Jólafjör í kvöld

  Ég held að ég fari rétt með að jólafjörið í kvöld sé á skemmtistað í Pósthússtræti er heitir Central.  Eða eitthvað álíka.  Þar mun söngvarinn síkáti Geir Ólafs halda uppi fjöri frá klukkan 23:00.  Syngja  Jólamaðurinn kemur í kvöld  og fleiri hressileg jólalög.  Ef ég fer ekki rétt með nafn skemmtistaðarins væri ljúft ef einhver leiðréttir það. 

Það getur verið gott að vita þetta

 

  Eftirfarandi fékk ég sent undir yfirskriftinni "Fyrir þig sem borðar helst bara fisk :)".  Það er upplagt að miðla þessum fróðleik til fleiri.  Ég hef grun um að einhver annar en ég borði fisk og geti gert sér að góðu þessar upplýsingar.  Svo undarlega vill til að ég hef nokkrum sinnum snætt á umræddum stað.  Meðal annars gerði ég grein fyrir einni heimsókninni þangað:  http://jensgud.blog.is/blog/jensgud/entry/643187

  Þann 8. desember 2006 opnaði Erna Kaaber veitingastaðinn Icelandic fish & chips Organic Bistro að Tryggvagötu 8, á horni Tryggvagötu og Norðurstígs, rétt fyrir ofan smábátabryggjurnar.  

  Eins og nafnið ber með sér býður staðurinn upp á djúpsteiktan fisk og bakaðar kartöflur.  Það sem aðgreinir staðinn frá öðrum sem bjóða sambærilegt er að leitast er við að gera réttina eins holla og hugsast getur,  m.a. með því að nota ekki hefðbundið orly deig heldur deig sem inniheldur ekki hvítt hveiti.  Mikið er lagt upp úr að bjóða gestum salat og auka þar með á hollustu réttanna og síðast en ekki síst má til að nefna sósu úr skyri sem fylgir og má velja úr sex bragðtegundum, en þessar sósur ásamt deiginu eru sérstaða þessa veitingastaðar.  

  Erna hefur þróað deigið og sósurnar í samráði við matgæðinginn David Rosengarten, en hann er þekktur fyrir matarklúbb sinn þar sem hann leiðbeinir sælkerum um gæði í mat og drykk.  Deigið er leynd uppskrift og skyrsósurnar hefur Erna skrásett undir vörumerkinu “Skyronnes”

  Staðarinn er opinn alla daga frá 12-21, nema sunnudaga þá er opið frá 17-21.  Um hátíðirnar er lokað 24. og 25. desember og einnig nýjársdag, en föstudaginn 26. annan í jólum er opið 17-21, laugardag og sunnudag 27. og 28. desember frá 14-21 og gámlásdag frá 12-16.

  Verðlag er verulega stillt í hóf og upplagt að líta inn og smakka hollan og góðan mat hvort sem er á staðnum, eða taka með heim.  Icelandic fish & chips Organic Bistro er klárlega spennandi staður sem vert er að prófa.

www.fishandchips.is

Missið ekki af sögulegum útvarpsþætti á morgun (laugardag)

 

  Fólk sem hefur gaman af að hlusta á skemmtilegt útvarp er óvenju árrisult á laugardögum.  Mestu svefnpurkur reyna að vakna ekki seinna en klukkan 13:00.  Þá hefst nefnilega einn allra skemmtilegasti þáttur í íslensku útvarpi,  Í vikulokin.  Hann er í umsjón Markúsar Þórhallssonar og Halldórs Einarssonar.  Þeir félagar fara á kostum og ætíð ber margt til tíðinda.  Á morgun nær þátturinn hæstu hæðum um klukkan 14:00.  Það er einmitt um það leyti sem söngvarinn síkáti,  Geir Ólafs,  mætir til leiks og ræðir um lag sem hann syngur á færeysku,  Jólamaðurinn kemur í kvöld.  Að mér skilst þá mæti ég einnig. 

  Útvarp Saga sendir út á tíðninni 99,4.  Það er líka hægt að hlusta á hana á netinu.  Slóðin er www.utvarpsaga.is.

Upplýsingar vegna greinar í Fréttablaðinu

  Í Fréttablaðinu í dag er merkileg grein eftir blaðamanninn Kjartan Guðmundsson.  Fyrirsögnin er  Poppbókin - enn í fyrsta sæti.  Greinin fjallar um bók sem kom út 1983.  Kjartan segir Árna Daníel Júlíusson fá undarlega veglegan sess í Poppbókinni.

  Málið er mér skylt.  Þess vegna sé ég ástæðu til að draga fram eftirfarandi:  Árni var áberandi í þeim hópi sem hratt pönk- og nýbylgjunni úr hlaði á Íslandi ´79/´80.  Hann blés í saxófón í einni af allra fyrstu íslensku pönksveitunum,  Snillingunum.  Hann var maðurinn sem kýldi á hlutina og lét verkin tala.  Sem dæmi þá stóð hann fyrir fyrstu hljómleikum  Utangarðsmanna.  Hljómleikunum sem ollu straumhvörfum í sögu íslenska rokksins.

  Árni Daníel spilaði á bassa í  Taugadeildinni  og hljómborð með  Tea for Two  og  Q4U.  Þegar bókin kom út var Q4U stórt nafn.  Kvikmyndin  Rokk í Reykjavík  var frumsýnd árið áður og hafði gífurlega sterk áhrif á það sem var að gerast í rokkinu.  Q4U var áberandi í myndinni.  Platan með lögunum úr myndinni seldist vel.  Myndbandsspólan með  Rokk í Reykjavík var nýlega komin út þegar bókin var skrifuð.  Spólan seldist eins og heitar lummur og var mjög umtöluð.  Q4U sendi frá sér plötu þarna um sumarið og lagið  Böring  af henni naut mikilla vinsælda.    

