Veitingahús - umsögn

 

Veitingastaður:  Langbest,  Hafnargötu 62,  Keflavík

Réttur:   Lambasteik

Verð:  1750 kr.

Einkunn: ***1/2 (af 5)

  Ég hafði aldrei tekið eftir þessum stað fyrr en nú.  Þó hef ég oft átt erindi til Keflavíkur.  Merkingar eru sem sagt ekki mjög áberandi.  Staðurinn er víst um það bil 15 til 20 ára.  Þessu komst ég að þegar ég nefndi við innfædda Keflvíkinga að ég hafi prófað að borða á nýjum stað.  Jafnframt fékk ég að vita hvernig nafn staðarins kom til:   Aðstandendur hans voru að velja nafn úr fjölda tillagna.  Einn sagði að honum þætti tiltekið nafn langbest.  Öðrum þótti annað nafn langbest.  Þeim þriðja þótti þriðja nafnið langbest.  Þegar þeir tóku eftir því að allir notuðu orðið langbest er þeir lýstu sinni skoðun varð að samkomulagi að kalla staðinn Langbest.  Gott nafn.

  Langbest er í milliflokki.  Uppistaða á matseðli eru hamborgarar og flatbökur (pizzur).  En einnig steikur,  djúpsteiktur fiskur og gratíneraður fiskur.  Ég pantaði lambasteik.  Þegar ég rétti afgreiðslumanninum kortið mitt sá ég að hann stimplaði inn 1945 kr.   Ég gerði athugasemd:

  - Á matseðlinum stendur að lambið kosti 1750 kall.

  - Það er rétt.

  - En þú stimplar 1945 kall.

  - Já,  vegna þess að gosið kostar 195 kall.

  - Pantaði ég gos?

  - Viltu ekki gos með matnum?

  - Getur verið að ég myndi panta gos ef ég vildi gos en ég myndi ekki panta gos ef ég vildi ekki gos?

  - Ég get alveg mínusað gosið ef þú vilt ekki gos.  Viltu sleppa gosinu?

  - Hvað heldur þú?

  - Þú ræður.  Ef þú vilt ekki gos þá mínusa ég það bara.

  Og þannig fóru leikar.  Afgreiðslumaðurinn mínusaði gosið sem ég hafði ekki pantað.

  Með lambagrillsteikinni fylgdu 2 stórar bakaðar kartöflur.  Sennilega voru þær forsoðnar.  Þær voru það mjúkar og safaríkar.  Kartöflur sem eru einungis bakaðar eru yfirleitt þurrari og mjölkenndar.  Þessar voru engu að síður bragðgóðar.  Með þeim fylgdi sitthvort smjörstykkið.  Á borð vantaði pipar.  Þar var bara salt og kartöflukrydd fyrir franskar.  Kartöflukrydd passar ekki með bökuðum kartöflum.  Það gera aftur á móti pipar og salt.

  Vænn skammtur af berneisósu fylgdi í sósuskál.  Hún var mjög líklega upphituð.  Hún var það þunn og yfirborðið frauðkennt.  Engu að síður góð sósa.  Einnig fylgdi ferskt salat sem samanstóð af iceberg,  agúrkum og tómötum.  Ágætur skammtur.

  Lambasteikin var alveg mátulega léttsteikt,  meir og léttkrydduð.  Hún var steikt með mjög þunnt skornum sveppum.  Þannig eiga sveppir með lambasteik að vera.   

  Innréttingar eru frekar "sjoppulegar" eða skyndibitalegar.  Bólstraðir dökkbláir bekkir minna meira á vinnustaðamötuneyti en veitingastað innréttaðan samkvæmt góðri markaðsfræði.  Þetta skiptir mig þó engu máli.  Meira máli skiptir að hálfur lítri af bjór er á 650 kall sem er ágætt milliverð.

  Myndin er ekki frá Langbest.

Aðrar umsagnir um veitingahús:

- Icelandic Fish & Chips

http://jensgud.blog.is/blog/jensgud/entry/643187

 - American Style

http://jensgud.blog.is/blog/jensgud/entry/630463

 - Pítan

http://jensgud.blog.is/blog/jensgud/entry/590495

 - Hrói höttur

 http://jensgud.blog.is/blog/jensgud/entry/641856

Veitingahús - umsögn

 

Veitingastaður:  Hrói höttur,  Hringbraut 119,  Reykjavík

Réttur:  Hádegisverðarhlaðborð

Verð:  1290 kr.

