Veitingahús - umsögn

 

Veitingastaður:  Hrói höttur,  Hringbraut 119,  Reykjavík

Réttur:  Hádegisverðarhlaðborð

Verð:  1290 kr.

Einkunn: *** (af 5)

  Mér skilst að heitu réttirnir í hádegisverðarhlaðborði Hróa hattar á Hringbraut séu hinir fjölbreyttustu frá degi til dags.  Þegar ég mætti á svæðið voru heitu réttirnir svínarifjasteik og kjötfarsbollur í brúnsósu með blönduðu grænmeti.  Hvorugur rétturinn er í uppáhaldi hjá mér.  En báðir voru í hinu besta lagi.  Með þessum réttum var hægt að fá sér franskar kartöflur.  Það þykir mér vera versta útgáfa af kartöflum.  Árangurslaust skimaði ég eftir soðnum kartöflum,  pönnusteiktum eða kartöflusalati.  Einungis þær frönsku voru í boði. 

  Þrjár tegundir af nýlöguðum flatbökum (pizzum) voru líka á hlaðborðinu.  Allar með sitthvoru álegginu.  Um leið og ein bakan kláraðist var nýrri bætt við með enn einu álegginu.  Ég fæ mér annað en flatböku ef mögulegt er.  Þannig var það einnig í þessu tilfelli.  Hinsvegar sá ég að yngra fólkið reif í sig flatbökurnar af áfergju.  Enda auglýsir Hrói höttur:  "Í pizzum erum við bestir!"

  Vegna flatbakanna og frönsku kartaflanna segir mér svo hugur að hlaðborðið höfði betur til ungs fólks en gamalmenna.

  Gott úrval af fersku grænmeti (papriku,  agúrkum,  tómötum...),  hrásalötum, köldum sósum og einni heitri var í boði.  Ég kastaði ekki tölu á allar þær skálar sem geymdu það góðgæti.  Líklega voru þær á bilinu 10 - 15.  Ég saknaði einskis í því úrvali og var hinn kátasti.

  Grænmetissúpa og brauð og kaffi fylgja hlaðborðinu.  Ég skipti mér ekkert af því. 

  Hálfur lítri af bjór kostar 750 kall.  Það er í dýrari kantinum.  Í útvarpinu hljómuðu leiðinleg lög á Bylgjunni. 

  Innréttingarnar á Hróa hetti eru skemmtilega hráar.  Þær eru úr dökkum kvistóttum við og mynda hálfgerða útilegustemmningu.  Dagblöð liggja frammi.  Það er góður kostur.

  Ljósmyndin er ekki af Hróa hetti.

  Fleiri veitingahúsaumsagnir: 

  http://jensgud.blog.is/blog/jensgud/entry/630463

  http://jensgud.blog.is/blog/jensgud/entry/590495

Athugasemdir

[...désú (IP-tala skráð) 13.9.2008 kl. 18:03]

Mín reynsla af þessum stað er að fæðið þarna hjá Hróanum er allajafna með alveg prýðilegasta móti en þjónustan er oftar en ekki fyrir neðan allar hellur.  Maður má oft bíða mjööööög lengi eftir þjónustu á meðan þjónustufólkið gelgjast eitthvað utan í hvert öðru eða vinum sem mæta í heimsókn svo betur má ef duga skal.

[Þorsteinn Briem, 13.9.2008 kl. 18:14]

Ég fór nokkrum sinnum með Alexander, son minn, á Hróa hött en sem betur fer er hann vaxinn upp úr því og nú förum við á Madonnu og Caruso eða til útlanda. Í Mílanó og Róm eru pitsurnar ódýrari en hér og því mæli ég með flugi þangað (og aftur til baka, ef fólk hefur áhuga á því).

[Ómar Ingi, 13.9.2008 kl. 18:36]

Þetta var nú með þynnsta móti eins og flatbökurnar þeirra á Hróa

[Jens Guð, 13.9.2008 kl. 21:21]

  ...désú,  samkvæmt frásögn þinni er eins gott að ekki reynir á þjónustufólkið í hádegisverðarhlaðborðinu. 

  Steini,  ég var einmitt að rekast á að flugið til og frá Róm kostar ekki nema 39.800 hjá Heimsferðum. 

  Ómar,  ég er enginn flatbökumaður.  En í þau fáu skipti sem ég hef neyðst til að fá mér slíkan mat vil ég hafa bökurnar sem allra allra þynnstar. 

[Þorsteinn Briem, 13.9.2008 kl. 21:40]

39.800 krónur eru sífellt færri evrur og í Róm er greitt fyrir pitsurnar í evrum. Þú hefur nú ekki áttað þig á þessu, Jensinn minn.

[Ómar Ingi, 13.9.2008 kl. 22:12]

Já bakan hefur semsagt verið betri en greinin