  Þetta var þó ekki megin ástæðan fyrir því að í  Poppbókinni  er viðtal við Árna Daníel heldur að hann hafði mikinn sagnfræðilegan áhuga á rokkmúsík.  Hann las allt sem hann komst yfir um rokkmúsík.  Hann skrifaði vikulega heilu og hálfu opnugreinarnar um rokkmúsík í DV og Vikuna.  Hann velti öllum flötum rokkmúsíkur fyrir sér,  skoðaði þá og skilgreindi.  Hann sótti alla rokkhljómleika sem voru í boði á suðvesturhorni landsins.  Hann kynnti sér allar íslenskar rokkplötur sem komu út og flestar þær helstu sem komu út erlendis.  Hann var einn mesti viskubrunnur landsins um þann suðupott sem kraumaði í rokkmúsík þessara ára.  Árni Daníel þekkti þennan pott frá öllum hliðum:  Sem innsti koppur í búri,  hljóðfæraleikari og tónleikahaldari, sem blaðamaður, sem fræðimaður.  Ef einhverjum vantaði upplýsingar um eitthvað sem hafði gerst,  var að gerast eða var framundan í íslensku rokksenunni var hringt í Árna Daníel.  Hann var maðurinn sem vissi allt.

  Það kom ekki á óvart að skömmu eftir útkomu Poppbókarinnar skellti Árni Daníel sér í sagnfræðinám.  Síðan hefur hann skrifað fjölda bóka um allt frá íslenskum landbúnaði til jarðeigna kirkjunnar á Íslandi.

  Þar fyrir utan er Árni Daníel úr Svarfaðardal.   

  Ljósmyndin er af Q4U.  Árni Daníel er lengst til hægri.

Skötuveislan byrjuð!

 

  Eftir að verð sjávarréttahlaðborðsins á kvöldin á Sjávarbarnum lækkaði um 50% fyrir nokkrum vikum hef ég setið þar í vellystingum.  Verðið lækkaði úr 2600 krónum í 1300.  Það er lítill peningur fyrir glæsilegt hlaðborð.  Í gærkvöldi brá svo við að á hlaðborðið hafði bæst úrval af kæstri skötu í ýmsum styrkflokkum og ýmsum útfærslum.  Meðal annars hefðbundin skötustappa og einnig hvítlauksskötustappa.  Meðlæti er sömuleiðis fjölbreytt:  hnoðmör,  hamsafeiti,  rófur og margt fleira.  Skötuveislan var enn í kvöld og verður alveg fram að jólum.

  Einnig er á hlaðborðinu saltfiskur af margvíslegu tagi og sitthvað annað. 

  Tekið skal fram að ég hef engin tengsl við Sjávarbarinn önnur en að snæða þar á kvöldin.  Ég þekki ekki eigendur eða starfsfólk.  - Nema í sjón núorðið.  Á hinn bóginn þykir mér rétt og sjálfsagt að upplýsa fólk um þennan ódýra veitingastað. 

- Sjá eldri umsögn:

http://jensgud.blog.is/blog/jensgud/entry/691534

Geir Ólafs hellir sér yfir mig

 

  Í Fréttablaðinu í dag segir söngvarinn síkáti,  Geir Ólafs,  að ég sé þunglyndur bloggari í Breiðholti.  Jafnframt sakar hann mig um að þjást af öfundsýki í sinn garð.  Ástæðan fyrir þessum ruddalegu fullyrðingum er ósköp lítilfjörleg og saklaus.  Mér varð það á að benda á í nýlegri bloggfærslu einkennilegan hlut.  Þannig er að í dagblöðum,  sjónvarpi og útvarpi hefur ítrekað verið slegið upp sem stórfrétt að vinsælasta lagið í Færeyjum um þessar mundir sé sungið af Geir Ólafs.  Svo sérkennilega vill hinsvegar til að lag Geirs um Jólamanninn er ekki að finna á lista yfir 15 vinsælustu lögin í Færeyjum.  Sjá http://jensgud.blog.is/blog/jensgud/entry/746545

  Á þeim sama lista sjást einnig þau næstu 5 lög sem krauma undir Topp 15.  Lag Geirs er ekki heldur þar.  Hvernig stendur á því að meint vinsælasta lagið í Færeyjum um þessar mundir er hvergi að finna á lista yfir vinsælustu lögin í Færeyjum?

  Jú,  Geir kann skýringu á því.  Hún er sú að hann bakkaði bíl sínum á minn bíl fyrir nokkru.  Þetta er nokkuð langsótt skýring.  Og þó.  Ég var á leið út á völl til að ná flugi til Færeyja þegar umferðaróhappið varð.  Flugvélin var farin að bíða eftir mér.  Allt gekk þó lipurlega og snurðulaust fyrir sig.  Bæði ákeyrslan og það sem á eftir fylgdi.

  Burt séð frá ástæðunni þá er það svakalegur áfellisdómur yfir færeyska vinsældalistanum ef hann mælir ekki vinsældir vinsælasta lagsins.  Jafnvel þó listinn myndi einungis klikka á að mæla vinsælasta lagið í 1.  sæti og hafa það í 2. sæti í staðinn væri hann handónýtur og marklaus.  En ef hann mælir ekki vinsælasta lagið í neitt af 15 efstu sætunum og ekki í hóp þeirra 5 laga sem krauma undir þá er vinsældalistinn þvílíkt hneyksli að það gerir færeyska ríkisútvarpið og www.planet.fo - sem birta listann - að aumum og ómarktækum fjölmiðlum.  Fjölmiðlum sem halda kolröngum upplýsingum að almenningi og brjóta gróflega siðareglur blaðamanna. 

  Sé það tilfellið getur enginn heiðvirður maður unnið hjá þessum fjölmiðlum.  Samviska þeirra myndi ekki leyfa.

