15.8.2014 | 21:39

Veitingaumsögn

súp-afarmerssoup 

  - Réttur:  Íslensk kjötsúpa 

  - Staður:  Warm Farmer´s Soup

  - Staðsetning:  Skólavörðuholt
 
  - Verð: 690 - 990 kr.
 
  - Einkunn: *** (af 5)
 
  Warm Farmer´s Soup er súpubíll.  Súpan er afgreidd út um bílalúgu.  Á gangstéttinni fyrir utan eru nokkur ódýr tréborð,  tréstólar og plaststólar. 
  Kjötsúpan er seld í frauðplastskál.  Plastskeið fylgir með.  Minni skálin tekur á að giska 400 ml.  Sú stærri um það bil 700 ml.  
  Ég fékk mér stærri skálina.  Í ljós kom að ekki er um hefðbundna íslenska kjötsúpu að ræða.  Þessi er þykk og ógegnsæ.  Af yfirborðinu sést ekkert hvað er í súpunni.  Hún er bragðskörp og bragðgóð.  Ég taldi mig finna bragð af rauðpipar (chili)  og engifer.
  Ég kafaði ekki á botn skálarinnar heldur fleytti af yfirborðinu.  Það var ekki fyrr en komið var niður að botnfylli sem vart varð við örfáa litla kjötbita,  þrjá litla gulrótarbita og tvo smáa bita af sætri kartöflu (að ég held fremur en gulrófu).  Þetta er stóri mínusinn við súpuna:  Kjöt og grænmeti er skorið við nögl.  Þetta er matarrýrasta kjötsúpa sem ég hef fengið.  Sæki ég þó stíft í kjötsúpu hvar sem hún er í boði.  Þegar hugurinn hvarflar að íslenskri kjötsúpu blasir fyrir hugskotsjónum mynd á borð við þessa (sem er töluvert frábrugðin súpunni hjá Warm Farmer´s Soup):
 
kjötsúpa
Síðustu 10 veitingaumsagnir:
 

Meginflokkur: Matur og drykkur | Aukaflokkar: Fjármál, Lífstíll, Viðskipti og fjármál | Breytt 16.8.2014 kl. 12:42 |

« Síðasta færsla | Næsta færsla »

Athugasemdir

1 Smámynd: Axel Jóhann Hallgrímsson

Fátt er betri matur en svokölluð íslensk kjötsúpa. Að kalla eitthvað fyrirbrigði íslenska kjötsúpu, sem er verulegt frávik frá hinni hefðbundnu kjötsúpu, eru vörusvik og blekkingar. Hafragrautur verður t.a.m. ekki að íslenskri kjörsúpu með því að blanda saman við hann kjötflís og grænmetispjötlu. 

Axel Jóhann Hallgrímsson, 16.8.2014 kl. 09:55

2 Smámynd: Jens Guð

Axel Jóhann, ég tek undir þín orð. Miðað við nafn súpuílsins og staðsetningu við Hallgrímskirkju er greinilega verið að stíla inn á útlenda ferðamenn. Þeir hafa ekki samanburðinn.

Jens Guð, 16.8.2014 kl. 13:08

3 identicon

Mér finnst kjötsúpan á Skólavörðuholtinu alveg ágætlega bragðgóð en ég er sammála Jens, manni finnst kjötið mjög skorið við nögl. Staðurinn auglýsir súpuna sem "spicy" þannig að það er tæpast hægt að segja að um blekkingar eða vörusvik sé að ræða. Þetta er bara þeirra útgáfa af íslenskri kjötsúpu.

Íslenska kjötsúpan eins og við þekkjum hana (með mjög miklu af kjöti og rótarávöxtum) myndi kallast "stew" á ensku, ekki "soup". Súpuvagninn er augljóslega stílaður inn á túrista og ég held að túristar líti svo á að þetta sé alveg hæfilega mikið magn af kjöti fyrir eitthvað sem er auglýst sem "soup".

Varðandi hina hefðbundnu íslensku kjötsúpu. Það er ekkert til sem heitir einhver standard í þeim efnum (nema menn vilji líta á uppskrift Helgu Sigurðar sem standardinn sem öllum beri að fara eftir). Kjötsúpur hafa alltaf verið mismunandi eftir landshlutum og eftir efnum, aðstæðum og smekk. Stundum er smávegis af haframjöli sett út í hana (þá verður hún fremur gruggug) en oftar smávegis af hrísgrjónum. Eða öllum grjónum er sleppt. Ég hef fengið kjötsúpu á sveitabæ úti á landi sem var með svo mikið af hrísgrjónum að hún var nánast eins og grautur. Lauk sér maður stundum í hefðbundnum í kjötsúpum en stundum ekki, sömuleiðis hvítkál.

Ef það er eitthvað bragð sem mér finnst sérkennandi fyrir hina hefðbundnu íslensku kjötsúpu þá er það bragðið af þurrkuðu súpujurtunum (sem er blanda af selleríi, lauk og gulrótum). Þessi bragðblanda er ættuð af meginlandi Evrópu (Frakklandi, Ítalíu) og mér er til efs að innflutningur á þessu tiltekna þurrmeti hafi hafist fyrr en á 1. eða 2. áratug síðustu aldar. Á Íslandi hefur skapast sú hefð, einhverra hluta vegna, að nota þessar þurrkuðu súpujurtir í kjötsúpu og ekkert annað.

Íslenskir matgæðingar fyrri alda hafa sennilega notað hvönn og/eða kerfil til að bragðbæta kjötsúpuna sína, til forna hugsanlega hvítlauk. Efnamenn jafnvel einhverjar innfluttar súpujurtir.

Svo íslenska kjötsúpan er í rauninni naglasúpa, menn nota það sem þeir hafa handbært og það sem þeir hafa efni á að skella út í hana. Þróunin heldur bara áfram, þeir nútímaíslendingar sem hafa smekk fyrir hvítlauk, chili og harissa skella þessu góðmeti út í sína súpupotta. Ef menn vilja halda sig við Helgu Sig fá þeir sér kjötsúpu á Múlakaffi. Það er nefnilega pláss fyrir mismunandi smekk í þessum efnum og engin ástæða til að heimta einhvern einn ákveðinn standard.

Anna (IP-tala skráð) 16.8.2014 kl. 19:44

4 Smámynd: Jens Guð

Anna, bestu þakkir fyrir fróðleikinn.

Jens Guð, 16.8.2014 kl. 21:03

5 Smámynd: Hrólfur Þ Hraundal

Kjötsúpan hennar mömmu var sölt, matarmikil og feit, en ekki bara vatn, hrísgrjón og nokkrir horaðir kjöttægjur.  

Hrólfur Þ Hraundal, 18.8.2014 kl. 11:33

6 Smámynd: Jens Guð

Hrólfur, þannig á kjötsúpa að vera.

Jens Guð, 27.9.2014 kl. 19:47

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband