagana frásagnir af daglegu lífi fólks eða ævisögur af einhverju tagi.  Það er hið besta mál.  Þetta eru eftirfarandi bækur:

Ég hef nú sjaldan verið algild - Ævisaga Önnu á Hesteyri.  Skráð af Rannveigu Þórhallsdóttur.  http://www.jensgud.blog.is/blog/jensgud/entry/712385/

Sá einhverfi og við hin.  Skráð af Jónu Á.  Gísladóttur,  www.jonaa.blog.is.

Tabú - Ævisaga Harðar Torfa.  Skráð af Ævari Erni Jósepssyni.  http://www.jensgud.blog.is/blog/jensgud/entry/729597/

Gullstokkur gamlingjans.  Æskuminningar Vilhjálms Hjálmarssonar á Brekku.  http://www.jensgud.blog.is/blog/jensgud/entry/713864/

Töfrum líkast - Saga Baldurs Brjánssonar töframanns.  Skráð af Gunnari Kr.  Sigurjónssyni.

Eric Clapton - Sjálfsævisaga. 

  Þessum bókum mun ég öllum gera ítarleg skil á næstu dögum.  Ég er aðeins kominn með eina splunkunýja plötu í hús.  Það er  Spegill sálarinnar  með  Herberti Guðmundssyni.  Ég er að hlusta á hana á fullu og skrifa fljótlega umsögn.

Leyndarmálið upplýst

  Í næstu færslu hér á undan eru ljósmyndir af þýskum götulistamanni.  Hann svífur í lausu lofti fyrir ofan höfuð undrandi áhorfenda.  Að vísu þarf hann að styðja sig við húsbyggingu.  Þarna eru brögð í tafli.  Á myndinni hér fyrir neðan sést hvernig þetta er gert.  Höndin sem styður við vegginn er plathönd.  Hún er skrúfuð föst í vegginn.  Á hinum enda hennar er útbúnaður,  ólar sem halda manninum þægilega uppi.

Magnað töfrabragð

  Þessi þýski götulistamaður virðist hafa yfirstigið þyngdarlögmálið.  Hér og þar birtist hann í þýskum verslunargötum og svífur rétt fyrir ofan höfuð undrandi vegfarenda sem nudda á sér augun og trúa vart því sem horft er á.  Áttið þið ykkur á því hvernig götulistamaðurinn fer að þessu?  Gaman væri að fá tillögur.  Kauði beitir brögðum.  Hann hefur ekki sigrað þyngdarlögmálið í alvörunni.

  Klukkan 11 í kvöld upplýsi ég leyndarmálið.

Bókarumsögn

Titill:  Tabú - ævisaga Harðar Torfa

Skrásetjari:  Ævar Örn Jósepsson

Útgefandi:  Tindur bókaútgáfa

Einkunn:  **** (af 5)

  1975 var Hörður Torfa einn virtasti og vinsælasti skemmtikraftur landsins.  Lög hans hljómuðu daglangt í útvarpi,  hann var eftirsóttur leikari og fyrirsæta,  lék á sviði og í sjónvarpinu og leikstýrði leikhúsum þvers og kruss um landið.  Þá fór allt skyndilega á hvolf.  Hörður lýsti því yfir í blaðaviðtali að hann væri hommi.  Þetta var sprengja.  Fólk varð agndofa.  Samkynhneigð var eitthvað er ekki var talað um opinberlega.  Það voru óskrifuð lög að samkynhneigð ætti að vera í felum.

  Karlmenn sem voru óöruggir um kynhneigð sína tóku upp á því að ofsækja Hörð.  Ofsóknirnar gengu það langt að Hörður flýði land.

  Í útlegð kynnti hann sér réttindabaráttu samkynhneigðra erlendis,  snéri aftur til Íslands og stofnaði Samtökin 78.  Hörður sættir sig ekki við ranglæti.  Víða í bókinni bregður fyrir orðinu óréttlæti og lýsingu á því að Herði hafi sárnað og hann reiðst.  Eftir lestur bókarinnar er rökrétt og eðlilegt að sjá Hörð standa fyrir vikulegum mótmælafundi á Austurvelli eða berjast fyrir endurupptöku á brottvísunarmáli Pauls Ramses.  Á þessi mál er ekki minnst í bókinni.  En þar sem rétti er hallað má reikna með að Hörður láti til sín taka.

  Í bókinni leiðir Hörður lesandann inn í skrautlegan heim homma á Íslandi fyrir daga Samtakanna 78.  Við þann lestur rekur maður upp stór og útstæð augu að hætti Ástþórs Magnússonar.  Þetta hefur verið hið litríkasta samfélag.  Af bókinni má skiljast að þetta sé veröld sem var.  Enda fáir að velta fyrir sér kynhneigð fólks í dag.   