  Flest sem snýr að samskiptum Íslendinga og Færeyinga fær mikla umfjöllun í færeyskum fjölmiðlum.  Gulli Briem,  trommari Mezzoforte og GCD,  skrapp til Færeyja á dögunum.  Það var forsíðufrétt í eyjablöðunum.  Bara svo dæmi sé nefnt.

  Einhverra hluta vegna fer lítið fyrir umfjöllun í færeyskum fjölmiðlum um meint vinsælasta lagið í Færeyjum.  Netmiðillinn www.planet.fo greinir samviskusamviskulega frá öllu því helsta sem lýtur að músík á eyjunum og víðar.  Nema frá meintu vinsælasta lagi.  Það er hægt að slá nafni Geirs eða lags hans inn í leitarvél síðunnar.  Niðurstaðan er 0 = ekkert finnst.

  Sama er hægt að gera á leitarvélum færeyska útvarpsins,  www.uf.fo,  og dagblaðsins Dimmalætting,  www.dimma.fo.  Leitarvélarnar finna ekkert um meint vinsælasta lagið í Færeyjum.

  Ég les reglulega nokkrar aðrar færeyskar fréttasíður sem ekki eru með leitarvélar,  svo sem www.portal.fo og www.sosialurin.fo.  Ég hef aldrei séð stafkrók um Geir í þessum miðlum - þrátt fyrir að hann sé að sögn ofurvinsæll hjá eyjalýð.

  Til að öllu sé til haga haldið þá er jólalag Geirs spilað á hverjum virkum degi í morgunþætti færeyska útvarpsins.  Svo skemmtilega vill til að þáttastjórnandinn er textahöfundur lagsins.  Hann "prógrammerar" einnig næturspilun útvarpsins.  Svo skemmtilega vill til að lagið er líka spilað í næturútvarpinu.  Það er gott að einhver fær stefgjöld.

  Vissulega væri gaman að sjá lag sungið af Íslendingi í toppsæti færeyska vinsældalistans.  Einnig þætti mér gaman að vera þunglyndur Breiðhyltingur.  Mér veitir ekki af dálitlu þunglyndi til að slá á óþrjótandi léttlyndi og ofurkæruleysi.  Ég held líka að það sé gaman að búa í Breiðholti með útsýni yfir bæinn.  En ég bý nú bara í Vesturbænum.  Óeðlilega hress og kátur.

Upphaf bresku pönkbyltingarinnar IV

  Næst síðustu helgi í febrúar 1977 sendi pönksveitin The Damned frá sér fyrstu bresku pönksbreiðskífuna.  Það sem ég er að reyna að koma á framfæri er að þó Sex Pistols og The Clash hafi verið forystusveitir breska pönksins þá lögðu The Damned og The Buzzcocks drjúgt að mörkum við að stimpla pönkið inn.  Svo og The Stranglers.

  The Damned var fyrst breska pönksveitin til að senda frá sér smáskífu og einnig sú fyrsta sem sendi frá sér breiðskífu.  Breiðskífa The Damned náði 36.  sæti breska vinsældalistans.  Tveimur sætum ofar en fyrsta smáskífa Sex Pistols.

  Þegar hér var komið sögu var fjöldi breskra pönksveita orðnar áberandi í hljómleikahaldi á Bretlandi:  Chelsea,  Generation X,  The Jam,  The Adverts,  Tom Robinson Band, Siouxie & the Banshees,  XTC,  Wire og Adam Ant.

  Lagið hér fyrir ofan er  Neat Neat Neat  með The Damned.

  Upphaf bresku pönkbyltingarinnar:  http://www.jensgud.blog.is/blog/jensgud/entry/746033/

Skemmtilegar hugleiðingar

  Þetta fékk ég sent og kann engin frekari deili á upprunanum.  Höfundur er sagður vera Kalli.  Þess vegna læðist að mér grunur um að hann heiti Karl.  Þar með eru vísbendingar upptaldar.  Ég dreg í efa að höfundurinn sé Karl Sigurbjörnsson biskup.  Þó má það vera.  En fyrsta kvæðið hljómar best sé það raulað við lagið úr Kardimommubænum,  Við læðumst létt...

Við býsna mikið berumst á,
til Bretlands erum farnir.
Í Danmörku flest keyptum, já
við útrásarvíkingarnir.
Við kaupum og seljum út um allt
og græðum meira en hundraðfalt.
Svo græðum við barasta meir og meir
já við Björgólfur, Hannes og Jón Ásgeir.

Við kaupum það sem finnum falt
í flestum skúmaskotum.
Og fljúgum síðan út um allt
á nýjum einkaþotum.
Og enginn spyr okkur ekkert um,
með alla pressuna í vasanum.
Svo græðum við barasta meir og meir
já við Björgólfur, Hannes og Jón Ásgeir.

BANKAMENNIRNIR
Við digrum samning erum á,
svo endalaust við græðum.
Í sjóði landsins nú skal ná
með nýjum hagnaðarfræðum.
Og til að halda okkur gangandi
við ruplum suður á Bretlandi.
Já, það er nú meira, hvað karlinn er klár,
já við Sigurjón, Welding og Heiðar Már.

Við veiðum stundum lax með lús
og leigjum þyrlur allir.
Við byggjum okkur lúxushús
og ljúfar sumarhallir.
Og ökum um á Roverum
og partý með útlendum söngvurum.
Já við erum alls engin meðalgrein flón,
já við Heiðar Már, Welding og Sigurjón.

ÞJÓÐIN (lag: dvel ég í draumahöll úr Dýrunum í Hálsaskógi)
Dvel ég í draumaheim
og dýrka víkingana.
Sólarferðir, borga-geim...
og skíðaferðir plana.
Flatskjár, raðhús, freyðivín,
fellihýsi og sleði.
Svona líður ævi mín
í kaupæði og gleði.

