Varasamt að lesa fyrir háttinn

  Fátt gleður meira en góð bók.  Margur bókaormurinn laumast til að taka bók með sér inn í svefnherbergi á kvöldin.  Þar skríður hann undir sæng og les sér sitthvað til gamans og til gagns.  Þetta hefur löngum verið aðferð til að vinda ofan af erli dagsins í lok dags.  Svífa síðan á bleiku skýi inn í draumaheim. 

  Þetta getur verið varasamt á tækniöld.  Bækur eru óðum að færast af pappír yfir í rafrænt form.  Vandamálið er að á skjánum glampar blátt ljós svo lítið ber á.  Það ruglar líkamsklukkuna.  Þetta hefur verið rannsakað.  Sá sem les af skjá er lengur að falla í svefn en þeir sem lesa á pappír.  Svefn þeirra er grynnri og að morgni vakna þeir síður úthvíldir.

 

.

 

 

 

 

Athugasemdir

[Jóhann Elíasson, 26.3.2023 kl. 12:55]

Það var þannig að ein bókin, sem var notuð sem kennslubók í vissu fagi í Viðskiptafræðinni var svo afspyrnu leiðinleg að ef ég var í vandræðum með að sofna, þá náði ég í þessa bók og viti menn ég náð ekki að lesa nema fjórar til fimm blaðsíður þá steinlá ég.  Ég var heldur ekki mjög hár á prófinu en ég náði.  En bókin var á pappír sem skipti náttúrulega höfuðmáli í þessum tilfellum....... 

[Jens Guð, 26.3.2023 kl. 13:49]

Jóhann,  takk fyrir skemmtilega sögu.

[Stefán (IP-tala skráð) 26.3.2023 kl. 19:32]

Las í dag að skatta Kata boði skattahækkanir, að ríkisbáknið verði blásið enn meira út, að stýrivextir muni hækka enn frekar. Held ég lesi ekki meira fyrir svefninn. 

[Jens Guð, 27.3.2023 kl. 07:05]

Stefán,  svona lestur framkallar martröð!

[Hörður Þór Karlsson, 27.3.2023 kl. 08:21]

Rafrænar bækur lykta ekki og það skrjáfar ekki í blaðsíðunum eins og í alvöru bókum, fyrir mér algjört "möst"! enda af gamla skólanum.

Takk Jens fyrir skemmtilega pistla í gegn um tíðina.

[Jens Guð, 27.3.2023 kl. 10:04]

Hörður,  takk fyrir hlý orð.

[Sigurður I B Guðmundsson, 27.3.2023 kl. 10:52]

Ég sofna yfirleitt fyrir háttinn!!!

[Jens Guð, 27.3.2023 kl. 13:41]

Sigurður I B,  snilld!

[Ingibjörg Magnúsdóttir, 27.3.2023 kl. 23:22]

Heima hjá mér er nú ekkert laumast inn í svefnherbergi á kvöldin með bók... þar bíður bókin í rúminu eftir mér. Og oft er freistandi að fara bara beint upp í rúm eftir kvöldmat, fréttir og Kastljós. En reyni að halda aftur af mér, annars er maður vaknaður alltof snemma. Þegar ég var krakki fannst mér óþolandi þegar ég lá uppi í rúmi á kvöldin á kafi í bók, og svo var æpt á mann: Farðu að slökkva ljósið. Svo var ég svo heppin að geta keypt mér lítið vasaljós í dótabúðinni uppi á Klapparstíg. Og þegar mér var sagt að slökkva ljósið, slökkti ég þegandi og hljóðalaust, breiddi upp fyrir haus með bókina og dró vasaljósið undan koddanum og hélt nú bara áfram að lesa.

Þrátt fyrir tæknina, eru símar og tölvur óvelkomnir gestir í mínu svefnherbergi. Les bara alvöru bækur.

[Jens Guð, 28.3.2023 kl. 06:42]

Ingibj0rg,  takk fyrir að deila með okkur þessari sögu.  Ég kannast við sumt af þessu sjálfur.