  Það er dapurlegt að lesa um það mótlæti sem Hörður hefur þurft að takast á við og náði hámarki eftir blaðaviðtalið.  Án þess að draga neitt undan er Hörður þó ekki að velta sér um of upp úr erfiðleikunum.  Hann horfir líka á broslegu hliðarnar.  Við lesturinn hefur lesandinn ekki fyrr dæst yfir óréttlæti heimsins en hann skellir upp úr við atvik eins og þegar Herði var sýnt morðtilræði.  Blóðið fossaði úr skurði niður eftir bringunni en Hörður hugsaði bara um ósvífni mannsins að skemma skyrtuna.  Nýja og dýra skyrtu.  Eða þegar Hörður fór í margra daga eins manns verkfall á fjölmennum vinnustað.  Eða er Hörður flýði á harðahlaupum frá stúlku sem vildi trúlofast honum.  Eða þegar Reynir Oddsson kvikmyndagerðamaður fékk alltaf í bakið ef verklegar framkvæmdir stóðu fyrir dyrum.  Eða er Hörður var vaktaður af lögreglunni og færði lögreglumönnunum liti og litablokk til að létta þeim tilveruna.  Þannig mætti áfram telja.

  Bókin er lipurlega skrifuð.  Það er vel til fundið að enda hvern kafla á kvæði við hæfi.  Það undirstrikar að bókin fjallar um ljóðskáld.  

  Bókin á erindi til allra og ætti að vera notuð við kennslu í skólum.  Þessa bók á líka að þýða og gefa út erlendis.  Til að mynda í Færeyjum. 

  Saga Harðar segir mikið um íslenskt samfélag.  Sem músíkdellukarl hef ég sérstaklega gaman af að lesa um tónlistarmanninn Hörð Torfa.  Þar koma fram ýmsir fróðleiksmolar á borð við þann að fyrsta plata Harðar var fyrsta platan sem var hljóðrituð í steríó á Íslandi.  Áhugasamir um leiklist finna sömuleiðis margan forvitnilegan fróðleikinn fyrir sig í bókinni.    

  Þegar ég fór á kynningu á bókinni í Iðnó fékk ég símtal frá útlöndum sem ég varð að afgreiða.  Til að trufla samkomuna ekki færði ég mig út í bíl.  Að símtalinu loknu hélt ég áfram að glugga í bókina.  Og gleymdi mér við lesturinn.  Las bókina til enda.  Hrökk þá upp við að mér var orðið hrollkalt í bílnum.  Kynningardagskráin í Iðnó var áreiðanlega löngu um garð gengin.  Þannig að ég keyrði bara heim og hóf að lesa bókina í annað sinn.  Þetta segir sitthvað um hversu áhugaverð lesning bókin er.

  Þegar ég hef verið að glugga frekar í bókina sakna ég nafnskrár aftast í henni.  Það er svo þægilegt að finna aftur með aðstoð nafnskrár eitthvað sem gaman er að lesa betur.  Einnig sakna ég þess að í bókinni sé ekki heildarlisti yfir plötur Harðar með tilheyrandi upplýsingum (upptalningu á lögum,  útgáfuár og þess háttar).  Á tölvuöld er svo sem hægt að finna eitthvað af þessum upplýsingum á www.hordurtorfa.com.   

Hvað er ást?

  

 Spurningin “Hvað er ást?” var lögð fyrir hóp fjögurra til átta ára barna. Svörin koma skemmtilega á óvart: 

'Þegar amma mín fékk liðagigtina gat hún ekki beygt sig niður til að lakka táneglurnar lengur.
Svo að afi minn gerði það alltaf fyrir hana jafnvel eftir að hendurnar hans fengu liðagigt líka. Það er ást.'
Rebekka 8 ára



'Þegar einhver elskar þig, segja þeir nafnið þitt öðruvísi. Þú bara veist að nafnið þitt er öruggt í munninum á þeim.' 
Vilhjálmur – 4 ára

'Ást er þegar stelpa setur á sig ilmvatn og strákur setur á sig rakspíra og þau fara út og lykta af hvort öðru.'
Karl – 5 ára

'Ást er þegar þú ferð út að borða með einhverjum og hann gefur þér frönskurnar sínar án þess að láta þig gefa sér nokkuð af þínum eigin.' 
Kristín – 6 ára

Ást er það sem lætur þig brosa þegar þú ert þreytt.'
Terri – 4 ára

'Ást er þegar mamma gerir kaffi handa pabba og hún tekur sopa áður en hún gefur honum það til að vera viss um að bragðið sé í lagi.'
Daníel – 7 ára

'Ást er þegar þið kyssist öllum stundum. Síðan þegar þið eruð þreytt á að kyssast viljið þið enn vera saman og tala meira. Mamma mín og pabbi eru þannig. Það er ógeðslegt þegar þau kyssast'
Emil – 8 ára

'Ást er það sem er með þér í stofunni á jólunum ef þú stoppar að taka upp gjafirnar og hlustar.'  
Robert – 7 ára (Vá! Djúpt)