DABBI (lag: Rebbavísur úr Dýrunum í Hálsaskógi)
Hér mætir Dabbi, sjá
með alvæpni ó-já.
Með stýrivexti og verðbólgu
og vaxtahækkun, vá.
Í Svörtuloftum er
og stjórna öllu hér.
Hið litla, montna Glitnis-grey
nú mætti gá að sér.
Ég kalla: "Gagg með kló í Baugsins-skinni,
þá kveð ég, þér ég næ að þessu sinni.
Þó að það kosti kannski hér
að við steytum upp á sker,
þá tek ég bara allt heila klabbið
í hafdjúpið með mér – HA HA HA HA"

JÓHANNA (Kardimommubærinn, lagið hennar Soffíu frænku)
Ja fussum svei, ja fussum svei.
Mig furðar þetta rót.
Í hverju skoti skúm og ryk
og skran og rusl og dót.
Og skuldasúpa út um allt,
en eignir engar finn.
Víkingarnir flugu út
og hirtu afganginn.

Já ástandið er ansi svart,
já allt sem moldarflag.
Og kraftaverk nú þyrfti til
að koma öllu í lag.
Ég hækka bætur, hirði upp drasl
og hreinsa skítinn hér.
Já, núna loksins kom að því.
Minn tími kominn er.

ÚTRÁSARVÍKINGAR OG BANKAMENN (Hvar er húfan mín úr Kardimommubænum)
Hvar er bankinn minn?
Hvar er kaupaukinn?
Hvar er stóri feiti kaupréttarsamningurinn?
Hvar er flugrisinn?
Og hvar er Baugurinn?
Sérðu markað fyrir hlutabréfaviðskiptin?
Ég er viss um að það var hér allt í gær.

Sérðu gjaldeyri?
Sérðu markaði?
Eða síbrosandi stóráhættufjárfesti?
Sérðu þotuna?
Eða jeppana?
Sérðu fylgispöku faguryrtu þjóðina?
Ég er viss um að það var hér allt í gær.

Sérðu Illuga?
stuttbuxnastrákana?
Hvar er Bjarni Ben og menntamálaráðherra?
Hvar er Guðni minn?
og öll Samfylkingin?
Hvar er Björgvin, hvar er Solla, hver er forsetinn?
Ég er viss um að þau voru með í gær.
Já, ég er viss um að þau voru með í gær.



Höfundur: Kalli.

Fyrrum bankastjórar koma ekki að rekstri Nýja Landsbankans

Spilað með fjölmiðla - enn einu sinni

  Fyrir mörgum árum vann ég á auglýsingastofu.  Hluti af vinnunni var að markaðssetja plötur,  bækur og sitthvað fleira.  Oft var gripið til þess að notfæra sér hvað auðvelt er að plata fjölmiðlafólk.  Blessað fjölmiðlafólkið er margt hvert svo saklaust og hrekklaust að það gleypir við fréttatilkynningum eins og heilögum sannleika.

  Fyrir 2 árum var forsíðufrétt í dagblöðum og fyrsta frétt í ljósvakamiðlum að sönghópurinn Nylon væri kominn með lag í 1.  sæti breska dansvinsældalistans.  Þessu fylgdu vangaveltur þar sem gengið var út frá sem vísu að þetta jafngilti heimsfræg.  Enda fjallaði næsta fréttatilkynning um að Nylon væri á leið til Hollywood og stórir hlutir í gangi.

  Raunveruleikinn var sá að lag með Nyloni hafði verið sett á lista EINS plötusnúðar dansstaðs yfir þau lög sem mest voru spiluð tiltekið kvöld.  Gott ef stelpurnar í Nyloni voru ekki gestir á dansstaðnum umrætt kvöld.

   Þetta var álíka stór ávísun á heimsfrægð eins og ef Andrea Jónsdóttir tæki saman eitt kvöldið hvaða lög hún spilar oftast á Dillon einhverja helgina.

  Núna er uppsláttarfrétt í dagblöðunum og meira að segja þungamiðjufrétt í fréttum sjónvarpsins að lag með Geir Ólafssyni tröllríði nú færeyska markaðnum.  Lagið er sagt sitja í efsta sæti færeyska vinsældalistans.

  Rétt er að hafa í huga að Færeyingar eru aðeins 48 þúsund.  Þar gerist fátt.  Þess vegna telst það sjálfkrafa til tíðinda að íslenskur söngvari syngi jólalag á færeysku og færi Færeyingum það í jólagjöf sem þakklætisvott fyrir 6 milljarða króna lán til Íslendinga.

  Staðreyndin er hinsvegar sú að það hefur farið óvenju hljótt um þetta í Færeyjum.  Ég fylgist þokkalega vel með færeyskum fjölmiðlum.  Það er að segja netmiðlum og hlusta töluvert á færeyska ríkisútvarpið og aðra útvarpsstöð sem er í einkaeigu.  Einnig glugga ég reglulega í færeysku dagblöðin.  Ég hef hvergi orðið var við eina einustu umfjöllun um framtak Geirs og aldrei heyrt jólalagið spilað.

  Ég tek fram að framtak Geirs er lofsvert og ég er mjög jákvæður gagnvart því.  Ég er jafnframt viss um að lagið hefur verið spilað í færeyskum ljósvakamiðli og einhversstaðar verið sagt frá því á prenti.

  Í gær ræddi ég í síma við færeyska kunningjakonu.  Hún hafði ekki orðið vör við þetta lag.  Ég "gúglaði" Geir og lagið.  Það skilaði engri niðurstöðu.  Ég fór líka í leit á nokkrum færeyskum netsíðum.  Ekki stafkrók þar að finna. 

  Hér fyrir neðan er listi yfir vinsælustu lögin í Færeyjum síðustu 3 vikur.  Mér sýnist annað lag vera í 1.  sæti en jólalag Geirs.  Ég kem hvergi auga á það lag á þessum lista. 

