Plötuumsögn

 

 

 

 

 

 

 

 

 

 

 

 - Titill:  Ýlfur

 - Flytjandi og höfundur laga:  Gísli Þór Ólafsson

 - Textar:  Geirlaugur Magnússon, Gísli Þór Ólafsson og Gyrðir Elíasson

 - Einkunn: **** 

 

  Í fyrra sendi Gísli Þór Ólafsson frá sér plötuna Bláar raddir.  Um hana má lesa með því að smella hér .  Ýlfur er eins og beint framhald af henni.  Efnistök eru að mestu þau sömu. Gísli Þór og Sigfús Arnar Benediktsson skipta á milli sín hljóðfæraleik,  sem fyrr.  Sá fyrrnefndi spilar á kassagítar og bassa.  Hinn á rafgítar,  hljómborð og trommur.

 Lögin eru flest komin til ára sinna,  16 - 18 ára.  Þau eru mörg hver frekar seintekin.  Kannski í og með vegna þess að ekki eru alltaf skörp skil á milli laglínukafla (vers) og viðlags.  En öll vinna þau glæsilega á við ítrekaða hlustun. Fegurð laglínunnar skríður fram.  Þegar best lætur nær hún góðu skriði.  Aðeins tvö lög er hröð og rokkuð.  Annarsvegar er það hið bráðskemmtilega Fleiri nátta blús.  Hrífandi pönkað nýbylgjurokk.  Hefði smellpassað í  Rokk í Reykjavík.  Hinsvegar er það Síðasti blús.  Einnig hið ágætasta lag.    

  Eitt af mörgu sem er heillandi við plötuna er að Gísli Þór rembist ekki við að syngja fagurfræðilega vel.  Hann leyfir sér að skæla röddina og hafa hana allavega.  Jafnvel fara pínulítið í humátt að Megasi. Eða þannig.  Honum virðist vera þetta eðlislægt.  Söngstíllinn gefur tónlistinni ævintýralegan blæ.

  Gísli Þór á helming söngtextanna.  Fjórir eru eftir Guðlaug Magnússon og einn eftir Gyrði Elíasson.  Allir standa vel fyrir sínu sem sjálfstæð úrvals ljóð (óháð tónlistinni).               

  Fegurstu lög plötunnar eru Óttusöngur,  Og einn blús til tanja og Milli drauma.  Það er einhver stemmning sem leiðir huga að Tom Waits.  Samt ekki eins áberandi og á Bláum röddum.  Kannski er maður orðinn vanari sjálfstæðum stíl Gísla Þórs og þarf ekki að líkja honum við aðra (nema í viðleitni til að staðsetja hann fyrir þá sem ekki hafa heyrt í honum).

 Sýnishorn:  HÉR og HÉR

 

 

     

  

Athugasemdir

[afglapi (IP-tala skráð) 15.12.2014 kl. 16:13]

Mögnuð plata frá vanmetnasta lagasmið landsins. Sjálfum þykir mér hið undurfagra "Blá blóm" tróna hæst. Túlkun Gísla er persónuleg og einskonar áunninn smekkur, líkt og viskí.

https://soundcloud.com/gillon/bla-blom

[Jens Guð, 15.12.2014 kl. 21:10]

  "Blá blóm" er voldugt og flott lag.