Einkunn: *** (af 5)

  Mér skilst að heitu réttirnir í hádegisverðarhlaðborði Hróa hattar á Hringbraut séu hinir fjölbreyttustu frá degi til dags.  Þegar ég mætti á svæðið voru heitu réttirnir svínarifjasteik og kjötfarsbollur í brúnsósu með blönduðu grænmeti.  Hvorugur rétturinn er í uppáhaldi hjá mér.  En báðir voru í hinu besta lagi.  Með þessum réttum var hægt að fá sér franskar kartöflur.  Það þykir mér vera versta útgáfa af kartöflum.  Árangurslaust skimaði ég eftir soðnum kartöflum,  pönnusteiktum eða kartöflusalati.  Einungis þær frönsku voru í boði. 

  Þrjár tegundir af nýlöguðum flatbökum (pizzum) voru líka á hlaðborðinu.  Allar með sitthvoru álegginu.  Um leið og ein bakan kláraðist var nýrri bætt við með enn einu álegginu.  Ég fæ mér annað en flatböku ef mögulegt er.  Þannig var það einnig í þessu tilfelli.  Hinsvegar sá ég að yngra fólkið reif í sig flatbökurnar af áfergju.  Enda auglýsir Hrói höttur:  "Í pizzum erum við bestir!"

  Vegna flatbakanna og frönsku kartaflanna segir mér svo hugur að hlaðborðið höfði betur til ungs fólks en gamalmenna.

  Gott úrval af fersku grænmeti (papriku,  agúrkum,  tómötum...),  hrásalötum, köldum sósum og einni heitri var í boði.  Ég kastaði ekki tölu á allar þær skálar sem geymdu það góðgæti.  Líklega voru þær á bilinu 10 - 15.  Ég saknaði einskis í því úrvali og var hinn kátasti.

  Grænmetissúpa og brauð og kaffi fylgja hlaðborðinu.  Ég skipti mér ekkert af því. 

  Hálfur lítri af bjór kostar 750 kall.  Það er í dýrari kantinum.  Í útvarpinu hljómuðu leiðinleg lög á Bylgjunni. 

  Innréttingarnar á Hróa hetti eru skemmtilega hráar.  Þær eru úr dökkum kvistóttum við og mynda hálfgerða útilegustemmningu.  Dagblöð liggja frammi.  Það er góður kostur.

  Ljósmyndin er ekki af Hróa hetti.

  Fleiri veitingahúsaumsagnir: 

  http://jensgud.blog.is/blog/jensgud/entry/630463

  http://jensgud.blog.is/blog/jensgud/entry/590495

Sigurjón næsti formaður Frjálslynda flokksins

 

  Stjórn Frjálslynda flokksins í Eyjafirði hefur sent frá sér tilkynningu þar sem skorað er á Sigurjón Þórðarson að gefa kost á sér til formennsku í flokknum á landsþingi flokksins sem haldið verður eftir fjóra mánuði.  Þetta líst mér vel á og styð eindregið.  Sigurjón hefur alla burði til að sameina flokksfélaga í þeim knýjandi verkefnum sem framundan eru og rífa upp fylgi flokksins. 

  Sigurjón er vel kynntur á landsbyggðinni,  sem og á höfuðborgarsvæðinu.  Hann á auðvelt með að vinna með fólki og nýtur stuðnings grasrótarinnar. 

  Frjálslyndi flokkurinn á gott sóknarfæri og Sigurjón er best til þess fallinn að leiða flokkinn til stórsigurs í næstu kosningum. 

  Sjá www.xfakureyri.blog.is

 

Vilja að Sigurjón gefi kost á sér sem formaður Frjálslynda flokksins

Hvað er að því að borgarstjóri djammi?

  Hvað er með þessar sögur af því að borgarstjórinn,  Ólafur F.,  hafi heimsótt skemmtistaði í miðbæ Reykjavíkur með vinum sínum?  Hvað á að vera neikvætt við það?  Af hverju eru samferðamenn borgarstjórans í fyrrverandi meirihluta borgarinnar að gera þetta tortryggilegt með því að segjast eiga erfitt með að verja það?  

  Ólafur er enginn drykkjumaður.  Hinsvegar hefði einungis verið í besta lagi að hann hefði dottið rækilega í það,  eins og tugþúsundir landsmanna gera um helgar.  Ekki man ég eftir því að flokksfélagar Davíðs Oddssonar eða aðrir hafi talið sig vera í vandræðum með að ræða um Bermúdaskál kappans.  Þvert á móti dró hún bara fram skemmtilega hlið á skemmtilegum manni.  

  Stjórnmálamenn,  hvort sem þeir eru borgarstjórar eða forsætisráðherrar,  eru bestir þegar þeir eru ekki hafnir upp yfir almenning heldur eins og annað fólk.  Það er meira en í góðu lagi að Hanna Birna drekki sig blindfulla á Menningarnótt,  æli yfir sig og nærstadda,  verði með drykkjulæti og kynnist af eigin raun hvernig lögreglan tekur á slíku.  Það er kostur að borgarstjóri þekki hlutina frá öllum hliðum.    

Sakar Hönnu Birnu um ósannindi

Frábært framtak

  Það var gott uppátæki hjá Samtóni að veita viðurkenningargripinn Bjarkarlaufið á degi íslenskrar tónlistar.  Samtónn eru samtök allra rétthafa tónlistar á Íslandi.  Sömuleiðis var vel við hæfi að heiðra Árna Matthíasson með Bjarkarlaufinu.  Árni hefur verið manna ötulastur og áhugasamastur við að kynna og styðja við bakið á íslenskri tónlist.   

  Í meira en tvo áratugi hefur Árni skrifað um íslenska tónlist í Morgunblaðið.  Líklega hefur hann álíka lengi farið fyrir dómnefnd Músíktilrauna Tónabæjar.  Það starf fer saman við áhuga hans á grasrótinni í músíksenunni.  Jafnframt hefur Árni fylgst náið með útrás íslenskra tónlistarmanna á heimsmarkaði og leyft lesendum Morgunblaðsins að fylgjast með.  Til viðbótar skráði Árni og gaf út í bókarformi sögu Sykurmolanna. 

  Það er ánægjulegt að Samtónn skuli á þennan hátt sýna í verki að starf Árna sé metið að verðleikum. 

Árni Matthíasson hlaut Bjarkarlaufið

Klaufaleg mistök

  Í skoskum fjölmiðlum var sagt frá náunga sem erfði 3ja hæða hús er var í niðurníðslu.  Það er með 36 gluggum af afbrigðilegri stærð.  Það er að segja ekki í staðlaðri stærð.  Erfinginn er víst nokkuð laghentur.  Hann teiknaði upp fyrir gluggaframleiðslufyrirtæki sérhannaða glugga í réttri stærð.  Fyrirtækið sá síðan um að koma nýju gluggunum fyrir í húsinu.  Þegar kauði flutti með fjölskyldu sinni í húsið kom í ljós að allir gluggarnir voru einungis opnanlegir utanfrá. 

Lóan stal senunni

  Fyrsta frétt í ljósvakamiðlunum í allan gær var um lóu.  Hún er komin.  Stórfrétt dagsins.  Þó að færeyski herinn hefði gert innrás í landið þá hefði það ekki orðið stærri frétt. 

  2 lóur sáust við Höfn og sitthver við Borgarfjörð eystri,  Kópavogi og Eyrarbakka í Reykjavík.  Aðspurður í útvarpinu í gær hvort lóur sem sást til í Kópavogi og Reykjavík gæti verið ein og sama lóan svaraði fuglaáhugamaður:  "Nei.  Önnur var glaðlegri og röddin skærari.  Þannig að það er útilokað."

  Ég var fljótur að gíra mig inn í stemmninguna og fór líka að leita að lóum.  Náði í símaskrána og fann þar hátt í 30 Lóur.  

Samkeppni um nöfn

  Í fyrra efndi MS (Mjólkursamsalan) til samkeppni um nýtt og ferskt nafn á fyrirtækið.  Glæsileg verðlaun voru í boði fyrir besta nafnið. 

  Um svipað leyti efndi VR (Verslunarmannafélag Reykjavíkur) til samskonar samkeppni.  Félagsmenn jafnt sem aðrir voru hvattir til að finna nýstárlegt nafn á félagið.  Nýja nafnið átti að hljóma nútímalegt og spennandi.

  Góð þátttaka var í báðum tilfellunum.  Frumleg og nýtískuleg nöfn streymdu inn.  Af mörgum góðum tillögum voru valin og verðlaunuð þessi nýju nöfn:  MS og VR.

Eggjasvindl

  Heilsugeirinn er uppfullur af plat heilsuvörum.  Allskonar vörur merktar sem lífrænt ræktaðar eru það ekki.  Allskonar húðvörur merktar sem alnáttúrulegar eru uppfullar af kemískum hráefnum.  Það kemur ekki á óvart þegar rannsókn matvælaeftirlits Bretlands hefur nú leitt í ljós að verulegt magn af eggjum sem seld eru sem afurð hamingjusamra lífrænt ræktaðra hænsna koma frá venjulegum hænsnabúum.

  Talandi um eggjasölu.  Kaupmaður á Sauðárkróki,  Bjarni Har,  hefur í áratugi rekið blandaða verslun með matvöru,  fatnað og fleira.  Hinumegin við götuna,  gengt honum,  rak Kaupfélagið 2 myndarlegar verslanir.  Annarsvegar vefnaðarvöruverslun.  Hinsvegar matvörubúð. 

  Einn daginn auglýsti Kaupfélagið tilboðsverð á eggjum.  Bjarni hengdi samdægurs upp í glugga hjá sér samskonar tilboðsverð.  Nokkrum dögum síðar bauð Kaupfélagið ennþá betra eggjaverð.  Bjarni bauð samstundis upp á sama verð.  Kaupfélagið vildi ekki láta litla kaupmanninn á horninu sprengja sig og lækkaði eggjaverðið í 3ja sinn.  Bjarni breytti strax verðinu hjá sér til samræmis.

