Hefði John Lennon stutt og kosið Ronald Reagan?

 

  Í splunkunýrri heimildamynd,  Beatles Stories,  er breska hljómsveitin Bítlarnir (The Beatles) viðfangsefnið.  Það tók leikstjórann,  Seth Swirsky,  5 ár að vinna þessa mynd.  Það sem gerir myndina sérlega áhugaverða er að hún geymir að uppistöðu til upplýsingar sem ekki hafa áður komið fram.  Upplýsingar sem jafnvel hörðustu Bítlaunnendur hafa ekki heyrt um.

  Þegar er risin upp deila um myndina.  Hún snýst um fullyrðingu Freds Seamans þess efnis að John Lennon hefði stutt forsetaframboð Ronalds Reagans 1981 ef Lennon hefði ekki verið myrtur í New York 1980.  Fred þessi var starfsmaður Lennons.  Fred segir John Lennon áranna 1979 - 1980 hafa verið allt annan mann en þann herskáa og kjaftfora Lennon sem Richard Nixon taldi vera sinn hættulegasta óvin næstum áratug áður.  Að sögn Freds hafði Lennon horn í síðu Jimmys Carters.

  Bandaríski söguprófessorinn og Lennon-fræðingurinn,  John Wiener,  bloggar á síðu The Nationals.  Hann efast um áreiðanleika Freds og bendir á að Fred sé fyrst og fremst þekktur fyrir að vera þjófur og lygari.  Meðal annars varð hann uppvís af því að stela fjölda hluta af heimili Lennons og selja.

  Viðtal sem Lennon veitti tímaritinu Rolling Stone skömmu áður en hann var myrtur styðja ekki kenningu Freds.  Þar fyrir utan kaus Lennon aðeins einu sinni á ævinni.  Það var þegar hann var nýkominn með kosningarétt.   

  Hinsvegar er skemmtilegur samkvæmisleikur að spá fyrir um hvaða afstöðu löngu látið fólk hefði haft til hinna ýmsu mála hefði þeim elst aldur til.  Á 200 ára afmælisdegi Jóns Sívertsen var hann sakaður um að hafa stutt aðild Íslands að ESB væri hann sprelllifandi,  hress og kátur,  200 ára í dag.

  Á unglingsárum leigði ég herbergi hjá gömlum húmorslausum manni.  Sá fullyrti í fullri alvöru að Jesú hefði alltaf kosið Alþýðuflokkinn.  Sá gamli bar nafngreindan prest fyrir því.

  Þar fyrir utan er eðlilegt að fólk skipti um skoðanir á hinu og þessu fram eftir öllum aldri.   Hver hefðu verið næstu skref Jimis Hendrix,  Jims Morrisons og Janis Joplin í músík ef þau hefðu orðið eldri en 27 ára?  Kurt Cobain hafði uppi áform um að verða nútíma Leadbelly áður en hann (Cobain) skaut sig.  Það gæti hafa orðið spennandi dæmi.

 

Svona er auðvelt að gera vinnuna rosalega skemmtilega

  Stundum heyrist fólk segja að það hlakki til frídaga frá vinnu.  Það er eins og sumum leiðist í vinnunni.  Einkum þeim sem vinna einhæfa vinnu.  Þetta er óþarfi.  Það er svo auðvelt að þykja gaman í vinnunni.  Hér er gott ráð sem hefur þann kost að það endist og endist.

  Flestum þykir mánudagurinn leiðinlegasti dagur vikunnar.  Þess vegna er upplagt að fjörga upp á fyrsta virkan mánudag hvers mánaðar (sem er til að mynda annar mánudagur ágústsmánaðar).  Leikurinn gengur út á það að þann mánudag klæðist ALLIR starfsmenn einhverju sem þeir annars klæðast ekki að öllu jafnaði. 

  Einn kaldan vetrarmánudag mæta allir með húfu.  Það má vera hvernig húfa sem er en ekki hattur eða derhúfa.

  Heitan sumarmánudag mæta allir í stuttbuxum.  Einnig er upplagt á sólríkum degi að allir beri röðulskyggjur (sólgleraugu).

  Einn mánudaginn setja allir upp hálsbindi,  konur jafnt sem karlar.

  Annan mánudag til eru allir með grifflur.  Það er hægt að kaupa ódýra vettlinga og klippa framan af þeim.

