Bílalúgunnar á BSÍ er sárt saknað

  Allir - eða næstum því allir - sem hafa verið á næturdjamminu á höfuðborgarsvæðinu kannast við bílalúguna á BSÍ.  Þar mynduðust langar raðir af leigubílum með blindfulla en svanga farþega.  Þeir urðu allra manna hamingjusamastir í kjölfar kaupa á köldum sviðakjamma.  Á hátíðisdögum var splæst í kalda kótelettu.  Þá var stæll á liðinu.  Það var ævintýraljómi yfir bílalúgunni.  

  Eitt sinn að kvöldi var ég staddur inni í veitingasal BSÍ.  Þá bar að ungt par.  Sennilega um 17 - 18 ára.  Það var auðsjáanlega ekki daglegir kúnnar.  Gekk hægt um og skoðaði alla hluti hátt og lágt.  Að lokum kom stelpan auga á stóran matseðil upp við loft.  Hún kallaði til stráksins:  "Eigum við að fá okkur hamborgara?"

  Strákurinn svaraði:  "Við skulum frekar fá okkur hamborgara í bílalúgunni hérna rétt hjá."

  "Viltu frekar borða úti í bíl?" spurði stelpan undrandi.  

  "Já, borgararnir í lúgunni eru miklu betri," útskýrði stráksi.

  Stelpan benti honum á að þetta væru sömu hamborgararnir.  Hann hélt nú ekki.  Sagði að lúgan væri allt önnur sjoppa og á allt öðrum stað í húsinu.  Hvorugt gaf sig uns drengurinn gengur út.  Sennilega til að sjá betur staðsetningu lúgunnar.  Eftir skamma stund kemur hann aftur inn og kallar til afgreiðsludömu:  "Eru nokkuð seldir sömu hamborgarar hér og í bílalúgunni?"

  Hún upplýsti:  "Þetta er sama eldhúsið og sömu hamborgararnir."

  Strákurinn varð afar undrandi en skömmustulegur og tautaði:  "Skrýtið,  mér hefur alltaf þótt borgararnir í lúgunni vera miklu meira djúsí." 

    

Bílalúgunni á BSÍ lokað

Athugasemdir

[Tobbi (IP-tala skráð) 3.4.2017 kl. 20:02]

Já, þetta er skandall. Hvert kennileitið af öðru úr æsku minni hverfur. Sennilega verður heldur ekki hægt að fá kótilettur framar. Þeir eru amk búnir, helvítis beinin, að taka kartöblumúsina úr pakkanum.

Hvað verður svo næst?

[Sigurður I B Guðmundsson, 3.4.2017 kl. 20:09]

Já, tímarnir breytast og mennirnir með.

[Guðmundur Ásgeirsson, 3.4.2017 kl. 21:04]

Ef fram heldur sem horfir mun íslensk réttritun líka heyra sögunni til áður en langt um líður.

[Eyjólfur Jónsson, 3.4.2017 kl. 22:41]

Lestarstjórinn mikli er arústa OKKAR umhverfi og setur inn SITT umhverfisem er lokað ahlemm akolakraninn farinn lestin farin frá hafnarbakkanum Sjálfstæðishúsið farið Langibarinn farinn Lækjatorg fatið Kallinn á kassanum horfinn allar gókabúðir allar ísjoppurnar farnar Nýja Bíó farið Gamla bíó farið Hreifill farinn Steindór farinn hallærisplanið fariðlögreglan farin pósthúsið farið Ingólfsapótek farið Geisir farinn Eimskip farið Ríkisskip farið Magni farinnSál miðbæjarins farin!! Allt farið.

[Jens Guð, 5.4.2017 kl. 09:37]

Tobbi,  það sér hvergi fyrir enda á þessum ósköpum.

[Jens Guð, 5.4.2017 kl. 09:38]

Sigurður I B,  heldur betur!

[Jens Guð, 5.4.2017 kl. 09:42]

Guðmundur,  hún heyrir nánast þegar sögunni til.  Í grunnskólum tala heilu bekkirnir einungis ensku - þrátt fyrir að öll börnin séu rammíslensk.  

[Jens Guð, 5.4.2017 kl. 09:43]

Eyjólfur,  þetta er rosalegt.