Kántrý-skotnir vísnasöngvar

 Ljóðin í sálinni er fjórða plata Góla - Guðmundar Óla Scheving.  Hún inniheldur 21 lag.  Spilunartíminn er klukkustund.  Það er þriðjungi lengri spilunartími en venja er.  Öll lögin eru frumsamin.  Á fyrri plötum hafa textar verið eftir Góla í bland við eftir helstu ljóðskáld síðustu aldar, svo sem Stein Steinarr, Örn Arnarson og fleiri, ásamt snjöllum hagyrðingum þessarar aldar á borð við hinn margverðlaunaða Guðmund djákna Brynjólfsson.  Að þessu sinni eru öll kvæðin eftir Davíð Stefánsson frá Fagraskógi.  Þau eru bragðsterkir og fjölbreyttir konfektmolar.  Samúð liggur með vinnandi stéttum og málleysingjum.  Hæðst er að borgarastéttinni.

  Lögin klæða ljóðin prýðisvel.  Gæða þau lífi.  Galsafengin ljóð fá fjörleg lög;  tregafull ljóð fá angurvær lög og svo framvegis.  Öll eru þau grípandi,  söngræn og einföld; flæða lipurlega.  Hægt er að syngja með þeim strax við fyrstu hlustun.  Mörg eru seyðandi fögur.  Sterkust í þeim stíl eru Fasteignasalinn, Léttúðin og Sporin þín.  Mörg önnur gefa þeim lítið eftir.  Þeirra á meðal Auðnin þegir.

  Ljóðin bjóða ekki upp á afgerandi viðlög.  Það er snyrtilega leyst í útsetningum sem jafnframt gefa lögunum sérkenni.  Gott dæmi er skemmtilega einföld en áleitin gítarlína í glaðlega kántrý-laginu Dönsku skónum.  Annað dæmi er lagið Þú.  Það hefst á söng við mildar kassagítarstrokur (strömm), rís síðan upp við fullan hljómsveitarflutning með rafgítar og bakraddasöng. Í kántrý-laginu Einn kemur, þá annar fer er einskonar viðlagsbútur trallaður.

  Ofar er nefnt lagið magnaða Sporin þín.  Framan af einkennir það sérlega skemmtilegur trommuleikur. Er á líður verður orgelspil áberandi.  Útsetningin staðsetur lagið bæði í flokkinn heimspopp (world music) og framsækna jaðarmúsík (alternative).  Aðrir músíkstílar á plötunni falla undir víða skilgreiningu á þjóðlagakenndum vísnasöng (folk music) ásamt kántrý-sveiflu.  Hljóðfæraleikur er sparlegur.  Víða aðeins kassagítar.  

  Góli er ágætur og blæbrigðaríkur söngvari.  Stundum syngur hann lágstemmt og blítt.  Stundum þenur hann sig.  Allt eftir yrkisefni ljóðsins.  Auðheyranlega kann hann kvæðin utanað og túlkar innihald þeirra af innlifun og einlægni.

  Ljóðin í sálinni er góð og eiguleg plata.  Og skemmtileg.  Hljóðheimurinn (sánd) er tær og hreinn.  Þökk sé www.studionorn.is.                       

       

Athugasemdir

[Sigurður I B Guðmundsson, 28.2.2018 kl. 09:04]

Eins gott að i ið í nafninu gleymist ekki!!!

[Guðmundur Óli Scheving (IP-tala skráð) 28.2.2018 kl. 21:54]

Sæll Jens.

Það eru notuð venjuleg hljóðfæri trommur,basagítar,Banjó,Rafmagnsgítar,Kassagítar otgel...eru  svona helstu hljóðfærin á diskunum.

Gísli Kjaran Kristjánsson upptökustjóri Studíó Nornar er lærður trommuleikari og frábær tónlistarmaður, ég vildi hafa þetta svona ekta.

Takk fyrir þessa umfjöllun.

Já það er eins gott að gleyma ekki i inu í nafninu, eins og I og B í Sigurður I B Guðmundsson

[Guðmundur Óli Scheving (IP-tala skráð) 1.3.2018 kl. 00:31]

Þetta átti að vera orgel ekki otgel,biðst velvirðingar...

[Stefán (IP-tala skráð) 1.3.2018 kl. 06:18]

Af gefnu tilefni hefði ég haldið að diskurinn fengi nafnið ,, Sllfurskotturnar hafa sungið fyrir mig ", eða ,, Sjö litlar mýs ".

[Jens Guð, 1.3.2018 kl. 09:29]

Sigurður I B,  ég passa upp á það.

[Jens Guð, 1.3.2018 kl. 09:29]

Guðmundur Óli,  takk fyrir leiðréttinguna.

[Jens Guð, 1.3.2018 kl. 09:30]

Stefán,  eru þeir titlar ekki þegar í notkun?

[Þórður (IP-tala skráð) 1.3.2018 kl. 12:32]

Ég hef heyrt fín lög af þessum plötum í útvarpinu.

[Jens Guð, 1.3.2018 kl. 16:43]

Þórður,  það er nóg til af þeim á þessum plötum.