  Þannig mætti áfram telja.  Það má líka útfæra þetta þannig að einn mánudag næli allir á sig glaðlegt barmmerki:  Broskall, eða merki með glaðlegum boðskap af hvaða tagi sem er. 

  Til að þetta gangi upp og veki skemmtun er að ganga ekki of langt í fíflagangi.  Þetta sé eitthvað sem allir geti sætt sig við.  Þetta má ekki kosta mikla fyrirhöfn né fjárhagsleg útgjöld.  Upplagt er að miða við að hægt sé að kaupa eitthvað svona í ódýrum verslunum á borð við Megastore eða Tiger.  Þar kosta hlutir bara 200-og-eitthvað kall eða svo.  Að minnsta kosti í Megastore.  Tiger er kannski örlítið dýriari svo litlu munar.

  Svona uppátæki krydda vinnuna rækilega 12 sinnum á ári.  Til að allir séu virkir þátttakendur skiptast vinnufélagar á uppástungu um næsta mánudagssprell.  Heppilegt getur verið að röðin ráðist af nöfnum viðkomandi eftir stafrófsröð. 

  Ég get lofað ykkur því að þetta mun breyta mánudögum í tilhlökkunarefni og hressa rækilega upp á vinnuandann.

  Ef einhver skorast undan má leggja hann í nett einelti þann daginn.  Bara gæta þess að það sé ekki kynferðisleg einelti.  Reyndar er lítil hætta á því að fýlupokar taki ekki þátt í leiknum.  Þetta er svo gaman.  Líka fyrir viðskiptavini fyrirtækisins.  Þegar fram í sækir getur þetta bætt móralinn á þann hátt að það vinni gegn einelti á vinnustað.  Jafnframt brúar þetta bil á milli yfirmanna og undirmanna á vinnustað.

    

Frábærir hljómleikar á Ob-La-Di

 - Flytjendur:  Hljómsveit hússins:  Gunnar Þórðarson (gítar,  söngur),  Egill Ólafsson (söngur),  Magnús Einarsson (gítar,  söngur),  Eðvarð Lárusson (gítar),  Ásgeir Óskarsson (trommur),  Tómas M. Tómasson (bassi)

 - Staður:  Ob-La-Di

 - Staðsetning:  Laugavegur 45A

  Ég var að koma af frábærum hljómleikum á Ob-La-Di skemmtistaðnum.  Tilefnið var 69 ára afmæli Páls Magnússonar (Paul McCartney),  bassaleikara,  söngvara og söngvahöfundar Bítlanna (The Beatles).  Merkustu hljómsveitar sögunnar.  Hann fæddist 18. júní 1942.

  Ég hef ekki áður komið á Ob-La-Di.  Þessi staður er í götu á milli Laugavegar og Hverfisgötu.  Sama húsi og Las Vegas var í.  Nema á jarðhæð.  Þetta er frekar lítill og verulega "kósý" staður.  Á veggjum hanga stórar myndir af Bítlunum.  Stemmning er mjög góð.  Sjálfur barinn er þannig hannaður að á hornum hans er merkt "service".  Þar mega engir standa nema þeir sem eru að bíða eftir afgreiðslu á barnum.  Þetta fyrirkomulag mættu fleiri vel sóttir barir taka sér til fyrirmyndar.  Þetta kemur í veg fyrir óþarfan troðning við barinn.

  Hljómsveitin fór á kostum.  Alveg frá A-Ö.  Uppistaðan af lagavali kvöldsins voru lög Pauls frá Bítlaárunum.  Hátt hlutfall laganna var sótt í bestu plötu Bítlanna,  Abbey Road.  Einnig slæddust með lög eftir John Lennon.  Enda þeirra ferill svo samtvinnaður í Bítlunum að varla verður á milli skilið.  Þannig lagað.  Þó að annar þeirra tvímenninga hafi samið hitt eða þetta lagið þá setti hinn iðulega svo afgerandi mark á  flutning að hefðbundið Bítlalag var Lennon-McCartney í vitund almennings.  Þar fyrir utan sömdu þeir mörg lög í sameiningu. 