1	10	(e)	1	2	Faroe 5 / Tell Me Now
2	6	3	2	9	Katy Perry / Hot N´ Cold
3	1	2	1	3	Hogni / Soul Company
4	5	6	4	6	Beyoncé / If I Were A Boy
5	4	1	1	6	Britney Spears / Womanizer
6	8	9	6	6	The Killers / Human
7	2	5	2	5	James Morrison / Broken Strings...
8	11	12	8	10	Christina Aguilera / Keeps Gettin´...
9	12	10	9	5	Kanye West / Heartless
10	13	(e)	10	2	Pink / Sober
11	7	7	7	8	Rihanna / Rehab
12	(e)	-	12	1	Bet You Are William / Electricity
13	(e)	-	13	1	Ann Anthoniussen / So Nice
14	15	(e)	14	2	Kings Of Leon / Use Somebody
15	(e)	-	15	1	Lady GaGa / Poker Face
(e)	-	-	-	-	Akon / Right Now (Na Na Na)
(e)	-	-	-	-	Estelle / Come Over feat. Sean Paul
(e)	-	-	-	-	Bruce Springsteen / Working On A...
(e)	-	-	-	-	Will Young / Grace
(e)	-	-	-	-	Leona Lewis / Run

3					Staða í þessari viku
	(e)				Staða í síðustu viku
		12			Staða í þarsíðustu viku
			5		Hæst á lista
				2	Vikur á listanum

 

Upphaf bresku pönkbyltingarinnar III

  1.  desember 1976 komst breska pönkið óvænt rækilega upp á yfirborðið.  Það var þegar hljómsveitin Queen forfallaðist á síðustu stundu er hún átti að spila í beinni útsendingu á sjónvarpsþættinum  Today.  Í tímahraki var pönksveitin Sex Pistols fengin í viðtal í staðinn. 

  Viðtalið fór fljótlega úr böndum og innan skamms var klippt á útsendinguna.  Orðbragð liðsmanna Sex Pistols og söngkonunnar Siouxie (& The Banshees) þótti fara yfir strikið.  Ég er ekkert að setja hér inn klippu af viðtalinu.  Það er ekkert merkilegt.  Nema fyrir þær sakir að grandvör breska þjóðarsálin fékk hland fyrir hjartað.  Það greip um sig allsherjar móðursýki.  Daginn eftir loguðu símalínur fjölmiðla vegna innhringinga hneykslaðra sem voru í áfalli.  Forsíður dagblaðanna voru undirlagðar hneykslunarorðum.

  Nú vissi breskur almenningur af Sex Pistols og pönkinu.  Næstu daga kepptust fjölmiðlar við að uppfræða almenning ennþá betur um pönkið.  Allir töluðu um pönkið allsstaðar.  Nýjar pönksveitir spruttu upp eins og gorkúlur.  Velsóttum pönkhljómleikum fjölgaði hratt.

  Síðustu helgina í janúar 1977 komu út smáskífan (Get a) Grip (on Yourself)  með The Stranglers og 4ra laga plata með The Buzzcocks.  Lagið með The Stranglers er hér að ofan en lagið  Breakdown  með The Buzzcocks er hér fyrir neðan. 

  Liðsmenn helstu pönksveitanna voru ein stór fjölskylda.  Eða þannig.  Einn stór kunningjahópur.  Margir höfðu áður spilað saman í öðrum hljómsveitum eða áttu eftir að spila saman í öðrum hljómsveitum.  Þetta lið hélt hópinn bæði á sameiginlegum hljómleikum og í frítíma. 

  The Stranglers stóðu fyrir utan þennan hóp og voru ekki eiginlegir pönkarar.  Og þó.  The Stranglers voru hluti af pönkbyltingunni og settu sterkan svip á hana.

  Hljómsveitin The Buzzcocks gaf sjálf út plötuna sína.  Á þann hátt varð hún fyrirmynd ótal annarra pönksveita sem töldu Gerðu-það-sjálf/ur (Do It Yourself) hugmyndafræði pönksins ná yfir plötuútgáfu.

   

Fyrsta breska pönklagið:  http://jensgud.blog.is/blog/jensgud/entry/743999

Upphaf bresku pönkbyltingarinnar II:  http://jensgud.blog.is/blog/jensgud/entry/744949

Þessi mynd er af The Buzzcocks.  Undir myndbandinu með The Stranglers er mynd af The Stranglers.

Verðsamanburður á jólahlaðborðum

  Ég tók upp á því að gamni mínu að kanna hvað er í boði á jólahlaðborðum hinna ýmsu veitingastaða á höfuðborgarsvæðinu og nágrenni.  Í leiðinni punktaði ég hjá mér verðið á jólahlaðborði staðanna.  Niðurstaðan er sú að jólahlaðborðin eiga það sameiginlegt með þorrahlaðborðum að úrvalið er mjög svipað á flestum stöðum.  Verðið er hinsvegar mismunandi,  eins og sjá má.  Allir staðirnir eru í Reykjavík nema annað sé tekið fram.  Á flestum stöðunum er boðið upp á leiðinlega jólamúsík á kvöldin.

Vox  2950 kr. í hádegi  (7500 kr.  á kvöldin)

Skútan,  Hafnarfirði, 3000 kr.

Gallerý Restaurant  3800 kr.  í hádegi  (7900 kr.  á kvöldin)

Hótel Loftleiðir  3950 kr.  í hádegi (dýrara á kvöldin,  mismunandi eftir dögum)

Tabasco´s  3980 kr.

Tapas  4290 kr.

Grand Hótel  4550 kr. í hádegi (6600 kr. á kvöldin.  Hægt er að panta  herðanudd  í Grand Spa.  Það þarf að borga sérstaklega fyrir það)

.

Hótel Óðinsvé  4600 kr. í hádegi (6500 kr. á kvöldin)

Ó Restaurant  4600 í hádegi þriðjud-laugard (6500 aðra daga og á kvöldin)

Silfur  4600 kr. í hádegi (7200 kr. á kvöldin)

.

