Brýnt að halda til haga um Guðna Má Henningsson

  Ég heyrði fyrst af Guðna Má er ég kíkti í Plötubúðina á Laugavegi 20.  Þar réði Halldór Ingi heitinn Andrésson ríkjum.  Hann sagði mér frá þessum náunga sem hlustaði á músík allan daginn alla daga.  Hlustaði og stúderaði flytjendur allan sinn vökutíma.

  Halldóri Inga þótti áríðandi að stútfullur fróðleiksbrunnur Guðna Más yrði virkjaður í útvarpi.  Mig minnir að hann hafi fyrst komið honum í útvarpsstöðina Sólina.  Þar blómstraði hann með öðruvísi lagaval en aðrir dagskrárgerðarmenn.  Heillandi lagaval.

  Síðar hreppti Rás 2 Guðna Má.  Það var happafengur.   

  2002 tók Guðni Már upp á því að spila á Rás 2 færeyskt lag,  "Ormurin langi" með víkingametalsveitinni Tý. Þá hafði færeysk tónlist ekki áður verið spiluð á Rás 2. Vinnufélagarnir stukku ekki á vagninn til að byrja með.  Hann þurfti að hafa fyrir því að koma "Ormurin langi" í fasta spilun á Rás 2.  Með harðfylgni tókst honum að landa því.

  "Ormurin langi" varð mest spilaða lag á Íslandi 2002.  Platan seldist í 4000 eintökum.  Kiddi kanína var snöggur til að venju.  Hann bókaði Tý í hljómleikaferð um Ísland.  Í leiðinni bjó hann til færeyska tónlistarveislu,  Fairwaves.  Þar kynnti hann til sögunnar fjölda færeyskra tónlistarmanna,  svo sem Eivöru,  Högna Lisberg,  hljómsveitina Clickhaze,  pönksveitina 200,  djasssveitina Yggdrasil með Kristian Blak í fararbroddi,  Lenu Anderssen,  Hanus G. og Guðrið Hansdóttir, svo aðeins örfá nöfn séu nefnd.  

  Án Guðna Más hefðu Íslendingar aldrei kynnst frábærri tónlist þessa fólks. 

  Til gamans vitna ég í frásögn Guðna Más í bók minni Gata, Austurey,  Færeyjar,  Eivör og færeysk tónlist:  "Eivör spilaði í beinni útsendingu hjá mér í Útvarpshúsinu í Þórshöfn.  Hún var mögnuð stelpan þar.  Á milli laga spjallaði ég við hana og eitt sinn þegar ég reyndi að vera mjög gáfulegur og klár þá kleip hún mig í rassinn - í beinni útsendingu!"

        

Athugasemdir

[Jósef Smári Ásmundsson (IP-tala skráð) 8.10.2021 kl. 07:09]

Vert að minnast þessa öðlings. Ég kynntist honum örlítið " á ská" rétt fyrir síðustu jól. Þá var hann illa haldinn af þunglyndinu og það mátti sjá á málverkum sem hann gaf. Þunglyndið er hryllilegur sjúkdómur og ef á að minnast þessa manns þá á ekki að fella það.

[Jens Guð, 8.10.2021 kl. 08:14]

Jósef Smári,  þetta er rétt hjá þér.

[Jóhann Elíasson, 8.10.2021 kl. 09:21]

Guðni  Már var frábær útvarpsmaður og alveg sérstaklega þægilegt og afslappandi ð hlusta á hann svo ekki sé talað um allan fróðleikinn sem hann bjó yfir. Og hvernig hann kom þessum fróðleik á framfæri, var eins og hann væri að segja frá einhverju sem ætla mætti að allir vissu fyrir en hann væri bara aðeins að "hnykkja" á þessu.  Aldrei var hann með neitt yfirlæti.........

[Jens Guð, 8.10.2021 kl. 09:22]

Jóhann,  ég tek undir hvert orð.

[Stefan (IP-tala skráð) 8.10.2021 kl. 09:34]

Eg minnist Guðna Mas með þvi að hlusta mikið a Bob Dylan þessa dagana.

[Jens Guð, 8.10.2021 kl. 09:55]

Stefán,  vel til fundið.

[Sigurður I B Guðmundsson, 8.10.2021 kl. 10:14]

 Margir "skakkir" hringdu í þátt hans á laugardagskvöldum og var oft fyndið að hlusta á þau samtöl.

[Jens Guð, 8.10.2021 kl. 10:18]

Sigurður I B, ég hlustaði oft á þetta og dáðist að þolinmæði og umburðarlyndi Guðna Más.

[Stefán (IP-tala skráð) 8.10.2021 kl. 15:24]

Já Jens, það þarf svo sannarlega þolinmæði við þessa föstu innhringjendur Næturvaktarinnar. Maður finnur stundum til með Heiðu Eiríks að eiga við þetta blessaða fólk sem sumt hvað virðist vera mjög langt frá norminu, hvort sem það er sjálfumglaður bóndi eða kveðjuglaður íbúi á Ásbrú. 

[Jens Guð, 8.10.2021 kl. 17:27]

Stefán (# 9),  Heiða Eiríks er frábær.  Alltaf.