Hvað næst?

 

 

 

 

 

 

  Níu voru í framboði til forseta Íslands á dögunum.  Svo hlálega tókst til að átta þeirra náðu ekki þeim árangri sem þurfti til.  Einungis einn,  Guðni Th. Jóhannesson,  sagnfræðingur úr Garðabæ,  náði þeim fjölda greiddra atkvæða sem dugði.  Margir telja líklegt að hann sætti sig við úrslitin.  Það er ekki vont hlutskipti fyrir sex manna fjölskyldu að setjast að í rúmgóðu einbýlishúsi í Garðabæ,  sér að kostnaðarlausu.  

  Hvað með hina frambjóðendur?  Hvað verður um þá?  

  Næsta víst er að stjórnmálaflokkar munu togast á um Höllu Tómasdóttur og Andra Snæ Magnason.  Þau heilluðu landsmenn með glaðlegri framkomu,  kurteisi og ljúfmennsku. Buðu af sér mjög góðan þokka.  Nálægt þriðjungur kjósenda greiddi Höllu atkvæði sitt og Andri fékk 14,3%. Þar af 23,8% í Reykjavíkurkjördæmi norður.  Annað þeirra tveggja hefði orðið forseti ef Guðni hefði ekki þvælst fyrir þeim.

  Í Suðurkjördæmi fékk Sturla Jónsson 5,1%.  Það fylgi fleytir honum léttilega inn á Alþingi í komandi kosningum.  Þar á hann heima.  Jafnvel betur en á Bessastöðum.

  Þessi þrjú,  Halla, Andri Snær og Sturla,  verða alþingismenn í haust.  

  1280 manns greiddu Elísabetu Kristínu Jökulsdóttur atkvæði.  Hún heillaði mun fleiri.  Eiginlega alla.  Lífgaði verulega mikið upp á kosningabaráttuna.  Frábær manneskja - en er ekki beinlínis klæðskerasniðin í embætti forseta Íslands.  Það er að segja í ímynd fólks af forseta.

  Frambjóðendur drottins allsherjar,  Hildur og Guðrún,  slógu Íslandsmet.  Aldrei áður hafa frambjóðendur fengið jafn fá atkvæði í forsetakosningum.  Hvergi í heiminum.  Í tilfelli Hildar kemur það ekki að sök.  Hún býður sig aftur fram í næsta lífi.  Ef það gengur ekki þá í þar næsta lífi.  200 ár,  400 ár. Skiptir ekki máli.  Hennar tími mun koma í Jesú nafni.  Eða ekki.  Spurning hvort að drottinn sendir Guðrúnu í fleiri fýluferðir af þessu tagi upp á grín.  

  

   

   

Guðni stefnir á sigur í Nice

Athugasemdir

[Elín Sigurðardóttir (IP-tala skráð) 28.6.2016 kl. 14:13]

Ef Elísabet heillaði marga þá heillaði Davíð mun fleiri.  Það er leiðinlegur eineltisbragur á þessari færslu.  

[Ásthildur Cesil Þórðardóttir, 28.6.2016 kl. 14:32]

Davíð heillaði einungis sitt fólk, sem elskar hann nó matter what, þannig að það er eitthvað sem er bara eðlilegt miðað við hópinn hans, svokallaða náhirð. 

Sammála Jens um Höllu, Anra og Sturlu, Elísabet er einstök og flott kona.  

Mér finnst svo frekar leiðinlegt að gera grín að Guðrúnu og Hildi, mér fannst Hildur koma sérstaklega ljufmannlega fram og heillaði allavega börnin upp úr skónum, þó fólki findist hún ekki endilega efni í forseta, þá var hún einlæg og með góða framkomu.  Svo finnst mér að ráðamenn ættu að fá Ástþóri það verkefni að setja á stofn friðarstofnun hér á landi, eins og hann langar svo mikið til.  Þá hættir hann ef til vill að reyna að verða forseti, og ég er viss um að hann myndi gera þetta vel.

Verð að segja Davíð það til hróss að hann þorði að fara í slaginn, og þegar ósigurinn blasti við tók hann því einstaklega ljúfmannlega.  Það hefur örugglega ekki verið auðveld ákvörðun að láta slag standa.  

