Dónalega fólkið

  Örlög beggja voru ráðin þegar prúði unglingurinn í Liverpool á Englandi,  Paul McCartney, kynnti sig fyrir bæjarvillingnum,  John Lennon.  Eftir það heimsóttu þeir hvorn annan á hverjum degi.  Ýmist til að syngja og spila saman uppáhaldslög eða semja sína eigin söngva eða hlusta á nýjar rokkplötur. 

  Þegar John gekk til og frá heimili Pauls fór hann framhjá hópi fólks sem stóð úti í garði.  Í hvert einasta skipti í öllum veðrum.  Hann kastaði ætíð á það kveðju.  Fólkið var svo dónalegt að endurgjalda hana aldrei.

  John sagði Paul frá þessu dónalega fólki.  Hann varð forvitinn.  Stormaði með John að fólkinu.  Kom þá í ljós að þetta var garðskreyting sem sýndi fæðingu Jesúbarnsins.  Fólkið var Jósef smiður,  María mey og vitfirringarnir þrír frá Austurlöndum. 

  Misskilningurinn lá í því að John var afar sjóndapur.  Mun sjóndaprari en hann gerði sér sjálfur grein fyrir.  Hann var í afneitun.  Hélt að allir aðrir hefðu samskonar sjón. Hann sá allt í þoku en hafði engan áhuga á gleraugum.  Ekki fyrr en mörgum árum síðar. 

 

Athugasemdir

[Jóhann Elíasson, 7.8.2021 kl. 07:37]

Já, það er stundum betra að hafa augun hjá sér.....

[Jens Guð, 7.8.2021 kl. 08:29]

Jóhann, svo sannarlega!

[Stefan (IP-tala skráð) 7.8.2021 kl. 11:09]

Hversu goð eða slæm gleraugu var John með þegar hann fell fyrir Yoko Ono ?

[Jens Guð, 7.8.2021 kl. 14:14]

Stefán,  John var gleraugnalaus þegar hann kynntist Yoko.  Hann setti ekki upp gleraugu fyrr en ári síðar. 

[Stefán (IP-tala skráð) 7.8.2021 kl. 15:31]

Já, það má því segja að John Lennon hafi ekki alltaf séð hluti og menn í réttu ljósi og svo varð LSD neysla hans eflaust til þess að breyta skynjun, hugsun og tilfinningunum. LSD neysla hefur líka slæm áhrif á sjón, lyktar og bragðskyn, eitthvað sem Covid er líka að gera fólki í dag. 

[Sigurður I B Guðmundsson, 8.8.2021 kl. 11:31]

Jósef kunni líka enga mannasiði enda lét hann Mæju sína sitja á Asna kasólétta og var þó smiður og hefði getað smíðað vagn undir hana!!!

[Stefán (IP-tala skráð) 8.8.2021 kl. 16:16]

Annað hvort var Jósef sjálfur Asni, eða að hann hafi verið farið að gruna að barnið væri ekki hans ? 

[Sigurður I B Guðmundsson, 8.8.2021 kl. 17:49]

Hann var soddan Asni að hann vissi ekki einu sinni að hún væri ólétt enda aldrei gert neitt dodo með henni. Þvílíkur ástmaður. Ég held að Guð hafi valið hann í þetta djobb því karlinn hafi væntanlega verið geldur. 

[Stefán (IP-tala skráð) 8.8.2021 kl. 19:30]

Sennilega hefur Jósef líka verið virkilega sjóndapur eins og John Lennon og gleraugu ekki komin til sögunnar. Geldingar voru vissulega eftirsóttir söngvarar, en það var löngu eftir að Jósef var uppi. Hvernig hamar notuðu smiðir fyrir 2000 árum ?

[Sigurður I B Guðmundsson, 8.8.2021 kl. 23:33]

Lofthamar held ég!!

[Jens Guð, 9.8.2021 kl. 10:02]

Stefán (# 5),  þetta er klárlega rétt hjá þér. 

[Jens Guð, 9.8.2021 kl. 10:03]

Sigurður I B (# 6),  hann var sennilega algjör asni!