Ljúf plata

Titill:  Þúsund ár

Flytjandi:  Guðmundur R

Einkunn: ****

  Guðmundur R. Gíslason varð fyrst þekktur sem söngvari hljómsveitarinnar Sú Ellen frá Norðfirði.  "Þúsund ár" er ný sólóplata með honum.  Hún inniheldur tíu frumsamin lög 0g texta.  Lögin eru öll hin snotrustu og notalega söngræn.  Textarnir eru alþýðlegir og ljóðrænir.  Það er að segja ortir á venjulegu alþýðumáli án rembings; án stuðla og höfuðstafa en iðulega með endarím.  Yrkisefnið er samskipti fólks og smá pólitík.  Í rokkaðasta laginu,  "Best í heimi",  er deilt á íslensku spillinguna.  Fyrir minn smekk er það skemmtilegasta lag plötunnar ásamt lokalaginu,  "1974".  Þar segir frá snjóflóðinu sem féll á Neskaupstað umrætt ár.

  Guðmundur er góður,  blæbbrigðaríkur og lipur söngvari með breitt raddsvið.  Sveiflar sér léttilega á milli söngstíla.  Bregður jafnvel fyrir sig snyrtilegri falsettu til spari.  

  Allflest lögin eru á millihraða.  Heildar yfirbragð plötunnar er milt.  Áferðin er mjúk.  Allur flutningur er snyrtilegur, fágaður og að mestu án eiginlegra klisjusólókafla.  Það er kostur.      

    

  

Athugasemdir

[Sigurður I B Guðmundsson, 21.6.2018 kl. 14:24]

Er hægt að fá sýnishorn???

[Jens Guð, 21.6.2018 kl. 14:35]

Sigurður I B,  takk fyrir ábendinguna.

[Stefán (IP-tala skráð) 21.6.2018 kl. 21:49]

Þessi trommari hefur auðheyrilega einu sinni eða tvisvar hlustað á meistara Keith Moon og lært af honum.

[Jens Guð, 21.6.2018 kl. 23:09]

Stefán,  hann heitir Jón Knútur Ásmundsson.  Þegar ég "gúgla" hann kemur í ljós að hann er þungarokkari og er líka í pönksveit Davíðs Þórs Jónssonar,  Austurvígstöðvarnar.