Lækjarbrekka  4800 kr. í hádegi (dýrara á kvöldin,  misjafnt eftir dögum)

Argentína  5258 kr. sunnud-miðvikud (6250 kr. aðra daga)

Vitinn,  Sandgerði,  5600 kr.

Gló  5800 kr.

.

Geysir Bistro Bar  5900 kr. 

Restaurant Reykljavík  5900 kr.

Salthúsið,  Grindavík,  5900 kr.

.

Hótel Valhöll,  Þingvöllum,  6200 kr.

Perlan  6250 kr.  mánud-miðvikudag (7250 kr. aðra daga)

Fjörukráin  6400 kr.  með jólaglöggi

Einar Ben  6490 kr.

Gullhamrar  6500 kr.

.

Hótel Glymur,  Hvalfirði,  6900 kr.

Hótel Örk,  Hveragerði,  6900 kr.

Rauðará  6900 kr.

.

Fiskmarkaðurinn   7400 kr.  sunnud-miðvikud (8400 kr.  aðra daga)

Nítjánda,  Smáratorgi,  7400 kr.

Gullfoss  7500 kr.

Orange  8400 kr. 

Hótel Saga  8900 kr.

Sjávarkjallarinn  9900 kr.

Upphaf bresku pönkbyltingarinnar II

  Breska pönkbylgjan mótaðist vorið 1976.  Hún varð ekki til þegar hljómsveitin Sex Pistols var full mönnuð haustið áður.  Né heldur þegar Sex Pistols fóru að spila opinberlega.  Sú hljómsveit var ekki sú sama og varð leiðandi afl í pönkbyltingunni.  Til að byrja með var Sex Pistols krákuband (cover) sem spilaði lög eftir Small Faces,  The Who,  Chuck Berry og fleiri.  Er leið að vori fór hljómsveitin að finna sinn stíl.  Hann birtist mótaður um vorið ´76.  Joe Strummer,  síðar söngvari The Clash,  fékk Sex Pistols til að hita upp fyrir þáverandi pöbbarokkband sitt, 101´Ers nokkrum sinnum.  Þegar hann síðan fór á sjálfstæða hljómleika Sex Pistols í maí ´76 varð honum að orði:  "Þarna er þetta komið.  Þetta er framtíðin."

  Þarna fékk Joe Strummer vitrun.  Hann ákvað að söðla um.  Leggja 101´Ers niður og stofna hljómsveit í anda Sex Pistols.  Tom Robinson var á sömu hljómleikum.  Honum þótti Sex Pistols ömurleg hljómsveit en áttaði samt á því að þetta væri málið.  Hann var í hljómsveit sem hann ákvað að hætta með og stofna rokksveit í anda Sex Pistols. 

  Fram eftir sumri ´76 hlóð utan á sig það sem var að myndast sem pönkreyfing í Bretlandi.  The Damned varð fylgihnöttur Sex Pistols.  Joe Strummer stofnaði The Clash.  The Clash og Sex Pistols fóru að of mod-tríóið The Jam bættist í hópinn.  

  Í september ´76 var haldið 2ja daga pönk-festival í klúbbnum 100 í London.  Þá var blaðakona á breska poppblaðinu NME búin að skilgreina mánuði áður nýju hreyfinguna sem pönk.  Festivalið bar yfirskriftina "Anarchy in the UK" og undirskriftin var "Punk Special".  

  Nöfn Sex Pistols og The Clash voru skrifuð jafn stór á auglýsingaplakatið.  Með minni stöfum voru skrifuð nöfn Siouxie & The Banshees,  The Damned,  The Buzzcocks og fleiri.

  Hafa þarf í huga að nýhætt pöbbahljómsveit Joes Strummers,  101´Ers,  var nýhætt en búin að stimpla sig inn hjá pressunni.  Nýbúin að senda frá sér smáskífu og fá umfjöllun í poppblöðunum.  Þess vegna var The Clash strax stórt nafn í þessari nýju pönksenu. 

  Í október ´76 sendi hljómsveitin The Damned frá sér fyrsta breska pönklagið,  New Rose.  Sjá:  http://www.jensgud.blog.is/blog/jensgud/entry/743999/

  Fyrsta smáskífa Sex Pistols,  Anarchy in UK,  kom út mánuði síðar.  Það lag slefaði inn í 38.  sæti breska vinsældalistans.  Þar með var pönkið komið nálægt því að nálgast yfirborðið.  Útgefandi Sex Pistols fékk þá bakþanka yfir að vera að dreifa boðskap Sex Pistols um stjórnleysi og uppreisn (anarkisma) og stöðvaði dreifingu á smáskífunni.  Með tilheyrandi málaferlum og umfjöllun í fjölmiðlum.

  En Bretar voru komnir á bragðið.  Þeir voru að falla fyrir pönkinu.  Þeir biðu eftir framhaldinu.  Fleiri hljómsveitir sendu frá sér lög um þetta leyti undir formerkjum pönks.  Þau lög skiptu aldrei máli og eru tröllum geymd.  Eftir stendur þetta upphaf sem almenningur þekkti og þekkir í dag:   New Rose með The Damned og  Anarchy in UK  með Sex Pistols.

  Framhald á morgun.

Veitingahús - umsögn

 

Staður:  Hótel Loftleiðir

Réttur:  Jólahlaðborð

Verð:  3950 krónur (í hádegi)

Einkunn: ****1/2 (af 5)

  Það er undan fáu að kvarta með jólahlaðborð Hótels Loftleiða.  Forréttir,  aðalréttir og desertar eru fjölbreyttir og úrvalið gott.  Forréttir eru síld af ýmsu tagi,  reyktur lax,  grafinn lax,  heitreyktur lax með piparsósu,  hreindýrapate,  krabbasalat,  rauðspretta í raspi,  heit lifrakæfa með beikoni og sveppum og fjöldi annarra rétta.