[Elín Sigurðardóttir (IP-tala skráð) 28.6.2016 kl. 14:49]

Það mun ekkert breytast hérna á meðan fólk talar svona.  Davíð verður að fá sitt kredit eins og Elísabet.  Annað er bara ofbeldi klætt í vemmilegan búning.  

[Ásthildur Cesil Þórðardóttir, 28.6.2016 kl. 17:29]

Það breytist ekki neitt á meðan fólk er gjörsamlega heilaþvegið gagnvart fólki sem hefur sýnt að það er ekki þess virði.  Það er nú það sorglega við það.  En sem betur fer er unga fólkið okkar ekki svona fullt aðdáunar á heilögum kúm, og þess vegna fer þeim fækkandi sem hugsa svona. 

[Jens Guð, 28.6.2016 kl. 17:42]

  Elín (#1),  þessi bloggfærsla er fyrst og síðast skrifuð í léttum dúr.  Hún snýst um þá spá mína að árangur Höllu,  Andra Snæs og Sturlu í kapphlaupinu til Bessastaða muni leiða til spurnar eftir þeim á Alþingi.  Stjórnmálaflokkar fari þegar í stað togast á um þau.  Ætla má að viðskiptavild þeirra sé metin þannig að þau fái freistandi tilboð sem erfitt verði að hafna.  

  Vegna þessa inntaks pistilsins er fyrirsögnin "Hvað næst?";  með öðrum orðum:  Hvað tekur nú við hjá þeim?  

  Ég treysti mér ekki til að ráða í framhaldið hjá Elísabetu.  Ég þekki ekki nógu vel til hennar.  Ég veit að hún er rithöfundur,  ljóðskáld og gjörningalistamaður.  Skemmtilegt ólíkindatól sem erfitt er fyrir ókunnuga að ráða í.  Mér þótti rétt að vekja athygli á því að hún heillaði fjöldann langt umfram þá 1280 sem kusu hana.  Ég færði rök fyrir því hvers vegna atkvæðin voru ekki fleiri.

  Það hefur alltaf legið fyrir og verið margsvarað af DOddssyni og Ástþóri að framboðsbröltið breyti engu um þeirra daglegu störf.  Það var aðeins tímabundið stutt hliðarspor og frí frá vinnunni.  Það þarf engar vangaveltur um það né spá.  Fyrirsögnin "Hvað næst?" á ekki við um þá og þeirra föstu rótgrónu vinnu.  Þar er engin breyting á neinu og ólíklegt að nokkur haldi annað.         

[Ásthildur Cesil Þórðardóttir, 28.6.2016 kl. 17:54]

Góður. 

[Jens Guð, 28.6.2016 kl. 17:58]

  Ásthildur Cesil,  ég viðurkenni að það er svolítið eins og að sparka í liggjandi mann að grínast með atkvæðaleysi Hildar og Guðrúnar.  Þær koma fyrir sem góðviljaðar og einlægar.  Ég reyndi að hafa grínið frekar góðlátlegt en kvikindislegt um framboðsraunir þeirra.  Þó verður að segjast eins og er að ofmat þeirra á möguleikum í forsetaframboði sýnir eitthvað mjög langt frá raunsæi.    

[Ásthildur Cesil Þórðardóttir, 28.6.2016 kl. 18:04]

Sammála því Jens minn.  En í mínum huga eru þær samt hvunndagshetjur fyrir að bakka ekki og halda sínum leik áfram, þó þær hafi auðvitað gert sér grein fyrir því að þetta var vonlaust.  Mér finnst mikilvægt að fólk standi með sjálfum sér og aðdáunarvert.  

[Már Elíson, 29.6.2016 kl. 16:23]

Fínn pistill og saklaus, Jens. - Það er ákveðinn svekkelsinsbragur á færslum Elínar og einnig áttaði hún sig ekki á háðinu hjá meistara Jens.

