Bensínsvindlið

  Margir kaupa eldsneyti á bílinn sinn hjá Kaupfélagi Garðahrepps - heildverslun.  Bensínlítrinn þar er að minnsta kosti 11 kr. lægri en á næst ódýrustu bensínstöðvum.  Dælt á tóman 35 lítra tank er sparnaðurinn 385 kr.  Munar um minna.  Annað hefur vakið athygli margra:  Bensínið er ekki einungis ódýrast heldur miklu kröftugra og endingarbetra.  

  Fjöldinn hefur upplýst og skipst á reynslusögum á Fésbók, tísti og víðar.  Gamlar kraftlitlar druslur breytast í tryllitæki sem reykspóla af minnsta tilefni.  Rólegheitabílstjórar sem voru vanir að dóla á 80 kílómetra hraða á þjóðvegum eiga nú í basli með að halda hraðanum undir 100 km.  

  Einn sem átti erindi úr Reykjavík til Sauðárkróks var vanur að komast á einum tanki norður.  Það smellpassaði svo snyrtilega að hann renndi ætíð á síðasta lítranum upp að bensíndælu Ábæjar.  Þar keypti hann pylsu af Gunnari Braga.  Nú brá svo við að með bensín frá KG á tanknum var nóg eftir þegar hann nálgaðist Varmahlíð.  Hann beygði því til hægri og linnti ekki látum fyrr en við Glerártorg á Akureyri.  Samt gutlaði enn í tanknum.

  Hvernig má þetta vera?  KG kaupir bensínið frá Skeljungi.  

  Skýringin liggur í því að Skeljungur (eins og Neinn og Olís) þynnir sitt bensín með etanóli á stöðvunum.  Þetta er gert í kyrrþey.  Þetta er leyndarmál.  Hitt er annað mál að Costco blandar saman við sitt bensín efni frá Lubisol.  Þsð hreinsar og smyr vélina.     

 

     

   

Athugasemdir

[Sindri Karl Sigurðsson, 18.6.2017 kl. 16:00]

Metanól er það víst, ég hélt reyndar að þetta væri ekki blandað á staðnum. Veit sossum ekkert meir um það en það er morgunljóst að metanól er miklu orkusnauðara en bensín og þ.a.l. sýpur stúturinn meira af slíku sulli en ómenguðu bensíni.

[Heimir Lárusson Fjeldsted, 18.6.2017 kl. 16:23]

Getur einhver staðfest þynninguna?

[Margret (IP-tala skráð) 18.6.2017 kl. 17:28]

Þeir mundu aldrei staðfesta þessa þynnignu hinar benzínsölurnar. Láttu þig dreima Heimir, við búum í landi þöggunar.

[Jens Guð, 18.6.2017 kl. 17:54]

Sindri, samkvæmt mínum heimildum er það etanól.  Ég veit samt ekki muninn.  

[Jens Guð, 18.6.2017 kl. 17:56]

Heimir,  ég staðfesti hana með því að upplýsa þetta hér.  Ef ég fer með rangt mál munu olíufélögin kæra mig.  Þau gera það ekki vegna þess að mínar heimildir eru skotheldar.  

[Jens Guð, 18.6.2017 kl. 17:57]

Margrét,  mikið rétt.  Þetta er leyndarmál sem enginn má vita af.  

[Valdimar Samúelsson, 18.6.2017 kl. 18:05]

Jens gott að þú hreyfðir við þessu máli, ég las það einhvernstaðar að bensín á Íslandi væri blandað ethonol og hafði ætlað mér að fá það staðfest. Reyndar nota ég dísil olíu en KG eða Costco blandar sínum efnum í dísil olíuna sem bætir brunann svo þar líka gera þeir betur. 

Getur verið að ethanólið frá Hellisheiði sé ekki söluvara eftir allt svo þeir verða að þröngva þessu inn á landann án þess að láta okkur vita.?

[Valdimar Samúelsson, 18.6.2017 kl. 18:08]

Þeir virðast hafa blandað 5% frá 2015 samkvæmt FIB https://www.fib.is/is/um-fib/frettir/vinandablandad-bensin-a-islandi-1

[Stefán (IP-tala skráð) 18.6.2017 kl. 19:38]

Ég tel alveg víst að sá ágæti maður, Runólfur Ólafsson framkvæmdastjóri FÍB ( [e-mail] ) geti upplýst fólk nákvæmlega um eldsneytisblandanir olíufélaganna og reyndar vísar Valdimar hér að ofan til upplýsinga FÍB. Held reyndar að þessi blöndunarmál hafi verið opinber lengi.

[Stefán (IP-tala skráð) 18.6.2017 kl. 20:35]

Eftirfarandi var haft eftir Glúmi Jóni Björnssyni(eiginmanni Sigríðar Á. Andersen, núverandi dómsmálaráðherra) efnafræðingi og framkvæmdastjóra efnarannsóknarstofunnar Fjölvers: ,, Spírinn og bensínið eru óskyld efni. Spírinn leysist upp í vatni en bensínið ekki. Það þýðir að blandan verður viðkvæmari fyrir raka og geymist mun verr og skemur en hreint bensín ". Þetta sagði Glúmur Jón á fundi með Bílgreinasambandinu og FÍB skömmu fyrir Jólin 2014.

[Jens Guð, 19.6.2017 kl. 19:56]

Valdimar,  takk fyrir upplýsingarnar.

[Jens Guð, 19.6.2017 kl. 19:59]

Stefán,  blöndunardæmið hefur verið opinbert en samt farið hljótt.  Það hefur aldrei orðið umræða um það.  Almenningur kemur af fjöllum (m.a. Hólabyrðu) núna þegar vakin er athygli á þessu.