Íslenska leiðin

  Maður sem við köllum A var fyrirtækjaráðgjafi Glitnis.  Hann gaf fátækum vinum olíufyrirtækið Skeljung.  Þetta var sakleysisleg sumargjöf.  Hún olli þó því að A var rekinn með skömm frá Glitni.  Eðlilega var hann þá ráðinn forstjóri Skeljungs.  Um leið réði hann þar til starfa nokkra vini úr bankanum.  Þeirra í stað rak hann nokkra reynslubolta.  Hinsvegar er hjásvæfa hans ennþá í vinnu hjá Skeljungi.  Það er önnur saga og rómantískari.

  Skeljungur keypti Shell í Færeyjum.  Nokkru síðar var starfsmaður færeyska Shell ráðinn forstjóri Skeljungs.  Síðan er fyrirtækinu stýrt frá Færeyjum.  Þetta þótti einkennilegt.  Hefðin var sú að framkvæmdastjóri tæki við forstjórastóli. 

  Fyrsta verk færeyska forstjórans var að kaupa hlutabréf í Skeljungi á undirverði og selja daginn eftir á yfirverði.  Lífeyrissjóðir toguðust á um að kaupa á yfirverðinu.  Kauði fékk í vasann á einum degi 80 milljónir eða eitthvað.  Þetta er ólíkt Færeyingum sem öllu jafna eru ekki að eltast við peninga. 

  Persóna A var óvænt orðin meðeigandi Skeljungs.  Hann (kk) og vinirnir seldu sinn hlut í Skeljungi á 830 milljónir á kjaft. 

  Þetta er einfalda útgáfan á því hvernig menn verða auðmenn á Íslandi.

 

 

Athugasemdir

[Sigþór Hrafnsson (IP-tala skráð) 8.6.2018 kl. 03:04]

Hehehe, íslenskt Dallas eða kannski Gjæfa og gjörfuleiki?

[Stefán (IP-tala skráð) 9.6.2018 kl. 11:41]

Það hefur greinilega fylgt þessu félagi Skeljungur/Orkan alveg ótrúleg spilling, hörð innanhússátök og valdagræðgi svo langt sem augað eygir og lítil lát þar á að því er virðist. Inn í Skeljungi/Orkunni er enn starfandi fólk sem kom með fyrrum forstjóra úr Glitni og núverandi yfirmenn sem voru yfirmenn og nánir samstarfsmenn forstjórans fyrrverandi í hans stjórnartíð. Slíkt er ekki alls trausvekjandi, þar sem sá fyrrverandi forstjóri er nú með stöðu sakbornings í ,, Skeljungsfléttunni ". Þar sem ég bý erlendis þættu sum óþverra mál tengd þessu félagi stór og hneykslanleg. Þessi svokallaða ,, Skeljungsflétta " sem íslenskir fjölmiðlar hafa verið að fjalla svo mikið um að undanförnu, nær mjög víða inn í íslenskt atvinnulíf og mörg stórfyrirtæki, s.s. inn í tryggingafélögin VÍS og TM. Það er í raun stóralvarlegt að stór tryggingafélög skuli vera fjármögnuð með fé úr þessari hrikalegu peningafléttu og vera svo jafnvel stjórnað af höfuðpaurum peningafléttunnar. Peningagróði þessarar peningafléttu virðist liggja svo víða, gæti t.d. legið í fyrirtækjum eins og Póstmiðstöðin, Kaffihús Vesturbæjar, Kex Hostel, Ferninand ehf, Arnarlax, Fiskisund, Kvika banki, svo einhver örfá séu nefnd sem svo sem hafa þegar verið nefnd í fjölmiðlum að undanförnu. Þá er einnig grafalvarlegt að sjá aftur í tímann að háttsettur og valdamikill stjórnmálamaður hafi skipað einn fimmmenninga peningafléttunnar sem stjórnaformann Fjármálaeftirlits landsins. Sú manneskja varð svo uppvís að ósannsögli og hröklaðist þaðan út, en heima hjá einum öðrum þeirra fimmmenninga sem nú hafa stöðu sakborninga í máli þessu var þá samkvæmt Þjóðskrá skráð ,, framboðs / stuðningsmannafélag " viðkomandi háttsetts stjórnmálamanns.

[Sigurður I B Guðmundsson, 9.6.2018 kl. 12:24]

Maður er orðinn svo dofinn fyrir svona fréttum að maður kippir sig ekki neitt upp við svona lagað!!!

[Jens Guð, 10.6.2018 kl. 18:23]

Sigþór,  rétt hjá þér.  Þetta er sápuópera.

[Jens Guð, 10.6.2018 kl. 18:27]

Stefán,  ég sá að fríblaðið Mannlíf er með úttekt á þessu nú um helgina.  Ítarleg og góð grein.

[Jens Guð, 10.6.2018 kl. 18:28]

Sigurður,  svo sannarlega rétt að svona er orðið svo algengt á Íslandi að maður hættir að kippa sér upp við það;  verður samdauna og jafnvel meðvirkur.