Ofbeldisfullur kópur skotinn

 

  Selurinn hefur mannsaugu.  Góðleg augu og hrekklaus.  Samskipti sels og manns eru yfirleitt ljúf og eins og best verður á kosið.  Selurinn forðast manninn,  kemur sér í burtu þegar maðurinn nálgast hann.  Maðurinn skýtur selinn.  Selkjöt er gott.  Selspik er sælgæti.  Úr feldi selsins er hægt að búa til skjólgóðar og fallegar flíkur.

  Í síðustu viku urðu breytingar á samskiptum sels og manns.  Stálpaður kópur í Hróarskeldufirði mátti ekki koma auga á manneskju öðru vísi en tryllast.  Hann reyndi af öllum mætti að ráðast á fólk með grófu ofbeldi.  Til allrar hamingju náði hann til fæstra sem árás hans beindist að.  Fólki til happs varð að hann hafði ekki almennilega útlimi til að klifra um borð í báta.  Ekkert vantaði samt upp á að hann reyndi.  Hann reyndi og reyndi.  Honum tókst að glefsa að mörgum og náði að bíta í hönd á konu. 

  Það var ekki um annað að ræða en leita ráða hjá Háskólanum í Hróarskeldu.  Þar á bæ komust menn að þeirri niðurstöðu að nauðsynlegt væri að drepa kópinn.  Það væri aðeins tímaspursmál hvenær hann næði að slasa einhvern alvarlega.  Börn að leik niðri í fjöru voru í sérlega mikilli hættu.  Núna stendur jafnframt yfir í Hróarskeldu mikil tónlistarhátíð.  Ofur ölvi eða dópaðir Íslendingar gætu ráfað um fjöruna og meira að segja lagst til sunds. 

  Kópurinn var drepinn með einu skoti í hausinn.

  Fræðimenn hafa sett fram ýmsar kenningar um þessa afbrigðilegu hegðun kópsins.  Kópar eiga ekki að haga sér svona eins og ruddalegt fólk.  Ein kenningin er sú að kópurinn hafi verið geðveikur.  Önnur kenning er sú að kópurinn hafi átt harma að hefna.  Hann hafi lent í slæmum samskiptum við fólk.  Samskiptum sem kallaði fram hjá honum hatur í garð fólks.  Selir eru ekki mannglöggir.  Fyrir þeim er maðurinn bara maður.  Sami rassinn undir þeim öllum.

  Ef seinni kenningin er rétt þykir líklegt að manneskja hafi náð kópnum mjög ungum og haldið hann sem gæludýr.  En verið vondur við hann.  Það eru til manneskjur sem eru vondar við dýr og vondar við manneskjur. 

Athugasemdir

[Óskar Arnórsson, 4.7.2012 kl. 22:52]

Eina "afbrigðilega" dýrategundinn á allri jörðinni er mannskepnan og alls ekki selur. Ég lít á sel eins og rottur hafsins og það er fullt af fallegum rottum með falleg augu.

Það er rangt að selsaugu líkist mannsaugum. Það er bara að spyrja næsta augnlækni um staðreyndir....

Að selur bítur eða ráðist á manneskjur þýðir bara að hann hafi verið píndur af fólki á undan. Selir eru eins og önnur dýr, með meðvitund och skilning, enn líklegast enga skipulagða hugsun...

[Sigurður I B Guðmundsson, 4.7.2012 kl. 23:04]

Talandi um selspik. Það var mikið borðað í Öræfunum þegar ég var þar í sveit "í gamla daga" og þótti mér það mjög gott. En þessi kópur hefur kannski verið uppdópaður og Íslendingarnir alsgáðir!!

[Jens Guð, 5.7.2012 kl. 22:49]

  Óskar,  er það ekki titill á bók,  Selurinn hefur mannsaugu?  Eða hvort það er titill á leikriti. 

[Jens Guð, 5.7.2012 kl. 22:50]

  Sigurður I.B.,  hann nafni þinn,  kallaður Siggi Ginseng, býður mér stundum í veislumat:  Siginn fisk og selspik.  Það er lostæti.

[Óskar Arnórsson, 5.7.2012 kl. 23:34]

Mig minnir að það hafi verið Birgitta Bardot sem sagði á Grænlandi að selskópar hefðu mannsaugu. Það varð allavega frægara enn sú staðreynd að selur hefur selsaugu...

... og svo voru búin til risastór plaköt í USA sem voru með flennistórum nærmyndum av selskópum og textin fjallaði um að íslendingar ætu börn...bið að heilsa Sigga Ginseng...

[Jens Guð, 6.7.2012 kl. 00:16]

  Óskar,  ég kem kveðjunni til skila.  Eitt sinn er þú settir hér inn "komment" hitti ég Sigga Ginseng og hann hlóð á þig hóli.  Sagði þig vera bráðgáfaðan, fjölfróðan og "orginal sjéní".  Ég svaraði því til að mér þætti alltaf akkur af því að fá "komment" frá þér og fróðleiksmolana í þeim.