Furðulegt og vandræðalegt mál

  Snúið mál - í bókstaflegri merkingu - er fyrir dómstólum í Norður-Ameríku.  Svo snúið er málið að veruleg hætta er á að það leiði til alvarlegrar milliríkjadeilu.  Það er að segja víðtækari deilu en þeirri sem snýr aðeins að bandarískum húskaupanda og kanadískum húsaframleiðanda. 

  Forsaga málsins er sú að bandarískur maður,  John Brown,  var tilbúinn að flytja úr foreldrahúsum.  Hann keypti landskika í sveitinni og pantaði einingarhús í póstkröfu frá Kanada.  Síðan hófst hann handa við að setja húsið saman.  Eins og aðrir rauðhálsar (rednecks) í Suðurríkjunum er John "reddari".  Menn bjarga sér sjálfir,  redda hlutunum og eru ekkert að eltast við þjónustu fagmanna.  John gekk sjálfur frá pípulögnum,  rafmagni og öðru sem þarf til að hús sé íbúðarhæft.  Hann sparslaði og málaði húsið að utan og innan,  sló upp girðingu umhverfis það og gróðursetti nokkrar trjáhríslur.

  Þegar allt var orðið fínt bauð John æskuvinkonu sinni í heimsókn.  Hún benti honum á að húsið væri eins og á hvolfi.  Fleiri í sveitinni tóku undir með henni þegar John bar þetta undir þá.  Sjálfur komst hann loks að sömu niðurstöðu eftir að hafa skoðað málið vandlega.  Honum hafði frá fyrsta degi þótt húsið einkennilegt.  En hann fór nákvæmlega eftir teikningunni sem fylgdi.

  Nú hefur John kært kanadíska húsframleiðandann fyrir að selja sér hús á hvolfi.  Framleiðandinn heldur því fram að John hafi snúið teikningunni á haus. 

Athugasemdir

[Sigurður I B Guðmundsson, 7.7.2012 kl. 11:21]

Er þetta ekki rétta húsið fyrir þá sem settu landið á hvolf???

[Sigurður I B Guðmundsson, 7.7.2012 kl. 11:48]

Var að skoða myndina betur. Er þetta ekki Jón Ásgeir í glugganum??

[Jens Guð, 7.7.2012 kl. 15:15]

  Sigurður I.B.,  góður!