[Jens Guð, 29.6.2016 kl. 19:39]

Elín (#3),  þessi blinda dýrkun á leiðtogann með tilheyrandi ofurviðkvæmni fyrir allri umfjöllun um hann eða ekki umfjöllun um hann er blessunarlega á hröðu undanhaldi hérlendis.  En sækir þeim mun ákafar í sig veðrið í Tyrklandi og Norður-Kóreu.  

  Stóri fréttapunkturinn um framboðsbrölt DOddssonar eru niðurlægjandi hrakfarir manns sem þekkti ekki sinn vitjunartíma.  Er gjörsamlega rúinn öllum trúverðugleika og trausti almennings.  Ég sá ekki knýjandi þörf fyrir að fara yfir í þessari bloggfærslu háðuglega útreið hans.  En vegna "komment" þíns verð ég að benda á eftirfarandi staðreyndir:

  Sú var tíð að hann var vinsæll, almennt dáður og naut stuðnings 60% borgarbúa.  Sú var tíð.  Nú er öldin önnur eftir klúður einkavinavæðinga og bankahruns.  Það var hrópandi brenglað sjálfsmat á stöðunni sem leiddi til þess að hann álpaðist í framboð til embættis forseta Íslands.  Geggjuð ranghugmynd manns í fílabeinsturni umkringdur jafn veruleikafirrtum já-mönnum.

  Þó að raunveruleikinn væri allt annar en sjálfsmat DOddssonar og mat klappliðs hans þá náði framboð hans þó hæst 22,2% í skoðanakönnum.  Sem var vitaskuld alltof hátt miðað við hversu gjörsamlega óhæfur hann er.  Enda komu brestir hans og ólæsi á samfélagið alveg gargandi í ljós í fyrstu sjónvarpsútsendingu hans um framboðið.  Það var á "Eyjunni" á Stöð 2.  Ég ætla að spara lýsingarorð um framgöngu kallsins án sómakenndar.,  Svo mildasta orðalag sé notað.

  Undir þessu fyrsta sjónvarpsviðtali slátraði hann framboði sínu.  Fældi frá sér 1 af hverjum 5 sem ætlaði að styðja framboð hans.  Fylgi við framboð hans hrundi á einum klukkutíma úr 22,2% niður yfir 19%.

  Frambjóðandi í tengslum við raunveruleikann hefði lært stóra lexíu af klúðrinu.  Áfram í fílaturni og  umkringdur óhæfum já-mönnum lærði jálkurinn ekki neitt.  Hann hagaði sér áfram eins og illa uppalinn götustrákur án sómakenndar.  Mér liggur við að saka hann um skítlegt eðli.  Geri það hinsvegar ekki.  Niðurlæging hans er nóg fyrir því.

  Í hvert sinn sem hann urraði og tók geðvonskukast í sjónvarpi eða útvarpi hrakti hann frá sér atkvæði.  Kallinn sem á sínum tíma naut stuðnings 60% borgarbúa og náði hæst 22,2% stuðnings í kapphlaupinu til Bessastaða endaði í 13,-eitthvað prósentum.  Honum var hent í ruslið. Hent í klósettið og sturtað niður.          

[Jens Guð, 29.6.2016 kl. 19:46]

Þetta er dálítið harkaleg lýsing en svona er þetta.

[Jens Guð, 29.6.2016 kl. 19:51]

Ásthildur Cesil (#4),  þetta er alveg rétt hjá þér.  

[Már Elíson, 29.6.2016 kl. 21:46]

Nú fékkstu 10, Jens - Segir ákkúrat frá hjartanu það sem þér finnst (og þorri þjóðarinnar) og dregur ekkert af...og það á þínu eigin bloggi. - Svona eiga sýslumenn að vera !!

Frábært !

[Jens Guð, 30.6.2016 kl. 03:31]

Már,  bestu þakkir fyrir þín "komment".

[Ásthildur Cesil Þórðardóttir, 30.6.2016 kl. 22:42]

Segi það sana ig Nár þetta var snöfurmannlega sagt og satt og rétt. 

[Jens Guð, 1.7.2016 kl. 07:19]

Ásthildur Cesil,  takk fyrir það.

[Ásthildur Cesil Þórðardóttir, 1.7.2016 kl. 08:33]

Már átti þetta að vera  Þetta takka tilhlaup kemur víst fyrir.