  Hljómsveitin valdi þá farsælu leið að herma ekki nákvæmlega eftir flutningi Bítlanna á þessum lögum.  Þess í stað voru sum lögin í "Bítlalegum" útsetningum sem þó voru ekki þær sömu og með Bítlunum.  Þarna var valinn snillingur í hverju rúmi.  Undrun vakti að Egill Ólafsson söng allt öðru vísi en sá Egill Ólafsson sem við eigum að venjast.  Hann varð "Bítill" án þess að reyna að vera Lennon eða McCartney.  Hann var bara "Bítill",  svo áreynslu- og tilgerðarlaust.  Aldeilis frábær.

  Gunnar Þórðarson átti einnig stjörnuleik.  Hann spilaði og söng bæði Bítlalög og frumsamin (Hljóma) "bítlalög".

  Óþarfi er að þylja upp glæsilega frammistöðu annarra í hljómsveitinni.  Ég verð þó að nefna skemmtilegar lagakynningar Magnúsar Einarssonar.  Það er freistandi að geta hugleiðingar hans um að ef Lennon hefði ekki kynnst McCartney og fengið hann með sér í hljómsveit þá væri Paul í dag að vinna í bókhaldi á endurskoðunarskrifstofu.  Skemmtileg pæling.

  Mér skilst að á fimmtudagskvöldum sé á Ob-La-Di boðið upp á lifandi (live) Bítlamúsík húshljómsveitarinnar.  Ókeypis aðgangur.  Í næstu viku verða Krummi í Mínus og söngvarinn í Jeff Who gestasöngvarar.  Það er spennandi dæmi.  

  Kjarninn í húshljómsveitinni eru Magnús Einarsson,  Eðvarð Lárusson og Tómas M. Tómasson.  Auk þeirra sem spiluðu með þeim í kvöld hafa spilað og sungið með þeim á Ob-La-Di til dæmis að taka Hilmar Örn Hilmarsson og Andrea Gylfadóttir.     

 

Kalli bankans svarað

  Nú eru bankarnir farnir að moka út peningum til skuldugs fólks.  Það hljómar vel.  Landsbankinn reið á vaðið.  Fyrir bragðið er hann góði kallinn.  Í bili.  Eða þannig.  Til að sýna góðan lit brá ég mér í Landsbankann og borgaði þar reikning sem ég annars er vanur að borga í öðrum banka.  Þá sá ég í Landsbankanum auglýsingu með textanum:  "Vinsamlegast deildu skoðunum þínum með okkur.  Þitt álit skiptir okkur máli."

  Ég brást vel við og deildi skoðun með gjaldkeranum með því að segja:  "Mér þykir Abba ógeðslega leiðinleg hljómsveit."

  Gjaldkeradaman horfði rannsakandi á mig um leið og hún afgreiddi reikninginn og svaraði hægt:  "Ókey."  

  Þar með gekk ég út í sumarið og leið vel að vita að álit mitt skipti Landsbankann máli. 

 

Arion banki endurreiknar lán

Ferðast til Heljar

  Íslensku víkingarokkararnir í Skálmöld stóðu sig glæsilega vel í síðasta Popppunkti.  Þeir standa sig ennþá betur á sviði.  Frábær hljómsveit sem sendi frá sér eina albestu plötu síðasta árs,  Baldur.  Í næsta mánuði halda víkingarokkararnir í hljómleikaferð um Ísland og Færeyjar í samfloti með færeysku dómsdagsrokkurunum í Hamferð.  Hamferð er sömuleiðis frábær hljómsveit á sviði.  Hún sigraði í færeysku músíktilraununum,  Sementi,  í fyrra.  Í árslok sigraði hún titilinn "Bestu nýliðarnir" í færeysku tónlistarverðlaununum;  Planet Awards.

  Hamferð hefur sent frá sér eina plötu,  Vilst er síðsta fet.  Um hana má lesa með því að smella á þennan hlekk:  http://jensgud.blog.is/blog/jensgud/entry/1144831/

  Um plötu Skálmaldar má lesa með því að smella á þennan hlekk:  http://jensgud.blog.is/blog/jensgud/entry/1138185/

  Hljómleikaferð Skálmaldar og Hamferðar verður farin undir heitinu  Ferðast til Heljar.  Með í för verður finnskur ljósmyndari.  Sá mun skrásetja ferðina í máli og myndum og gefa út í bók.  Þetta verður rosalegt.  Þannig verður ferðin:

