Ástæðan fyrir skökku brosi

  Stundum er haft á orði að hinn eða þessi hafi brosað út í annað (munnvikið).  Eða glott út í annað.  Leikarinn Bessi heitinn Bjarnason kunni þá list að brosa (og hlæja) með annarri hlið andlitsins en vera grafalvarlegur á hinni hliðinni.  Þá fór það eftir því hvoru megin fólk stóð við hann hvernig það meðtók orð hans;  hvort hann væri að grínast eða tala í alvöru.    

  Ýmsir tónlistarmenn eru þekktir af því að brosa út í annað.  Til að mynda Bítillinn George heitinn Harrison,  Sid heitinn Vicious og Billy Idol.  

  Fram til þessa var lífseig kenning um að skakkt bros væri afleiðing lítillar fæðingarþyngdar,  svo sem vegna fyrirburafæðingar.

  Nú hefur bandarísk rannsókn kollvarpað þessu og komist að annarri niðurstöðu.  Hún byggir á margra ára skoðun á hátt í 7000 manns.  Í ljós kom að skakkt bros er afleiðing langvarandi streitu og taugaálags fyrstu æviárin.  Einkum eru það fyrstu 3 árin sem móta þannig tannstöðu og vöðvahreyfingar andlitsins að útkoman verður skakkt bros.

  Annað mál er hvað veldur ungum börnum svona mikilli streitu?  Heimilisátök?  Öskur og rifrildi?  Óreglulegir svefn- og matartímar?  Diskómúsík?  

  

Athugasemdir

[Sigurður I B Guðmundsson, 26.6.2017 kl. 17:09]

Eða mamman hafi hallað undir flatt eða fætt á ská!!!

[Theódór Norðkvist, 26.6.2017 kl. 20:16]

Síðan var það Gissur geðilli. Það sprungu á honum varirnar, því það tók sig upp gamalt bros. Fengið að láni hjá Halla og Ladda.

[Hrólfur Þ Hraundal, 27.6.2017 kl. 00:38]

Auðvita á að brosa til hægri, hitt er svo hallærislegt.

Stelpurnar og síðar stúlkurnar og svo fallegu þroskuðu konurnar og blessaður vertu líka gömlu konurnar fengu kitlur umsig allar ef maður brosti til hægri.  

En til vinstri það er bara ekki hægt að brosa svoleiðis Nobbara brosi.   

[Jens Guð, 27.6.2017 kl. 17:28]

Sigurður I B, þetta þarf að rannsaka betur!

[Jens Guð, 27.6.2017 kl. 17:29]

Theódór,  þegar ég las þessa tilvitnun í Gissur geðilla þá lenti ég í þessu sama!

[Jens Guð, 27.6.2017 kl. 17:31]

Hrólfur,  þú talar af reynslu og þekkingu!

[Halldór Egill Guðnason, 27.6.2017 kl. 20:05]

Ungum börnum er yfirleitt aðeins sagður hálfur sannleikurinn. Mjög oft aðeins hálfur brandari, meira að segja, sem að sjálfsögðu er ekki hægt að brosa að, nema til hálfs.

Orsök skakka brossins hlýtur því að vera húmörslausir foreldrar.

 Góðar stundir, með kveðju að sunnan.

[Jens Guð, 28.6.2017 kl. 05:23]

Halldór Egill,  þar komst þú með það!