Með 639 nagla í maganum

  Mataræði fólks er allavega.  Sumir eru matvandir.  Setja sér strangar reglur um það hvað má láta inn fyrir varirnar.  Sneiða hjá kjöti.  Sneiða hjá öllum dýraafurðum.  Sumir snæða einungis hráfæði sem hefur ekki verið hitað yfir 40 gráðum.  Sumir sneiða hjá sykri og hveiti.  Aðrir lifa á sætindum og deyja.  Enn aðrir borða allt sem á borð er borið.  Jafnvel skordýr.

  Fáir borða nagla.  Hvorki stálnagla né járngaura.  Nema 48 ára Indverji.  Honum var illt í maganum og fór til læknis.  Við gegnumlýsingu sást fjöldi nagla í maga og þörmum.  Er hann var skorinn upp með hraði reyndust naglarnir vera 639.  Flestir 5 - 6 cm langir.  

  Maðurinn hafði verið blóðlítill.  Hann kannaðist ráðið um að taka inn járn við því.  Naglar virtust hentugri en annað járn.  Það var auðvelt að kyngja þeim með vatni.  Til tilbreytingar át hann dálítið af járnauðugri mold af og til.  

  Þetta virtist virka vel.  Þangað til að honum varð illt í mallakútnum.

  Eigandi litlu byggingarvöruverslunarinnar í hverfinu óttast að kallinn hætti að kaupa nagla af sér.  Það var einmitt hann sem fræddi kauða um nauðsyn þess að taka inn járn við blóðleysi.

.

Athugasemdir

[Stefán (IP-tala skráð) 4.11.2017 kl. 18:11]

Algjör nagli þessi gaur !

[Ásgrímur Hartmannsson, 4.11.2017 kl. 21:14]

Þegar maður segir "járnríkt matarræði" við vitleysinga, þá má búast við svona löguðu.

[Anna Sigríður Guðmundsdóttir (IP-tala skráð) 4.11.2017 kl. 21:27]

Jens minn. Líkkistunaglar heilbrigðis stofnana svikakerfis illra afla!

Guði sé lof að einhverjum datt í hug að skera blessaðan manninn upp við þessu of-framboði af alls konar málmtegundum. Eða hvað?

Á Íslandi hefði yfirvaldalækna-vísindayfirmafían einungis sent látinn manninn í endurvinnslu, til að fá uppí yfirlækna/yfirheilbrigðis-kerfisins svikula sjúkdómagreiningakerfið og "heiðarlega" yfirlæknamafíuheilbrigðis-lyfja-þjónustuna. Eða þannig!

Út úr þeirri endurvinnslu bankastjórna/skurðgoðasvikamafíunnar hefðu (sem betur fer fyrir þá mafíu), komið fleiri naglar, heldur en þarf í meðalmanns eðlilega samanklambraða líkkistu svikakerfisins!

Ísland, best í heimi sagði einn "glæpamafíu-endurreistur" læknaróninn á Íslandi, sem fékk stöðuhækkun í framhaldi af læknaglæpum sínum? Og stýrði meðvitað eða ómeðvitað einni mestu greiningasvika meðferðarstofnun Íslands í c.a. 30 ár?

Afleiðingarnar eru samfélagslegt alls kyns illkynjuð krabbamein. Afleiðingarnar eru skelfilegar fyrir allt Íslands samfélagið. Að kalla svona svik heilbrigðiskerfisins á Íslandi heilbrigðisþjónustu eiðsvarinna siðmenntaðra lækna, er auðvitað óverjandi glæpur gegn mannkyni.

Svik gegn innlendum jafnt sem erlendum sjúklingum!

Þeir skilja þetta sem ég er að segja, sem hafa lent í svikahakkavél yfirlæknamafíunnar óverjandi stjórnsýslu á Íslandi.

Aðrir hneykslast kannski yfir því sem hér er skrifað af mér, og dýrka og dást að "yfirlækna-stórmennanna" ofurkrafti illra leiðandi yfirmafíuafla, fram af blekkingabrúninni yfir-lygalækna-mafíunnar fantabrögðum.

Slíkum heimsveldisbankamafíu stýrðum yfirlæknum er ekki hægt að hjálpa, með sama blindandi áframhaldinu.

Alla vega ekki hérna megin móðunnar miklu.

M.b.kv.

[Jens Guð, 5.11.2017 kl. 13:54]

Stefán,  sannarlega!

[Jens Guð, 5.11.2017 kl. 13:55]

Ásgrímur,  já, það er svo auðvelt að misskilja þetta!

[Jens Guð, 5.11.2017 kl. 13:57]

Anna Sigríður,  þú kannt að orða hlutina!

[Jóhann Kristinsson, 5.11.2017 kl. 23:48]

Ég las um góða naglasúpu þegar ég var smá gutti. Sem auðvitað við heyrðum aftur og aftur “hafa skal það sem hendi er næst og fást ekki um það sem ekki fæst.”

Aumingja Indverjinn, hafði ekkert nema nagla. Svo fór sem fór.

Kveðja frá Houston

[Jens Guð, 7.11.2017 kl. 06:26]

Jóhann,  ég man eftir sögunni um naglasúpuna góðu.