Ævintýri í Suðurhöfum

  Fyrir jól var veðurspá kaldranaleg.  Vetrarhörkur voru boðaðar;  hörkufrost á fróni.  Viðbrögð mín voru þau að flýja suður um höf.  Veðurspá fyrir Alicante á Spáni var notaleg,  16-20°.  Í þann mund er ég hélt upp á flugvöll ræddi ég við systir mína,  búsetta á Spáni.  Hún benti mér á að hitatalan segi aðeins hálfa sögu.  Vegna loftraka sé kaldara en ætla megi.  16-20° hiti í Alicante bjóði ekki upp á stuttbuxur og hlýrabol.

  Ég skellti þegar á mig hnausþykkri prjónahúfu,  vafði trefli um háls,  tróð mér í lopapeysu,  föðurland og fóðraða leðurhanska.  Kuldaúlpa með loðfóðraðri hettu tryggði að ekki myndi slá að mér.

  Á flugvellinum í Alicante var ég best dúðaður af öllum.  Enginn var léttklæddur.  Enda gustur úti.  Verra var að enginn talaði ensku.  Hinsvegar hefur fólkið þarna náð tökum á spænsku.  Sérlega var aðdáunarvert að heyra hvað ung börn tala góða og fumlausa spænsku.  Það kom mér ekki að gagni.  Ég kann ekki spænsku.

  Vandræðalaust fann ég strætó sem samkvæmt korti átti leið að hlaðvarpa gistiheimilis míns.  Þegar á reyndi stoppaði hann fjarri áfangastað.  Allir farþegar yfirgáfu vagninn möglunarlaust.  Nema ég. Bílstjórinn talaði ekki ensku fremur en aðrir.  Hann brá sér í hlutverk ágæts látbragðsleikara þegar ég kvartaði undan því að vagninn væri ekki kominn á áfangastað.  Um leið ýtti hann lauslega við mér til að koma mér út úr vagninum.  Það gekk treglega framan af.  Svo var eins og skepnan skildi.  Ljóst var að vagninn færi ekki lengra.  Kannski var þetta síðasti vagn leiðarinnar.  Klukkan nálgaðist miðnætti.

  Ég skimaði þegar í stað eftir stóru hóteli.  Þar er yfirleitt hægt að finna leigubíl.  Sem gekk eftir.  Leigubíllinn kostaði 700 ísl. kr.  Ég hefði alveg eins getað tekið leigubíl frá flugstöðinni.  Strætóinn kostaði 540 ísl. kr.    

  Innritunarborð gistiheimilis míns lokar á miðnætti.  Ég rétt slapp inn í tæka tíð. Fyrsta fólkið sem ég hitti á gistiheimilinu var ungt íslenskt par,  Ásthildur og kólumbískur Íslendingur.  Einu Íslendingarnir sem ég hitti á Alicante.  

  Meira á morgun.  

Athugasemdir

[Ásthildur Cesil Þórðardóttir, 7.1.2016 kl. 21:29]

Hahaha er bráðum á förum til La Marína, sem er stutt frá Alikante 

[Sigurður I B Guðmundsson, 7.1.2016 kl. 21:36]

Ef þig vantar túlk í næstu ferð þá tala ég spönsku!!

[Ásthildur Cesil Þórðardóttir, 7.1.2016 kl. 22:44]

[Erla Magna Alexandersdóttir, 8.1.2016 kl. 18:53]

eNDILEGA FARÐU UPP Í vIRKIÐ FYRIR OFAN aLICANTE- ÞÚ SERÐ HÁLFANN sPÁN - st. bARBARA

 kV.GÓÐA FERÐ.

[Ásthildur Cesil Þórðardóttir, 8.1.2016 kl. 20:10]

Góð ábending Erla mín, geri það svo sannarlega og hef myndavélina með 

[Jens Guð, 9.1.2016 kl. 13:31]

Ásthildur Cesil,  góða ferð.  Það er gott að komast í sólina.  

[Jens Guð, 9.1.2016 kl. 13:31]

Sigurðpur I B,  þú hefðir mátt upplýsa mig um þetta fyrr.

[Ásthildur Cesil Þórðardóttir, 9.1.2016 kl. 14:31]

Já einmitt.  Ég er orðin svolítið þung í andanum.