5.  júlí:  Sódóma,  Reykjavík.  Tvennir hljómleikar

6.  júlí:  Húsavík

7. - 9. júlí:  Eistnaflug 2011,  Neskaupstað

12.  júlí:  Seglloftið,  Tvöroyri í Færeyjum

13.  júlí:  Perlan,  Þórshöfn í Færeyjum (mikilvægt að rugla henni ekki saman við Þórshöfn á Langanesi)

14. - 16.  júlí:  G!Festival í Götu í Færeyjum

Færeyskir söngvar í 1. sæti í Danmörku og Bandaríkjunum

 

   Í fyrradag upplýsti ég á þessum vettvangi að splunkuný plata færeysku víkingarokkssveitarinnar Týs,  The Lay of Thrym,  hefði vippað sér úr 31. sæti í 1. sæti bandaríska rokklistans,  CMJ Loud.  Listinn byggir á útvarpsspilun í Bandaríkjunum og Kanada.  Í þessum skrifuðu orðum var plata með lagi Eivarar,  Tröllabundin,  að hreiðra um sig á ný í 1. sæti danska plötusölulistans.  Lagið er á plötunni  Engle eller Dæmoner  með danska rappdúóinu Nik & Jay. 

  Platan fór var í toppsætið fyrir 6 vikum,  hélt því næstu vikuna og seig síðar örlítið.  Var í 4. sæti fyrir viku.  Nú hefur platan aftur náð 1. sætinu.  Að margra mati í og með vegna  Tröllabundin.  Það lag er af gagnrýnendum og almenningi talið vera besta lag plötunnar.  Reyndar er það flottara með Eivöru einni.  En samt gaman að heyra hvernig Nik & Jay afgreiða það (sjá hér neðst).

  Þetta er í fyrsta skipti sem færeyskir söngvar eru samtímis í 1. sæti í Danmörku og í Bandaríkjunum. 

  CMJ stendur fyrir það sem hérlendis hefur verið kallað bandarískt háskólaútvarp (Collage Music Journal).  Það mætti þó kalla það norður-amerískt framhaldsskólaútvarp vegna þess að það nær einnig yfir kanadískar framhaldsskólaútvarpsstöðvar.  CMJ heldur utan um vinsældalista þessara útvarpsstöðva,  er vikutímarit og stendur einnig fyrir hljómleikahaldi og alls konar.  Tímaritinu fylgir geisladiskur með mest spennandi rokklögum hverju sinni.  Ég var áskrifandi að CMJ alveg þangað til krónan kolféll 2008 og uppgötvaði í gegnum það margt af því besta sem þá var í umferð í rokkinu.  Þegar ég skoða í dag þær plötur sem fylgdu tímaritinu sé ég að flestir flytjendur urðu síðar stórveldi.  CMJ er með puttann á púlsinum.  Vinsældalistar CMJ mæla það sem spilað er í norður-amerískum framhaldsskólaútvarpsstövum.  Þetta eru þær útvarpsstöðvar sem maður stillir á þegar maður er í Bandaríkjunum.  Það er ævintýri líkast að Týr sé þar í 1. sæti.  Verulega óvænt verð ég að segja. Norrænt víkingarokk hefur hingað til ekki átt upp á pallborð á þessum vettvangi.  Þetta þýðir rosalega spilun á plötu Týs í þessum útvarpsstöðvum.  Týr hefur stimplað sig rækilega inn á norður-ameríska markaðinn.  Og Eivör inn á þann danska.

1

4

6

NIK & JAY ENGLE ELLER DÆMONER

2

3

19

ADELE 21

3

1

2

LADY GAGA BORN THIS WAY

4

2

23

RIHANNA LOUD

5

5

35

AGNES OBEL PHILHARMONICS

6

6

22

BRUNO MARS DOO-WOPS & HOOLIGANS

7

13

37

FALLULAH THE BLACK CAT NEIGHBOURHOO

8

10

52

BURHAN G BURHAN G

9

9

9

KATO DISCOLIZED 2.0

10

1

EDDIE VEDDER UKULELE SONGS

Skúbb! Týr í 1. sæti í Bandaríkjunum

  Í vikubyrjun kom út sjötta plata færeysku víkingarokkaranna í Tý.  Hljómsveitarinnar sem átti vinsælasta lagið á Íslandi 2002,  Ormurin langi  (Ormurin með einu n).  Nýja platan heitir  The Lay of Thrym.  Platan með  Orminum langa  heitir  How Far to Asgaard  og sat vikum saman í 1. sæti íslenska plötusölulistans 2002. 

  Síðan hefur færeyska víkingsrokkssveitin Týr náð yfir marga þröskulda heimsfrægðar.  Komst á plötusamning hjá stærsta alþjóðlega plötuútgáfufyrirtæki þungarokksins,  Napalm Records;  hefur spilað á öllum stærstu þungarokkshátíðum heims og er orðin nógu stórt nafn til að túra um Bandaríkin og Evrópu sem aðal nafn.  Það telst ekki lengur til tíðinda að fjallað sé um Tý í helstu þungarokksblöðum heims.  Né heldur að lög með Tý sé á fylgidiskum þeirra blaða ásamt lögum með Sepultura,  Soulfly og svo framvegis.  Munurinn er sá að þegar Týr seldi 5000 eintök af  How Far to Asgaard  á 320 þúsund manna íslenskum markaði þá erum við að tala um 310 milljón manna markað í Bandaríkjunum.  Þar fyrir utan fá vinsælar plötur í Bandaríkjunum viðskiptavild sem skilar sér rækilega á heimsmarkaði.

  Samt sem áður kom það liðsmönnum Týs í opna skjöldu þegar í dag kom í ljós að nýjasta plata Týs,  The Lay of Thrym,  er komin í 1. sæti bandaríska CMJ Loud Rock vinsældalistans.  Platan er spiluð sundur og saman í fjölda bandarískra útvarpsstöðva.  Þar á meðal útvarpsstöðva sem menn vissu varla að væru til.  Týs-æði hefur skollið á í Bandaríkjunum líkt því sem gerðist þegar Týr sló í gegn á Íslandi 2002.  Strákarnir í Tý vita ekki hvaðan á þá stendur veðrið. 

  Sjá: 

http://www.heavymetalbuzz.com/2011/06/tyr-go-to-1-on-cmj-loud-rock-charts.html

  Sjálfur hef ég í dag fengið tvær fyrirspurnir frá bandarískum þungarokksunnendum sem voru að uppgötva Tý eftir að hafa heyrt lög þeirra spiluð í bandarískum útvarpsstöðvum.

Ótrúlegt! Svona er heima hjá Ozzy Osbourne í dag

  Fyrir nokkrum árum naut mikilla vinsælda sjónvarpssería að nafni Osbournes.  Í henni var fylgst með breska þungarokkssöngvaranum Ozzy Osbourne,  Sharon konu hans og tveimur yngstu börnum þeirra.  Þetta var svokallað raunveruleikasjónvarp.  Fjölskyldan þótti frekar sérkennileg um margt.  Einkum Ozzy,  sem hefur skaðað sjálfan sig til frambúðar með óhóflegri áfengis- og dópneyslu.  Það er betra að nota svoleiðis í hófi.  Skemmtilegu hófi.

  Heimili fjölskyldunnar,  það er að segja húsgögn og annað innbú,  vakti ekki sérstaka athygli.  Það var ósköp venjulegt.  Að minnsta kosti í samanburði við íbúana.  Nú hefur heimilið verið tekið í gegn frá A-Ö.  Það er óþekkjanlegt frá því sem áður var.  Og stingur rækilega í stúf við ímynd djöfladaðrarans Ozzys,  prins myrkursins,  eins og hann er stundum kallaður.   

  Svona munum við eftir Osbourne-hjónunum heima hjá sér.  Allt voða "kósý",  hlýlegt,  notalegt og heimilislegt:

 

  Nú hefur allt verið útfært í köldum og óvistlegum litum;  húsgögn,  skraut og annað haft í hörðum og óþægilegum fyrri alda stíl.  Það var Sharon sem tók ákvörðun um þennan vonda stíl og naut liðsinnis fagmanna.  Ozzy skipti sér ekkert af þessu.  Hann veit sem er að það er ekki hlustað á hann undir svona kringumstæðum.

  Kalt,  hart,  gler,  járn,  hvítir veggir,  hvítar veggflísar,  hvítur spegilrammi og það allra versta:  Kristalljósakróna í baðherbergi!

