Líkamsóvirðing

  Sjónvarp Símans er skemmtilegt.  Þar eru endursýndir þættir árum saman þangað til öruggt er að áhorfandinn kunni þá utanað.  Þannig er haldið þétt utan um hlutina. 

  Ein áhugaverðasta þáttaserían heitir Love island.  Hún sýnir mannlegt eðli ungs fólks.  Þættirnir ganga út á það að breskum ungmennum er holað niður í afskekkt hótel á Spáni.  Þar býr það í vellystingum.  Eina kvöðin er að para sig.  Sem er létt verk og löðurmannlegt. 

  Ýmsu er bryddað upp á til að freista.  Við það skapast drama, ótryggð, afbrýðisemi og allskonar breskleiki.  Til að skerpa á hefur þátttakandi möguleika á að eignast 20 milljón kall eða álíka. 

  Strákarnir í hópnum eru hugguleg húðflúruð líkamsræktartröll.  Þeir tala um stelpur á máli boltaleikja.  Þeir tala um að skora.  Koss er fyrsta höfn,  kynlíf önnur höfn og eitthvað svoleiðis.  Öllum þreifingum er fagnað sem sigri.

  Strákarnir eru íklæddir boxer sundskýlum.  Stelpurnar eru íklæddar efnislitlu bikini.  Þær farða sig svo ríflega að þær eru nánast óþekkjanlegar hver frá annarri.  Sítt slétt hár niður á bak er litað ljóst.  Allar eru með gerviaugnhár.  Allt í góðu með það.  Nema að þær eru með þrútnar botox-varir.  Það er ekki flott.  Ég fordæmi það sem vonda fyrirmynd ungra kvenna.  Mér að meinalausu mega konur á elliheimilum þrykkja í ýktar botox-varir.  Það er svo sem ekki margt annað um að vera á elliheimilum.  Ef frá er talin harmónikkumúsík.    

      

          

Athugasemdir

[Jóhann Elíasson, 15.8.2021 kl. 08:34]

Lýsingarnar á þátttakendum eru alveg magnaðar og þá sérstaklega kvenpeningnum, í þessum þáttum. eru alveg óborganlegar.  Ég hef stundum "ruglast" inn á þess þætti en alltaf stoppað stutt við og fyrst og fremst þá er ein frábær stöð sem ég horfi mikið á og heitir "NOW 70's SHOW" og eins og nafnið gefur til kynna eru gömlu goðin frá seventíes þar í aðalhlutverki.

[Sigurður I B Guðmundsson, 15.8.2021 kl. 10:04]

 Má ég þá frekar biðja um Tom and Jerry!!

[Jens Guð, 15.8.2021 kl. 10:19]

Jóhann,  ég þarf að tékka á þessu Now-showi.

[Jens Guð, 15.8.2021 kl. 10:20]

Sigurður I B,  já,  takk segi ég.

[Jóhann Elíasson, 15.8.2021 kl. 10:29]

Fyrirgefðu Jens en þetta show átti ekkert að vera þarna. Þátturinn heieir bara "NOW 7O'S"......

[Jens Guð, 15.8.2021 kl. 10:43]

Jóhann,  ég fattaði alveg hver þátturinn er

[Stefán (IP-tala skráð) 15.8.2021 kl. 17:44]

Hef ekki séð þessa þætti, en þáttakendur þeirra virðast vera álíka óspennandi og innhringjendur á Útvarpi Sögu. Aumingja Pétur Gunnlaugs á alla mína samúð að þurfa að vera í hlutverki geðlæknis á morgnana.  

[Jens Guð, 15.8.2021 kl. 18:44]

Stefán,  innhringjendur ÚS eru jafn misjafnir og þeir eru margir.  Þar af margir fróðlegir og skemmtilegir.  

[Helga Kristjánsdóttir, 16.8.2021 kl. 21:52]

Eg vildi ekki missa ef þeim bestu. Og alls ekki viðtölunum við þig t.d. fróðleik frá Færeyjum.

[Jens Guð, 17.8.2021 kl. 15:22]

Helga,  bestu þakkir fyrir hlý orð.