'Ef þú vilt læra að elska meira skaltu byrja á vini sem þú hatar,'
Nikulás – 6 ára
(við þurfum nokkrar milljónir af Nikkum á þessa jörð)  

'Ást er þegar þú segir strák að þér finnist skyrtan hans falleg, og þá gengur hann í henni alla daga.'
Norma – 7 ára  

'Ást er eins og lítil gömul kona og lítill gamall maður sem eru enn vinir jafnvel eftir að þau kynnast hvort öðru svo vel.'
Tommi – 6 ára

'Þegar ég var með píanótónleikana mína, var ég á sviði og ég var hrædd. Ég leit á allt fólkið sem horfði á mig og sá pabba minn veifa og brosa. Hann var sá eini sem gerði það. Ég var ekki hrædd lengur' 
Sigga – 8 ára

'Mamma mín elskar mig meira en nokkur annar.
Þú sérð engan annan kyssa mig góða nótt á kvöldin.'  
Klara – 6 ára

'Ást er þegar mamma gefur pabba besta hlutann af kjúklingnum.'
Elín - 5 ára



'Ást er þegar mamma sér pabba illa lyktandi og sveittan og segir enn að hann sé myndarlegri en Bubbi Morthens.'  
Kristinn – 7 ára

'Ást er þegar hvolpurinn þinn sleikir þig í framan eftir að þú skildir hann eftir einan allan daginn.'
María – 4 ára  

'Ég veit að stóra systir mín elskar mig vegna þess hún gefur mér öll gömlu fötin sín og verður að fara í búðina og kaupa ný.'
Lára – 4 ára

'Þegar þú elskar einhvern, fara augnhárin upp og niður og litlar stjörnur koma út úr þér.' (þvílík sýn)
Karen – 7 ára

'Þú ættir ekki að segja “Ég elska þig” nema þú meinir það. En ef þú meinar það áttu að segja það oft.  Fólk gleymir.'
Jóhanna – 8 ára

Og að lokum:

4 ára gamall drengur átti gamlan herramann að nágranna sem hafði nýlega misst konuna sína.
Þegar hann sá gamla manninn gráta, fór litli drengurinn inn í garð herramannsins, klifraði upp í kjöltu hans og sat þar. Þegar móðir drengsins spurði hann hvað hann hafði sagt við gamla manninn svaraði drengurinn: “Ekkert. Ég bara hjálpaði honum að gráta”

Bráðfyndin hönnun

  Þessar ljósmyndir var ég að fá sendar og hló mikið af skemmtilegum húmor hönnuðanna.  Ég er viss um að hann kemur ykkur líka í gott skap.

Afmælisveisla Fræbbblanna í kvöld - öllum boðið!

  Hljómsveitin síspræka Fræbbblarnir fagnar þrítugsafmæli sínu með stæl á Grand Rokk í kvöld,  fimmtudaginn 27.  nóvember.  Fræbbblarnir eru lífseigasta pönkhljómsveit landsins og var ein allra fyrsta íslenska pönkhljómsveitin.  Á þrjátíu ára ferli hefur hljómsveitin sent frá sér 87 lög á plötu og efni á næstu plötu er að mestu tilbúið.  Hún hefur vinnutitilinn "Puttinn". 

  Lög af "Puttanum" verða á dagskrá Fræbbblanna í kvöld í bland við gömlu góðu "standardana" af fyrstu plötum Fræbbblanna.  Hljómleikarnir hefjast klukkan 22:00.  Það er frítt inn og bjórinn verður á eldgamla genginu.  Sem er vel við hæfi því Fræbbblarnir lögðu sitt af mörkum í baráttunni fyrir því að bjór væri leyfður á Íslandi.

www.fraebbblarnir.com

Frábærlega fyndnar ljósmyndir

   Nú þegar hundur er í mörgum vegna bankahrunsins er við hæfi að ná fram brosi með aðstoð þessara bráðskemmtilegu hundamynda.

 Það þurfti ekki mikið til að laða fram bros hjá þessum.  Það dugði að upplýsa hann um það sem satt er:  Að í Færeyjum eru menn sagðir vera hundasjúkir ef þeir eru með það sem við köllum þynnku eða timburmenn.

   Litli hundurinn er snöggur að víkja sér undan árás stóra hundsins.  En er samt meðvitaður um að sá stóri sé ólaður og komist ekki langt.  Þess vegna heldur sá litli "kúlinu" með því að færa sig ekki lengra en þarf.

   Kötturinn ætlaði bara að kitla hvutta til að ná fram brosi hjá honum.  Hvutti heldur hinsvegar að þetta sé smekklaus árás á sig og jafnvel upphaf á einelti.

   Þessi er hundfúll yfir að vera skilinn eftir einn tjóðraður við sandpott.  Frekar en gera ekkert í málinu gerir hann bara eitthvað.