Smásaga um glaðvakandi mann

  Jónsi er í kvöldheimsókn hjá Binna vini sínum.  Þeir hafa ekki hist síðan þeir voru saman í skóla.  Það eru meira en tvær vikur síðan.  Þeir hafa því frá mörgu að segja og draga hvergi undan.  Mikið er hlegið og tíminn er fljótur að líða.  Fyrr en varir slær stofuklukkan tíu.  

  Ella,  kona Binna,  rekur nefið inn um stofugættina.  Hún segir honum að drífa sig í háttinn.  

  "Róleg, kona,"  svarar hann.  "Þú sérð að ég er með gest."

  Það snöggfýkur í Ellu.  Hún hleypur að Binna og sparkar í fótinn á honum.  Hann rekur upp sársaukavein.  Ella forðar sér úr stofunni.

  Skömmu síðar er barið harkalega á dyr.  Ella opnar dyrnar.  Fyrir utan standa tveir lögregluþjónar gráir fyrir járnum.  Annar er tröllvaxinn rumur.  Hinn er nett dama.  Hún spyr valdmannslega:  "Hvar er pésinn sem vill ekki fara að sofa?"

  Ella bendir á Binna.  Löggurnar ganga að honum.  Þær skella honum með látum í gólfið.  Hann berst um á hæl og hnakka.  En er ofurliði borinn.  Löggurnar tæta utan af honum fötin.  Svo mikill er atgangurinn að tölurnar slitna af skyrtunni hans og spýtast í allar áttir.  Jónsi notar tækifærið og læðist óséður úr húsi.  

  Binni róast þegar hann er aðeins á nærbuxunum.  Löggudaman kallar til Ellu:  "Á hann náttföt?"  Hún kannast ekki við það.  En segist geta lánað honum náttkjól.  Löggurnar troða honum í kjólinn.  Troða í bókstaflegri merkingu.  Hann er nefnilega of lítill.  Í honum svipar Binna til lundabagga. 

  Binna er dröslað inn í rúm.  Ella er komin undir sæng.  Rumurinn spyr:  "Eigum við ekki að sekta kvikindið?"  Daman svarar:  "Nei,  ég veiti honum bara skriflega áminningu." 

  Hún dregur upp áminningablokk og fyllir út formið.  Rumurinn spyr:  "En má ég ekki rásskella hann?"  Hún samþykkir það en tekur fram:  "Aðeins eitt högg."

  Hann lætur ekki segja sér það tvisvar.  Hann hendir Binna á magann og slær hann kröftuglega á bossann svo smellur hátt í.  Því næst snýr hann honum á bakið og skorðar þétt við Ellu.  Hann breiðir sængina yfir þau.  Alveg upp að höku.  Hann hvíslar:  "Góða nótt" og kyssir hjúin á ennið.  Svo hverfur hann út í náttmyrkrið ásamt dömunni.     

Athugasemdir

[Magnús Sigurðsson, 8.5.2021 kl. 06:32]

Það er varla að maður þori að spyrja; en er þetta #meetoo saga Jens?

[Sigurður (IP-tala skráð) 8.5.2021 kl. 06:52]

Ég er handviss um að þetta er sönn reynslusaga.

[Stefan (IP-tala skráð) 8.5.2021 kl. 08:42]

Hildur Lillendahl ???  Þetta kalla eg að kasta sprengju inn i Me too byltinguna.

[Sigurður I B Guðmundsson, 8.5.2021 kl. 09:53]

Jæja, alltaf í boltanum!!

[Jósef Smári Ásmundsson (IP-tala skráð) 8.5.2021 kl. 09:57]

Eg held þetta sé U2 saga.

[Jens Guð, 8.5.2021 kl. 10:55]

  Magnús,  ég held það.  Er þó ekki viss.  Ég er lélegur í að skilgreina sögur. 

[Jens Guð, 8.5.2021 kl. 10:56]

Sigurður (# 2),  eða hvort mig dreymdi þetta. 

[Jens Guð, 8.5.2021 kl. 10:56]

Stefán,  Hildur er frábær. 

[Jens Guð, 8.5.2021 kl. 10:57]

Sigurður I B,  meira í tennis.

[Jens Guð, 8.5.2021 kl. 10:58]

Jósef Smári,  þetta er mjög U2-leg saga.  Hefði geta verið samain af Bono.