  Aðalréttir eru reyktur grís,  hangikjöt,  heit rifjasteik,  kjötbollur,  pylsur og sitthvað fleira.  Í eftirrétt eru Ris a la mande,  ís,  súkkulaðifrauð,  ís,  kökur,  rosalega gott sherrýtriffle og eitt og annað.  Með þessu öllu er fjölbreytt úrval meðlætis;  laufabrauð,  heitar kartöflur í jafningi,  kartöflusalat og svo framvegis.

  Einhver staður,  sem ég man ekki hver er,  auglýsir jólahlaðborð án rauðkáls.  Það er skrítið.  Rauðkál passar vel með hangikjöti.  Ég var ánægður að sjá það á jólahlaðborði Hótels Loftleiða.

  Það eina sem ég sakna á jólahlaðborði Hótels Loftleiða er önd.  Allt annað er eins og best verður á kosið.  Þjónusta góð og umhverfi veislulegt.  Á árum áður þegar ég hef sótt jólahlaðborð Hótels Loftleiða hefur færeysk kona staðið við hlaðborðið og gefið góð ráð um bestu samsetningu á réttum og meðlæti.  Hún var ekki til staðar nú.  En það er svo sem ekki flókið að spila þetta eftir hendinni.

  Ég ætla að fara á jólahlaðborð Hótels Loftleiða í hádeginu á hverjum degi fram að jólum - þegar mér tekst að vakna nógu snemma.  Svo er það glæsilegt sjávarréttahlaðborðið á Sjávarbarnum á kvöldin.  Það kostar aðeins 1300 kall og hefst ekki fyrr en klukkan 18:00.  Þá er ég ætíð vaknaður.

Fyrsta breska pönklagið

  Heimildum ber ekki alveg saman hvernig pönkið byrjaði.  Í Bandaríkjunum var sena sem kallaðist pönk áður en breska pönkbyltingin braust út og afmarkaðist við tiltekinn músíkstíl og hugmyndafræði.  Í Bandaríkjunum var pönksenan ekki bundin við músíkstíl heldur viðhorf til ríkjandi gilda í músík.  Þetta var hrá og einföld músík sem gaf skít í framsækna tæknilega rokkið (prog).  Þær bandarískar hljómsveitir sem féllu undir hatt pönks voru helstar Talking Heads,  Blondie,  Ramones,  Patti Smith Group og Television.

  Í Bretlandi varð til pönksena sem einskorðaðist við hrátt einfalt rokk og hugmyndafræðina "gerðu það sjálfur" (Do It Yourself).  Merkisberar breska pönksins framan af voru Sex Pistols,  The Clash,  The Damned og Buzzcocks.  Bandaríska pönkið rann fljótlega ljúflega saman við það.  Ekki síst The Ramones.

  Fyrsta breska lagið sem kom út undir formerkjum pönks var  New Rose  með The Damned í október 1976.  Hér er það lag og ég ætla að bæta á næstunni við því sem fylgdi þar á eftir.   

  New Roses  seldist í 4000 eintökum fyrsta kastið.  Það verður að teljast bærilegur árangur.  Pönkið var ekki komið upp á yfirborðið.  Lagið var ekki selt í plötuverslunum heldur í póstkröfu og á hljómleikum The Damned.  Sölutalan gefur nokkra mynd af því hvað breska pönksenan var stór í árslok 1976. 

  Síðar hefur  New Rose  komið út á nánast öllum safnplötum sem innihalda einhverskonar sögulegt yfirlit yfir bresku pönkbyltinguna.  The Damned var líka fyrsta breska pönksveitin til að senda frá sér stóra plötu.

  Upptakan á  New Rose  kostaði 50 pund (tæpar 9000 íslenskar krónur).  Upptökustjóri var Nick Lowe.     

Til hamingju, Andrea snillingur!

  Samtónn,  FTT,  TÍ,  FÍH og FHF hafa nú í annað sinn veitt svokallað Bjarkarlauf þeim sem ötulast hafa stuðlað að vexti og viðgangi íslenskrar tónlistar.  Í fyrra fékk Árni Matthíasson,  blaðamaður Morgunblaðsins,  Bjarkarlaufið.  Hann var virkilega vel að þeim kominn.  Í ár fellur Bjarkarlaufið í skaut Andreu Jónsdóttur.  Hún er ekki síður vel að viðurkenningunni komin.

  Andrea hefur starfað við útvarp næstum svo lengur sem ég man.  Lengst af á rás 2 og þar áður á rás 1 þegar sú rás var eina íslenska útvarpsstöðin.  Ég held að poppþátturinn  Á nótum æskunnar  hafi verið fyrsti fasti útvarpsþátturinn hennar.  Þar kynnti hún það nýjasta í rokkmúsík þess tíma.

  Þó ég ávarpi Andreu í fyrirsögn þá veit ég að hún les ekki blogg.  Það er allt í lagi.  Hún er jafn frábær fyrir því.

  Andrea hefur löngum verið plötusnúður á skemmtistöðum.  Þekktust er hún kannski fyrir að halda uppi fjöri á Dillon.  Hún hefur sömuleiðis skrifað um músík í áraraðir.  Síðast fyrir poppblaðið Sánd. 

  Íslensk músík hefur alltaf staðið henni nærri og hún lagt drjúgt að mörkum við að kynna íslenska músík.  Ég hef sterkan grun um að hún hafi verið hvatamaður að tilurð kvennahljómsveitarinnar Grýlurnar.  Hún tók líka saman merkilega plötu um íslenskt stelpnarokk. 

  Ég man ekki hvernig Andrea orðaði það svo skemmtilega að fordómar séu í lagi en miklir fordómar séu hið versta mál.  Sjálf hefur Andrea merkilegt fordómaleysi gagnvart músík.  Hún hefur góðan músíksmekk en jafnframt umburðarlyndi gagnvart, ja,  því sem ég kalla vondri músík.  Hún gefur allri músík "sjéns".  Þannig er hún.  Jákvæð og umburðarlynd.  Og yndisleg manneskja.   

