Spennandi te-leginn ufsi

  Fyrir nokkrum dögum birti ég hér uppskrift af grænlenskum rækjupönnukökum.  Það vakti mikla gleði og hamingju.  Einkum meðal þeirra sem prófuðu uppskriftina.  Þó að grænlensku pönnukökurnar séu sælgæti er hætta á að þær verði leiðigjarnar þegar þær eru snæddar í öll mál alla daga.  Nú er svo komið að fólk er farið að biðja um aðra uppskrift til að fá æskilega fjölbreytni í mataræðið.  Þá er upplagt að fá sér færeyskan te-leginn ufsa.

  Það sem til þarf er 211 gr ufsaflak,  roðlaust og beinlaust.  Síðan er blandað saman 7 og hálfri matskeiðum af salti,  3 af sykri og 1 og hálfri af Earl Gray te-i (ekki í tepoka).  Blöndunni er nuddað vel á allt ufsaflakið.  Afganginum er stráð á fat sem rúmar flakið.  Flakið er lagt þar ofan á.  Því næst er sellofón-plastfilma strengd yfir fatið.  Það er látið standa óhreyft í ísskáp í 14 klukkutíma og 7 mínútur.  Þá er flakið skorið í þunnar sneiðar og notað sem álegg ofan á brauð.  Það er gott að setja smávegis af graflaxsósu með.  Ufsinn bragðast nefnilega glettilega í humátt að graflaxi.   

  Einnig er við hæfi að setja með á brauðið salatblöndu úr gulum baunum,  kjúklingabaunum,  papriku og púrrulauk.

Athugasemdir

[Sigurður I B Guðmundsson, 9.4.2011 kl. 09:28]

Hvenær kemur matreiðslubókin Jens Guð(dómlegir) réttir út?

[Númi (IP-tala skráð) 9.4.2011 kl. 19:55]

Jens! ertu búinn að kjósa ´´þorskurinn,, þinn.?

[Jens Guð, 9.4.2011 kl. 19:59]

  Sigurður I.B.,  þetta er virkilega góð hugmynd.  Ég kann margar áhugaverðar uppskriftir.  Fyrst verð ég samt að afgreiða nokkrar aðrar bækur sem ég hef verið ráðinn til að skrifa.  Þessa dagana er ég á fullu við að skrá ævisögu Eivarar.  Sú bók kemur út síðar á þessu ári.

[Jens Guð, 9.4.2011 kl. 20:00]

  Númi,  já.  Ég kaus Nei.

[Númi (IP-tala skráð) 9.4.2011 kl. 20:18]

Góður,og ég er sammála þér Jens.

[Sigurbjörg Sigurðardóttir, 10.4.2011 kl. 13:15]

ætlar þú ekki að henda þér í að gera matreiðslubók.

[Jens Guð, 11.4.2011 kl. 03:20]

  Númi,  það virðast fleiri hafa verið sammála okkur.

[Jens Guð, 11.4.2011 kl. 03:21]

  Sigurbjörg,  það kemur til greina.  En ekki fyrr en bókin mín um Eivöru er afgreidd.

[Hjóla-Hrönn, 12.4.2011 kl. 14:30]

ooooo, nú tárast ég og minnist uppáhalds áleggsins míns.  Sjólax.  Hvílíkur unaður að rúlla upp lokinu á niðursuðudósinni og finna þar ilmandi dökkbleikt fiskhold, sem liðaðist ljúflega ofan á smurða brauðsneið og var svo snætt með heitu te-i, Melroses traditonal, að vísu.  Held að þetta hafi verið reyktur ufsi.  Væntanlega einhver litar- eða rotvarnarefni sem hefðu drepið mann ef maður hefði etið 100 dósir á dag í 100 ár.

Sjólax og gospillur.  Það sem ég sakna mest úr æsku

Aldrei að vita nema ég prófi þetta...