  Hvítir veggir,  hvítir gluggalistar,  hvítir hurðarkarmar;  ber og ómálaður stál gufugleypir og stál eldavél.  Stólarnir eru harðir og óþægilegir.  Þeir eru þó haganlega hannaðir að því leyti að undir setunni er hirsla.  Þar er hægt að geyma sokkapör og fleira.

  Þarna fær ómálaður járnrammi um spegilinn að njóta sín.  Sá er heldur betur skrautlegur,  eins og útskorinn skenkurinn.  Þvílíkt flúr.  Og dauðar trjáhríslur í skrautlegum glervösum.

  Á þessu speglaborði standa verðlaunagripir Ozzys.  Gott ef ekki bæði Grammy og Emmy verðlaun.  Stállitur borðlampi.  Blómavasinn er hugsanlega silfurhúðaður.  Það sést glitta í bera stálarma á stólnum.

  Óþægilegur tréstóll prýðir stigaopið á efri hæðinni.  Það er eins og ljósakrónan sé gullslegin.

  Ég veit ekki hvaða tilgangi þessar gegnsæju glerflöskur þjóna með svona íburðarmiklum járntöppum.  Líkast til eru þær aðeins skraut og tapparnir einhvers konar afbrigði af hinum ýmsu krossum.

  Uppstillingarnar á dótinu á náttborðahlunkunum er þær sömu.  Þær mynda ekki einu sinni spegilmynd.  Fyrir bragðið þarf sá/sú sem sefur vinstra megin að fara fram úr til að slökkva á borðlampanum.  Þessi kaldi fjólublái ráðandi litur er afskaplega óaðlaðandi í svefnherbergi.  Sem og speglandi gráar gólfflísarnar og járnsöplarnir á rúminu.  Kuldalegir gráir og fjólubláir draumar.  Það er ekkert rokk í þessu.

The Eagles eiga íslenska plötu

  Eins og fram hefur komið í fréttum er bandaríska kántrý-rokkshljómsveitin The Eagles komin til Íslands.  Hitt vita færri:  Að einn af gítarleikurum og söngvurum The Eagles,  Joe Walsh,  á plötu með íslenskum tónlistarmanni.  Frá þessu segir Herbert Guðmundsson á fésbók:

  "Skrapp í Hagkaup áðan, þegar ég kem fyrir hornið á hreinlætisvöru hillunum rakst ég á Joe Walsh gítarleikar Eagles og konuna hans þar sem þau voru að versla, tók í spaðann á kauða og stutt spjall og gaf honum svo eitt eintak af síðustu plötunni minn Spegli Sálarinnar, svo heppilega vildi til að ég var með eitt eintak í vasanum. Mjög viðkunnalegur náungi og almennilegur, svona er Ísland í dag."

Ernirnir lentir

Kráka = cover song

  Poppkóngurinn Óli Palli á rás 2 tók í dag snúning á vandræðalegri þýðingu okkar Íslendinga á ensku orðunum "cover song".  Því miður hefur ekki fundist neitt gott íslenskt orð yfir fyrirbærið.  Menn hafa verið að vandræðast með orð eins og tökulög,  ábreiður,  mottur,  yfirhafnir,  kápur og svo framvegis.

  Fyrir 2 árum stakk Steini Briem upp á orðinu krákur.  Eins og Óli Palli hallast ég helst að því orði.  Samt er það ekki algott.  Rökin með  kráku  eru þessi:

  - Það hljómar líkt enska orðinu "cover".

  - Það er 2ja atkvæða og þar með töluvert þjálla en "ábreiðulag" eða "tökulag".

  -  Það gefur til kynna að um eftirhermu sé að ræða án þess að innihalda forskeytið "hermu".  En býður jafnframt upp á að talað sé um "hermikráku" þegar um nákvæma stælingu er að ræða.

  -  Hægt er að tala um kráku (cover) án þess að tala um krákulag (cover song).

  Ef þið hafið betri tillögu þá endilega leggið í púkk.

  Annað:  Hvað segið þið um kráku Perfect Circle á  Imagine?  Þarna er söngvari Tool ásamt bandarískum gruggurum að kráka lagið með öðrum hljómagangi og öðrum hrynjanda fyrir unga rokkunnendur.  Frumútgáfa Lennons á laginu er yfirleitt í efstu sætum yfir bestu lög poppsögunnar.  Útfærsla Perfect Circle er töluvert frábrugðin.  Og þar með ekki hermikráka heldur kráka.