Kominn frá Noregi

  Ég skrapp til Noregs.  Nánar tiltekið til Óslóar.  Ég vildi sjá og heyra hvort ástæða væri til að hafa Noreg með í vest-norræna sambandsríki Íslands, Færeyja og Grænlands.  Ég er aðallega að hugsa um að hafa Sama með.  Þeir gera svo flotta músík.  Joik kallast fyrirbærið og er það elsta í Evrópu.  Samar skilgreina sig reyndar sem íbúa Samalands fremur en íbúa einhvers þeirra fjögurra landa sem Samaland nær yfir (eða inn á):  Noregs, Svíþjóðar, Finnlands og Rússlands).

  Fleiri í Noregi en Samar gera notalega músík.  Þar á meðal morðinginn,  nasistinn og kirkjubrennuvargurinn Burzum.  Hann gerir yndislega músík - þegar hann er utan fangelsis.  Dæmi um það er lagið á myndbandinu efst.  Ég hef skömm á skoðunum hans og lífsstíl.  En ég tók fyrir mörgum árum ákvörðun um að láta vondar skoðanir tónlistarmanna ekki bitna á því sem þeir gera flott í músík.  

  Myndbandið hér fyrir neðan er með samísku tónlistarkonunni Mari Boine:

  Ég hef ekki áður komið til Noregs.  Eins og alltaf þegar komið er á nýjan stað kemur margt á óvart - þó vinir og vandamenn hafi verið og séu búsettir í Noregi og sagt skilmerkilega frá landi og þjóð. 

  Ég fór ekkert út fyrir miðborg Óslóar nema til og frá flugvelli.  Vel á minnst:  Flugvélar Iceland Express hófu sig á loft á auglýstum tíma.  Ég held að vísu að vélin frá Noregi hafi tekið á loft hálfri mínútu of fljótt. En ég er ekki viss um að úrið mitt sé alveg nákvæmt.  Þetta var innan skekkjumarka.

  Eftirfarandi kom mér mest á óvart:

  - Hvað hlutfall hörundsdökkra er hátt í miðborg Óslóar.  Og hvað hátt hlutfall bleiknefja talar saman á spænsku eða ítölsku eða a-evrópskum málum.  Þetta setur skemmtilegan svip á bæinn.  Eins og allir fjölbreyttu matsölustaðirnir: Tyrkneskir, líbanskir, indverskir, kínverskir o.s.frv.  Svo og allar litlu hverfisbúðirnar (cornershops) sem karlmenn af indverskum eða pakistönskum uppruna reka.  Bandarískir skyndibitastaðir eru einnig áberandi:  McDonalds, Burger King, Subway og þeir allir.  Eitt sinn hraktist ég undan óvæntri rigningu inn á McDonalds. Uppistaðan af viðskiptavinunum voru hörundsdökkir. Þá áttaði ég mig á því hvers vegna McDonalds og Burger King þrifust ekki á Íslandi. Hérlendis er hlutfall hörundsdökkra ekki nógu hátt til að standa undir traffík á þessa staði.

  - Ég heyrði aldrei bílflaut. Kannski er bannað að þeyta bílflautur í Ósló? Eða þá að þetta undirstrikar hvað Norðmenn eru afslappaðir í umferðinni. Þegar ég var í New York fyrr á árinu þá heyrðist ekki mannamál fyrir stöðugu bílflauti og bílstjórar steyttu hnefa að hver öðrum, sendu fokk jú merki og hrópuðu ókvæðisorð.  Ekkert að því.  Bara öðru vísi stemmning.

  - Gangandi Norðmenn fara ekki út á gangbraut gegn rauðu ljósi. Ekki heldur þó að engin bílaumferð sé. Kannski liggja háar sektir við slíku?

  - Á sunnudegi er miðborg Óslóar eins og dauðs manns gröf. Hvorki gangandi á ferli né bílaumferð. Búðir lokaðar og ekkert um að vera. Þetta er skrítið í stórborg.

  - Stórir fólksbílar og jeppar sjást ekki. Bílaflotinn samanstendur af nettustu bílum. Þar á meðal svokölluðum Buddy. Ég held að það séu rafbílar.

Norðmenn eiga ógrynni af ljúfum rokkhljómsveitum. Margar þeirra eru stórar á alþjóðamarkaði.  Og eiga það skilið  Þeirra á meðal Dimmu borgir sem hefur dálæti á Mývatnssveit og nágrenni.