Frábær saga

  Þessari broslegu sögu hnupla ég af bráðskemmtilegu bloggi Kristínar Bjargar Þorsteinsdóttur,  skólasystur minnar frá Laugarvatni ( www.konukind.blog.is ).  Til að fanga söguna þarf að hafa í huga að fjölskyldan var í útlöndum.  Ég grenjaði út hlátri þegar ég las söguna.  Hún kemur þér áreiðanlega í gott skap líka:

Hver gefur hverjum hvað?

Á afmælisdeginum dró Gulli upp úr pússi sínu gjöf frá sér og stelpunum.

Ég opnaði full forvitni (og var mjög hissa á að hann skildi geta smyglað þessu út án þess að ég sæi) og í skartgripa kassanum lá fallegt silfurhálsmen með íslenskum steini.

Í undrun minna sagði ég - Nei frá Jens - Guð -

Nei, frá mér og stelpunum - mælti þá minn maður.........

Frábært jólalag

 

  Einhverra hluta vegna halda margir að jólalög þurfi að vera hrikalega leiðinleg.  Annað hvort væmin og slepjuleg eða uppspennt og ofhlaðin af tilgerð.  Þetta á ekki síst við um íslensku popparana sem gera út á jólamarkaðinn.  Öldin var önnur þegar Haukur Morthens og Ómar Ragnarsson sungu inn á frábærar jólaplötur á sjöunda áratugnum.  Haukur hátíðlegur en eðlilegur og Ómar fyndinn og eðlilegur. Þá var gaman að vera barn.

  Nú hafa þau undur gerst að fram er komið splunkunýtt,  nýstárlegt og frábært jólalag.  Það heitir  Dimmrauð jól  og er samið og flutt af Jakobi Smára Magnússyni.  Lagið getur þú fundið á http://www.ruv.is/heim/vefir/ras2/poppland/jolalagakeppni/.  Það er númer 3 í röðinni.  Í leiðinni skaltu kjósa það á listanum þar fyrir neðan.  Þetta lag verður að sigra í Jólalagakeppni rásar 2.   

  Ég hlóð laginu niður í tölvuna mína og hef haft það í síspilun frá því í gær.  Og er strax farinn að hlakka til að spila það aftur um jólin 2009 og 2010.  Lengra fram í tímann hugsa ég ekki í bili.

Að ritskoða sjálfa/n sig

 

  Tjáningarfrelsi er gott fyrirbæri.  Íslendingar - eins og aðrir norðurlandabúar - búa við mesta tjáningarfrelsi í heimi,  samkvæmt mælingu stofnunar sem kallast Free Press.  Það er gott.  Verra er að stofnunin mælir ekki þá tegund ritskoðunar sem kallast sjálfsritskoðun.

  Vinkona mín hefur verið að blogga hér á moggablogginu.  Hún hefur tjáð sig um ýmis hitamál í þjóðfélaginu.  Á vinnustað hennar hafa skoðanirnar sem hún viðrar á blogginu fallið í grýttan jarðveg.  Jafnvel svo að í kjölfar sumra bloggfærslnanna hefur andað köldu til hennar.

  Nú er sú staða uppi í þjóðfélaginu að allt umhverfis konuna er verið að skera niður og segja upp fólki.  Hún er lent í þeirri stöðu að þurfa að ritskoða sjálfa sig til að veikja ekki stöðu sína á vinnumarkaði.  Reyndar hefur hún stigið það stórt skref í ritskoðuninni að hún er hætt að blogga,  komin í bloggfrí,  þangað til um hægist. 

Ótrúleg hönnun

  Það hefur ekkert verið átt við þessa mynd né heldur ísjakann.  Hann er svona frá náttúrunnar hendi.

  Þessi hellir er sömuleiðis náttúrunnar verk.  Hann er í Mexíkó.

  Þessi mynd er ekki "feik".  Mig minnir að þessi risakanína hafi unnið í keppni í Þýskalandi um stærstu kanínur og eigandinn liggi undir grun um að hafa lauma hormónum í matinn hennar.  Án þess að kanínan hafi fattað það - þó hún hafi ef til vill haft sínar gagnrýnu grunsemdir.

  Þetta er svokölluð lúxus útgáfa af svissneskum hníf og aðeins hærra settir í svissneska hernum fá svona verkfæri.  Þeir fá líka að bera byssu en fátt annað.

  Þröngt mega sáttir hjólhýsabúar sitja í Hollandi.  Landið er undir sjávarmáli þannig að sumir reyna að staðsetja sig í efra hæðum.  Til öryggis.

  Þetta er nammihlaup.  Sumum þykir skrýtið að nammið sé húðlitt og sumum þykir "gítarinn" hálf einkennilegur.  Framleiðandinn afsakar sig með því að hann noti ekki litarefni í hlaupið vegna þess að litarefni geti valdi ofnæmi.

 

Leyndarmálið upplýst

  Hér fyrir neðan er færsla á slóðinni http://jensgud.blog.is/blog/jensgud/entry/738249/.  Þar eru ljósmyndir af byggingu í París í Frakklandi.  Byggingin virðist vera verulega bjöguð líkt og sjá mætti í spéspegli í tívolíi.  Myndin er ekki brengluð í tölvuforriti né brugðið á leik með ljósmyndatækni að öðru leyti.  Það sem þarna er gert er að byggingin er máluð svona að utan.  Byggingin sjálf er með hreinar og klárar lóðréttar og láréttar línur.  Þetta má sjá með því að skoða útlínur byggingarinnar.  Að vísu hjálpar til að fyrir miðju byggingarinnar er útflúrað steypt skraut á hornum hennar.  En leyndarmálið er það að bylgjur hússins eru málaðar á hana.  Svona snilldar vel.