Íslandsvinur hannar neyðarhjálpardróna

  Á fyrri hluta aldarinnar var breski olympíuskylmingameistarinn og rokksöngvarinn Bruce Dickinson með annan fótinn á Íslandi.  Hann var flugmaður hjá Iceland Express og söng - og syngur enn - með þungarokkshljómsveitinni Iron Maiden.

  Heimsathygli vakti um árið þegar Iron Maiden var aðalnúmer á Hróarskeldurokkhátíðinni í Danmörku.  Aðdáendur Iron Maiden frá Ameríku og víðar tóku framhaldsflug frá Keflavík.  Andlitið datt af þeim við flugtak þegar flugmaðurinn kynnti sig í hátalarakerfi:  Bruce Dickinson.   

  Brúsi er um margt ólíkur rokkstjörnuímyndinni.  Hann hefur aldrei notað vímuefni.  Þess í stað lærði hann sagnfræði; hefur skrifað sagnfræðibækur.  Söngtextar hans bera merki áhuga hans á sögunni.  A sviði er hann engu að síður rokkstjarnan sem gefur allt í botn.  Hann segist vera rosalega ofvirkur.  Sú er ástæðan fyrir því að hann sniðgengur vímuefni - vitandi að annað hvort er í ökkla eða eyra.  Aldrei neitt þar á milli.

  Að undanförnu hefur Brúsi unnið að hönnun neyðarhjálpardróna;  flygildis sem getur borið hjálpargögn til fólks á hamfarasvæðum þar sem öðrum leiðum verður illa við komið.  Uppskrift hans gengur út á að koma hjálpargögnum til 50 manns á einu bretti.  Þar á meðal vatni, mat og sjúkravörum.  

  Útgangspunkturinn og sérstaða í hönnun Brúsa er að flygildið sé kolefnafrítt.  Jafnframt svo ódýrt í innkaupum og ódýrt í rekstri að hjálparsveitum muni ekki um að bæta því í búnað sinn.  

  Brúsi er 60 ára og hefur selt yfir 100 milljónir platna. 

   

Athugasemdir

[Stefán (IP-tala skráð) 25.1.2018 kl. 19:44]

Bruce Dickinson er séní á svo mörgum sviðum. Minnir mig svolítið á David Bowie að því leiti. Einhverntíma las ég að Bruce hafi reynt að vera ekki mjög gáfulegur í viðtölum á fyrstu árum Iron Maiden. Kanski vegna þess að það var svo rosalega villt líferni hjá flytjendum þeirrar frábæru tónlistar sem þungarokkið er. Hins vegar eru textar hans gáfulegri en flestir aðrir textar þungarokksins og sagnfræði kunnáttan leynir sér ekki. Og já, aldeilis frábær söngvari líka hann Bruce Dickinson.

[Jens Guð, 29.1.2018 kl. 00:09]

Stefán,  ég man ekki eftir gömlum viðtölum við Brúsa en í síðari tíma viðtölum þá leynir sér ekki að hann er bráðgáfaður og fjölfróður.