  Að nokkrum dögum liðnum biður Kaupfélagsstjórinn Bjarna að koma á sinn fund.  Erindið var að semja um að þeir myndu hætta samtímis með tilboðsverð á eggjunum og selja þau með eðlilegri álagningu.  Lauk hann máli sínu með þessum orðum:  "Það gengur ekki til lengdar að við séum að borga með eggjunum."

  Bjarni svaraði:  "Mér er alveg sama.  Ekki borga ég með eggjunum.  Ég læt hana Helgu dóttir mína kaupa eggin í ykkar verslun og sel þau á sléttu."

  Í annað sinn var Bjarni í blaðaviðtali.  Umræðan snérist m.a. um það að verslunin var stöðugt rekin með tapi.  Blaðamanninum gekk illa að átta sig á hvernig hægt var að reka litla verslun með samfelldu tapi og spurði:  "Á hverju lifir þú þá?"  Bjarni svaraði:  "Veltunni."

 

Umfangsmikið eggjasvindl afhjúpað í Bretlandi

Lennon eða McCartney

  Ég hef aldrei hlustað á Bítlana eða sólóplötur Lennons og McCartneys með því hugarfari hvor sé betri lagahöfundur,  söngvari eða tónlistarmaður.  Hef nett dálæti á þeim báðum.  Án þess að vera gagnrýnislaus á það sem miður hefur farið á ferli þeirra.

  Paul er raddsterkari og að sumu leyti fagurfræðilega betri söngvari.  "Töffaralegur" söngstíll Johns vegur fyrir minn smekk alveg jafn þungt.  Ég man ennþá þegar ég,  barn að aldri,  heyrði fyrst "Twist & Shout" með Bítlunum.  Ég var alveg sleginn af hrifningu yfir þessum hömlulausa öskursöngstíl.  Enn í dag get ég hlustað á þetta lag og dáðst að söngnum.

  Mitt uppáhaldslag með Bítlunum er "Helter Skelter".  Það er eftir Paul og hann öskrar það dásamlega.  Reyndar á ég erfitt með að gera upp á milli fjölda annarra Bítlalaga, sem næstum því standa jafnfætis "Helter Skelter".  Það skiptir mig ekki máli hvor eða hver þeirra Bítla samdi hin ýmsu Bítlalög.  Ég hlusta ekki á þau út frá því hver er höfundurinn eða söngvarinn.  Öll lög eftir Harrison á Bítlaplötunum eru líka virkilega góð.  Ringó var/er skemmtilegur trommari en síðri lagahöfundur og söngvari.

  Eitt af fáum lögum sem hafa framkallað gæsahúð á mér af vellíðan er "Happiness is a Warm Gun".  Það var í kaflanum þegar John öskrar yfir samsönginn í lok lagsins. 

  Paul er frábær bassaleikari.  Einn sá besti í rokkinu.  Tæknilega flinkur og flottur.  John var ekki tæknilega snjall gítarleikari (og ömurlegur bassaleikari,  sbr. "Long and Winding Road").  Að vísu lunkinn kassagítarpikkari,  eins og heyrist í "Julia".  En hafði flottan stíl,  bæði sem rythmagítarleikari og sum gítarsóló hans eru "töff". 

  Fyrsta sólóplata Lennons,  "Plastic Ono Band",  hefur elst einstaklega vel og er í hópi bestu platna rokksögunnar (en fékk vonda dóma þegar hún kom út.  Þótti óþægilega hrá og einföld á "progressive" árum hipparokksins.  Hljómaði á þeim árum eins og "demo".  En fékk uppreist æru eftir endurmat pönk- og nýbylgjunnar nokkrum árum síðar).  Næsta sólóplata,  "Imagine",  er líka mjög góð.  Eftir það urðu honum mislagðari hendur.  M.a. vegna hraustlegrar áfengisdrykkju og dópneyslu.  Sólóferill Pauls er jafnari.    

  Um líkt leyti gerðu John og Paul sitthvora rokk & ról plötuna.  Þar "coveruðu" þeir gamla rokkslagara.  Þrátt fyrir að John væri blindfullur og ruglaður þá hafði hann vinninginn í þeim samanburði.  Síðar trompaði Paul báðar plöturnar á "Run Devel Run".

  Þó að ég geri ekki upp á milli Pauls og Johns þá leikur mér forvitni á að vita afstöðu bloggverja til þeirra tveggja.  Þess vegna hef ég sett hér á síðuna,  neðst til vinstri, skoðanakönnun.  Hvet ég sem flesta til að taka þátt til að fá marktæka niðurstöðu.