   

Athugasemdir

[Óskar Þorkelsson, 2.11.2011 kl. 05:32]

ÞEtta er nokkuð greinargóð lýsing hjá þér af Oslo :)

[Sigfinnur Mar Þrúðmarsson (IP-tala skráð) 2.11.2011 kl. 08:37]

Flott samantekt og nokkuð ljóst að maður heldur til Oslo einn daginn.

En viðurlögin á Íslandi að labba á móts við Rauðan kall á götuvita er 5.000 kr minnir mig. Almennt á norðurlöndunum, t.d Danmörku þá er þessum hætti einnig haldið uppi, það er bara ekki farið útá götuna þegar að það er rauður kall.

Skemmtileg lýsing og fær man til þess að huga að Osloarferð.

[Ásthildur Cesil Þórðardóttir, 2.11.2011 kl. 11:08]

Já það er notalegt að ganga um miðborg Oslóar, fórstu nokkuð á markaðinn?  það er svona flóamarkaður niður við ána, þar sem allt er selt, mest samt þýfi  En hægt að fá margt afar ódýrt.  Gaman að skoða samt.  Sonur minn keypti sér síma, og það voru öll númer fyrri eiganda ennþá inn í minninu. 

Annars er veðrið víst óvenjulega gott núna í Osló miðað við árstíma.  Gott að þú skemmtir þér vel minn kæri.

[Helga Kristjánsdóttir, 2.11.2011 kl. 15:54]

  Stórborgir eru sjermerandi,með sitt fjölbreytta mannlíf,en Bergen er meira hlý og aðlaðandi,fyrir minn smekk líklega vegna aldurs. Þú ert aldeilis hrifinn af þungarokki,þótt þú játaðir í den að ´jazz,væri toppurinn. Ég bíð eftir að dóttursonur min,sem stundar nám í Grieg-listaháskólanum í Bergen,eflist í leik sínum á gítar og ég geti heimsótt hann,það er flogið þangað beint,eða var í haust,annars færi ég ekki.

[Jens Guð, 2.11.2011 kl. 15:58]

  Óskar, takk fyrir það.

[Jens Guð, 2.11.2011 kl. 16:00]

  Sigfinnur Mar, takk fyrir þessar upplýsingar.  Það hlaut eiginlega að vera refsivert að ganga gegn rauðu ljósi. Það var horft á mig með forundran og reiðisvip í hvert sinn sem ég skokkaði á móti rauða ljósinu.

[Jens Guð, 2.11.2011 kl. 16:06]

  Ásthildur Cesil, veðrið var virkilega hlýtt og fínt - fyrir utan smá rigningu.  Ég varð ekkert var við þennan flóamarkað. Reyndar forðaðist ég verslanir. Ekki aðeins vegna þess hvað verðlag er hátt heldur fer ég bara aldrei í verslanir í útlöndum, ef undan eru skildar plötubúðir og vínbúðir. Það eina sem ég keypti í Noregi voru nokkrar norskar plötur sem fást ekki á Íslandi.

[Jens Guð, 2.11.2011 kl. 16:10]

  Helga, mér var einmitt sagt að Bergen væri flottari en Ósló. Ég er "svag" fyrir þungu rokki. Ég veit að Norðmenn eru öflugir í djassi. Ég skimaði eftir djasshljómleikum í Ósló án árangurs. Ég á nokkrar norskar djassplötur en þekki nöfnin ekki nógu vel. Nema saxann Jan Garbarek.

[Jón Steinar Ragnarsson, 2.11.2011 kl. 16:21]

Buddy bílarnir eru norsk framleiðsla. Rafbílar. Þetta fyrirtæki fór með neistaflugi á hausinn í síðustu viku og segjast norðmenn hafa lagt alla slíka drauma á hilluna til frambúðar.

Velkominn heim annars. Nokkuð sönn lýsing á staðháttum en svolítið politically correct fyrir minn smekk. 

[Jens Guð, 2.11.2011 kl. 20:51]

  Jón Steinar,  takk fyrir upplýsingarnar.  Ég sem var svo hrifinn af Buddy bílunum.

[Gunnar (IP-tala skráð) 2.11.2011 kl. 22:04]

Ætli Dimmu Borgir meðlimir rúnti um á Buddy bíl?

[Jens Guð, 2.11.2011 kl. 22:31]

  Gunnar, einhvern veginn tel ég mig geta fullyrt að liðsmenn Dimmu Borgar rúnti um á öðruvísi bílum en Buddy.  Mig rámar í að hafa séð mynd að einum þeirra á mótorhjóli.